পাছপ’ৰ্ট বনোৱাটো এতিয়াৰ পৰা সহজ, আৰক্ষীৰ ভেৰিফিকেচনত কোনেও কৰিব নোৱাৰিব দাদগিৰি
পাছপ’ৰ্ট বনোৱাটো এতিয়াৰ পৰা সহজ, আৰক্ষীৰ ভেৰিফিকেচনত কোনেও কৰিব নোৱাৰিব দাদগিৰি
পাছপ’ৰ্ট পোৱাটো এতিয়াৰ পৰা সহজ হ’ব, পাছপ’ৰ্ট বনোৱাৰ ক্ষেত্ৰত নাপাব অসুবিধা৷ ইয়াৰ বাবে বৈদেশিক পৰিক্ৰমা মন্ত্ৰালয়ে ৰাজ্য আৰু কেন্দ্ৰীয় শাসিত অঞ্চলৰ আৰক্ষীৰ সহযোগত এক সমাধানৰ কাম কৰি আছে, যাতে মানুহে কেইদিনমানৰ ভিতৰতে পাছপ’ৰ্ট লাভ কৰিব পাৰে।
আজি ২৪ জুন সোমবাৰে পাছপ’ৰ্ট সেৱা দিৱস উপলক্ষে বৈদেশিক মন্ত্ৰী এছ. জয়শংকৰে কয় যে উন্নত পাছপ’ৰ্ট সেৱাৰ বাবে মন্ত্ৰালয়ে ৪৪০ টা ডাকঘৰৰ পাছপ’ৰ্ট সেৱা কেন্দ্ৰ স্থাপন কৰিছে। ইয়াৰ উপৰিও ৯৩টা পাছপ’ৰ্ট সেৱা কেন্দ্ৰ আছে। বৰ্তমান দেশত ৫৩৩টা পাছপ’ৰ্ট প্ৰক্ৰিয়াকৰণ কেন্দ্ৰ আৰু ৩৭টা আঞ্চলিক পাছপ’ৰ্ট কাৰ্যালয় আছে। বৈদেশিক পৰিক্ৰমা মন্ত্ৰালয়েও ইয়াৰ সৈতে বিদেশত থকা ১৮৭টা ভাৰতীয় অভিযানক সংযোগ কৰিছে।
আচলতে পাছপ’ৰ্ট পোৱাৰ আটাইতকৈ ডাঙৰ সমস্যাটো আহে আৰক্ষীৰ ভেৰিফিকেচনত। এই ব্যৱস্থাটোতে বহুত সময় লাগে। বহু সময়ত আৰক্ষীৰ ভেৰিফিকেচনৰ নামত আবেদনকাৰীক হাৰাশাস্তিও কৰা হয়। এনে পৰিস্থিতিত বৈদেশিক পৰিক্ৰমা মন্ত্ৰালয়ে এই সমস্যা সমাধানৰ চেষ্টা চলাইছে।
এছ. জয়শংকৰে কয় যে আৰক্ষীৰ পৰীক্ষণ ক্ষিপ্ৰতাৰে হোৱাৰ বাবে ‘mPassport Police App’ আৰম্ভ কৰা হৈছে। ইয়াৰ সৈতে ২৫খন ৰাজ্য আৰু কেন্দ্ৰীয় শাসিত অঞ্চলৰ ৯ হাজাৰ থানা সংযোগ কৰা হৈছে। ইয়াৰ লগতে কাগজবিহীন নথিপত্ৰৰ বাবে পাছপ’ৰ্ট সেৱা ব্যৱস্থাক ডিজি লকাৰৰ সৈতে সংযুক্ত কৰা হৈছে। ইয়াৰ ফলত আৰক্ষীৰ পৰীক্ষণৰ কাম সহজ হৈ পৰিব।
লগতে ইয়াকো কয় যে ২০২৩ চনৰ যোৱা বছৰত বৈদেশিক পৰিক্ৰমা মন্ত্ৰালয়ে ১.৬৫ কোটি পাছপ’ৰ্ট সম্পৰ্কীয় সেৱা আগবঢ়াইছে। ২০২৩ চনত মাহেকীয়া পাছপ’ৰ্টৰ আবেদনে ১৪ লাখ অতিক্ৰম কৰিছিল। তেওঁ আৰু কয় যে পাছপ’ৰ্টে নাগৰিকৰ উন্নয়নত যথেষ্ট অৰিহণা যোগায়। ইয়াৰ প্ৰত্যক্ষ প্ৰভাৱ দেশৰ উন্নয়নত পৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
