সোণ অবিহনেই ভাৰতৰ পেৰিছ অলিম্পিক যাত্ৰা সমাপন, অৱশ্যে ৰূপ দুটা হোৱাৰ সম্ভাৱনা
পেৰিছ অলিম্পিক ২০২৪ত সোণ অবিহনে ভাৰতৰ অভিযান অন্ত পৰিল। হেভিৱেট মল্লযুঁজাৰু ৰিতিকা হুদা (৭৬ কেজি শাখা)ৰ পৰাজয়ৰ লগে লগে ভাৰতৰ অধিক পদক লাভৰ আশাও অন্ত পৰিল। পেৰিছ অলিম্পিকত ভাৰতে ১টা ৰূপৰ পদকে ধৰি মুঠ ৬টা পদক লাভ কৰে। ইয়াৰ লগে লগে স্পষ্ট হৈ পৰিছে যে ভাৰতীয় দলটোৱে এইবাৰ পেৰিছ অলিম্পিকত ৩ বছৰ পূৰ্বে অনুষ্ঠিত হোৱা টকিঅ’ অলিম্পিকতকৈ কম পদক আনিব।
পেৰিছ অলিম্পিকৰ সপ্তম পদক জয়ৰ আশা শনিবাৰে ঋতিকা হুদাৰ পৰাস্ত হোৱাৰ লগে লগে ভাৰতৰ আশা শেষ হৈ পৰে। ৰিটিকাক পৰাস্ত কৰা কিৰ্গিস্তানী মল্লযুঁজাৰুগৰাকী যদি ফাইনেলত প্ৰৱেশ কৰিলেহেঁতেন তেন্তে ভাৰতীয় মল্লযুঁজাৰুগৰাকীয়ে ৰিপেচেজ ৰাউণ্ডত সুযোগ পালেহেঁতেন। কিৰ্গিস্তানৰ মল্লযুঁজাৰুগৰাকীয়ে ছেমি ফাইনেলত পৰাস্ত হয়, যাৰ বাবে ৰিটিকা হুডা পদক ৰাউণ্ডৰ পৰা আঁতৰিব লগা হয়।
বিগতবাৰ টকিঅ’ অলিম্পিকত ভাৰতে ১টা সোণ, ২টা ৰূপ আৰু ৪টা ব্ৰঞ্জৰ পদক লাভ কৰি পদক তালিকাত ৪৮ নম্বৰ স্থানত আছিল। এইবাৰ ৭১ নম্বৰ স্থানলৈ অৱনমিত হৈছে ভাৰতীয় দল। তাকো এইবাৰ ভাৰতীৰ দলৰ জোলোঙাত নাই এটাও সোণ, ৰূপৰ ক্ষেত্ৰতো আছে কেৱল এটা ৰূপ, যিটো লাভ কৰিছে নীৰজ চোপ্ৰাই। তাৰি বাহিৰে বাকি সকলো ব্ৰঞ্জ।
অৱশ্যে এতিয়াও ৭মটো পদক লাভৰ আশা আছে ভাৰতৰ বাবে। পেৰিছ অলিম্পিক গেমছ আজি ১১ আগষ্টত শেষ হ’ব। কিন্তু পেৰিছ গেমছৰ পাছতো ভাৰতৰ পদকৰ সংখ্যা বৃদ্ধি পাব পাৰে। ভাৰতীয় মল্লযুঁজাৰু বিনেশ ফ’গাটে CASক ৰূপৰ পদক প্ৰদানৰ বাবে আবেদন জনাইছে। এই সন্দৰ্ভত মঙলবাৰে সিদ্ধান্ত লোৱা হ’ব।
যদিহে বিনেশে এই আবেদনত জয়ী হয় তেন্তে ৰূপৰ পদক লাভ কৰা দেশৰ প্ৰথমগৰাকী মহিলা মল্লযুঁজাৰু হিচাপে পৰিগণিত হ’ব। ইয়াৰ লগে লগে ভাৰতৰ পদকৰ সংখ্যা ৭টা হ’ব। এনে হ’লে পদকৰ হিচাপত ৬৮ নম্বৰ স্থানলৈ উন্নিত হ’ব ভাৰত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
