ডিজিটেল ডেস্কঃ পৰেশ বৰুৱাৰ একাষৰীয়া কৰি আলোচনাপন্থী আলফা গোটৰ সৈতে কেন্দ্ৰীয়-ৰাজ্য চৰকাৰ শান্তি চু্ক্তি সমাপন হোৱাৰ পাছতে এতিয়া ৰাজ্যজুৰি মিশ্ৰিত প্ৰতিক্ৰিয়াৰ সৃষ্টি হৈছে। একাংশই এই শান্তি চুক্তিক আদৰণি জনোৱাৰ বিপৰীতে একাংশই তীব্ৰ কটাক্ষ কৰিছে চুক্তিখনক।
এই শান্তি চুক্তিক লৈ অসন্তুষ্টি প্ৰকাশ কৰিছে আলফা স্বাধীনৰ সেনাধ্যক্ষ পৰেশ বৰুৱা জ্যেষ্ঠ ভাতৃ বিমল বৰুৱাই। তেওঁ কয় যে, সকলো একেলগেই সংগ্ৰামৰ মজিয়ালৈ গৈছিল। তেনেস্থলত এটা গোট হাবিত থকাৰ পাছত আন এটা গোটৰ সৈতে হোৱা এই চুক্তিত কেতিয়াও সমাধানৰ পথ নোলায়। অসম এনেও শান্তিতেই আছে, কিন্তু জাতিৰ নিৰাপত্তা, ৰাজনৈতিক অধিকাৰৰ ক্ষেত্ৰত কিছু কথা আপোচ কৰাটো সঠিক নহয়।
আনহাতে এই চুক্তি পৰেশ বৰুৱাৰ অবিহনে সম্পূৰ্ণ নহয় বুলি উল্লেখ কৰি তেওঁ কয়, ”উপযুক্ত পৰিৱেশ আৰু স্থান পালে পৰেশ বৰুৱা নিশ্চয় আলোচনালৈ আহিব। পৰেশ বৰুৱাৰ অন্তৰখন শিলৰ নহয়, জ্যেষ্ঠ ভাতৃ হিচাপে মই তেওঁৰ অন্তৰখন বুজি পাও। ”
উল্লেখ কৰা প্ৰয়োজন যে, কেন্দ্ৰীয় আৰু আলফাৰ আলোচনাপন্থীৰ মাজত শান্তি চুক্তি সমাপন হোৱাৰ পাছতে অসম তথা উত্তৰ পূব সন্ত্ৰাসবাদমুক্ত হ’ল বুলি মন্তব্য কৰিছিল কেন্দ্ৰীয় গৃহমন্ত্ৰী অমিত শ্বাহে। অসমৰ মুখ্যমন্ত্ৰীয়েও এই চুক্তিক ঐতিহাসিক বুলি অভিহিত কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
