মৃত্যু যজ্ঞ প্ৰকৃতিৰ, এফালে ৱাইনাড, আনফালে উত্তৰাখণ্ড-হিমাচল, দুয়ো ঠাইত নিহতৰ সংখ্যা ৪০০ পাৰ
দেশত যেন প্ৰকৃতিয়ে কাল ৰূপ ধাৰণ কৰি মৃত্যু যজ্ঞ পাতিছে। কেৱল মৃত্যুৰ খবৰ চাৰিওফালৰ পৰা। দেশৰ উত্তৰ অংশত যদি ডাৱৰ বিস্ফোৰণৰ ঘটনা, দক্ষিণাংশত আকৌ ভূমিস্খলনৰ ঘটনা। ডাৱৰ বিস্ফোৰণ হৈ উত্তৰাখণ্ড আৰু হিমাচল প্ৰদেশত বৰ্তমানলৈ ২৩ গৰাকী লোকৰ মৃত্যু, ৩৬ গৰাকী লোক এতিয়াও সন্ধানহীন।
আনহাতে কেৰালাৰ ৱাইনাডত ৩৫৮ লৈ বৃদ্ধি পাইছে মৃকৰ সংখ্যা। ইয়াৰ লগতে প্ৰায় ২০০ লোক খহি পৰা মাটিৰ মাজত এতিয়াও আৱদ্ধ। উদ্ধৰ অভিযান অব্যাহত আছে এতিয়াও।
কেৰালাৰ ৱায়ানাডত সংঘটিত ভূমিস্খলনৰ পিছত আজি পঞ্চম দিনত সাহায্য আৰু উদ্ধাৰ অভিযান। এতিয়ালৈকে মৃত্যুৰ সংখ্যা ৩৫৮ জন হৈছেগৈ। মৃতদেহৰ সন্ধান এতিয়াও অব্যাহত আছে। ভাৰতীয় সেনাৰ লেফটেনেণ্ট কৰ্ণেল বিকাশ ৰাণাই কয় যে আজিও কালিৰ দৰে বিভিন্ন জ’নৰ বাবে বিভিন্ন দল গঠন কৰা হ’ব। দলসমূহৰ সৈতে বিজ্ঞানী আৰু স্নিফাৰ ডগো উপস্থিত থাকিব। সেনা বিষয়াগৰাকীয়ে কয় যে স্থানীয় লোকেও সাহায্য আৰু উদ্ধাৰ অভিযানত সহায় কৰি আছে।
কেৰেলাৰ এডিজিপি (আইন আৰু শৃংখলা) এম.আৰ. অজিত কুমাৰে ৱাইনাডৰ ভূমিস্খলনৰ সন্দৰ্ভত কয়, ‘সাহায্য আৰু উদ্ধাৰ অভিযান চলি আছে, আমি অনুসন্ধান অভিযানত নিয়োজিত হৈছো, সমগ্ৰ অঞ্চলটোক ৬টা জ’ন, ৫টা ভূমি এলেকা আৰু ১টা নদী এলেকাত ভাগ কৰা হৈছে। যোৱা দুদিন ধৰি আমি নদী অঞ্চলটোৰ ওপৰত গুৰুত্ব দি আছো। আৰক্ষী বিষয়াৰ লগতে বন, অগ্নিনিৰ্বাপক আৰু উপকূলৰ ৰক্ষীয়েও নিজৰ কাম কৰি আছে। আমাৰ আৰক্ষীৰ হেলিকপ্টাৰ আৰু ড্ৰোন ব্যৱহাৰ কৰি জৰীপ চলোৱা হৈছে। আজি আমি সেই অনুসন্ধানত এটা মৃতদেহ পাইছিলোঁ। এই পৰ্যন্ত জিলা প্ৰশাসনৰ তথ্য অনুসৰি তেওঁলোকে ৪০০ লোক নিৰুদ্দেশ হোৱাৰ তথ্য লাভ কৰিছে, আমাৰ হাতত বিশেষ তথ্য নাই।
উত্তৰ ভাৰতৰ দুই ৰাজ্যতো এতিয়া চকু পানীৰে বাট নেদেখা অৱস্থা। উত্তৰাখণ্ড আৰু হিমাচল প্ৰদেশত ধাৰাসাৰ বৰষুণৰ লগতে ডাৱৰ বিস্ফোৰণৰ ফলত হঠাতে অহা বানপানীত উটি যায় বহু লোক। দুয়োখন ৰাজ্যৰ এতিয়ালৈকে ২৩ গৰাকী লোক, উত্তৰাখণ্ডৰ ১৫ গৰাকী আৰু হিমাচল প্ৰদেশৰ ৮ গৰাকী লোকৰ মৃতদেহ উদ্ধাৰ হোৱাৰ লগতে ৩৬গৰাকী সন্ধানহীন। সন্ধানকাৰ্য অব্যাহত ৰাখিছে প্ৰশাসন আৰু স্থানীয় ৰাইজে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
