দ্ৰুত গতিত বিয়পিলৈ ধৰা মাংকি পক্স কি, কেনেকৈ বিয়পে এই ৰোগ, প্ৰতিৰোধ কৰিব কেনেকৈ !
শেহতীয়া বছৰবোৰত সমগ্ৰ বিশ্বতে বহুতো নতুন ভাইৰাছৰ বিস্তাৰ দেখা গৈছে, তাৰ ভিতৰত এটা হৈছে মাংকি পক্স। এই ভাইৰাছ ইতিমধ্যে মধ্য আফ্ৰিকাৰ কিছুমান ঠাইত দ্ৰুত গতিত বিয়পিছে, যদিও বৰ্তমান বিশ্বৰ আন আন ঠাইতো এই ভাইৰাছ বিয়পি পৰিছে। Covid-19 ৰ সন্মুখীন হোৱা ভাৰতত এই ৰোগক লৈ আশংকাৰ সৃষ্টি হৈছে।
এনে পৰিস্থিতিত আটাইতকৈ ডাঙৰ প্ৰশ্নটো হ’ল এইটোও ক’ৰ’নাৰ দৰে বিয়পি পৰা ভাইৰাছ নেকি? Covid ৰ দৰে শ্বাস-প্ৰশ্বাসজনিত বায়ুৰ যোগেদি বিয়পিব পাৰেনে? সুৰক্ষাৰ বাবে পুনৰ মাস্ক আৰু চেনিটাইজাৰৰ প্ৰয়োজন হ’বনে?
মাংকিপক্সৰ বাবে বিশ্বৰ বহু দেশ আক্ৰান্ত হৈছে। বিশ্ব স্বাস্থ্য সংস্থা আৰু প্ৰতিখন দেশ এই সন্দৰ্ভত সজাগ। এই ৰোগক সহজভাৱে ল’ব নালাগে। ভাৰত চৰকাৰো এই ৰোগৰ মোকাবিলা কৰিবলৈ সম্পূৰ্ণ সাজু হোৱাৰ লগতে সমগ্ৰ দেশতে এক সতৰ্কবাণী জাৰি কৰা হৈছে। সকলোকে সাৱধানতা অৱলম্বন কৰিবলৈ পৰামৰ্শ দিয়া হৈছে। যিহেতু ভাৰতীয় জনসাধাৰণ ইতিমধ্যে Covid ৰ দৰে ভয়ানক ৰোগত আক্ৰান্ত হৈছে, গতিকে ইয়াক প্ৰতিৰোধৰ বাবে কিছু কথা মনত ৰখাটো জৰুৰী।
মাংকিপক্স কি?
জীৱ-জন্তুৰ পৰা মানুহলৈ বিয়পি পৰা এক বিৰল কিন্তু ভয়াৱহ ভাইৰাছজনিত ৰোগ। ১৯৫৮ চনত প্ৰথমবাৰৰ বাবে বান্দৰৰ শৰীৰত এই মাংকিপক্স পোৱা গৈছিল, তাৰ পিছত মানুহৰ দেহতো দেখা গৈছিল এই ৰোগ। বৰ্তমান ই মধ্য আফ্ৰিকাৰ ডেম’ক্ৰেটিক ৰিপাব্লিক অৱ কংগোৰ পৰা বিশ্বৰ ১০০ খনতকৈও অধিক দেশত দেশত বিয়পি পৰিছে।
মাংকিপক্সৰৰ লক্ষণ
মাংকিপক্সৰ লক্ষণ সাধাৰণতে সংক্ৰমণৰ ৭ৰ পৰা ১৪ দিনৰ পিছত দেখা দিয়ে। ইয়াৰ ভিতৰত জ্বৰ, মূৰৰ বিষ, পেশীৰ বিষ, কঁকালৰ বিষ, লিম্ফ ন’ড ফুলা, ঠাণ্ডা লগা, ভাগৰুৱা হোৱা আদি। ইয়াৰ পিছত মুখ, হাত, শৰীৰৰ অন্যান্য অংশত গুটিৰ দৰে ওলায় যিবোৰে পিছলৈ ফোহাৰ ৰূপ লয়।
মাংকিপক্স কেনেকৈ বিয়পে?
মাংকিপক্স হৈছে ভাইৰাছজনিত জুনোচিছ ৰোগ। প্ৰধানকৈ জীৱ-জন্তুৰ পৰা মানুহলৈ বিয়পি পৰে। ই আক্ৰান্ত প্ৰাণীৰ কামোৰ, আঁচোৰ আৰু শৰীৰৰ তৰল পদাৰ্থৰ সংস্পৰ্শৰ জৰিয়তে বিয়পে। ইয়াৰ বাহিৰেও সংক্ৰমিত ব্যক্তিৰ সংস্পৰ্শলৈ আহিলে মাংকিপক্স বিয়পিব পাৰে। ইয়াৰ উপৰিও বতাহত থকা এৰ’ছলৰ জৰিয়তেও বিয়পে, যেনেকৈ Covid বিয়পি পৰে।
কিদৰে পৰিত্ৰাণ পাব-
পৰিষ্কাৰ-পৰিচ্ছন্নতাৰ যত্ন লওক- নিয়মিতভাৱে চাবোন আৰু পানীৰে হাত ধুব লাগে। চেনিটাইজাৰো ব্যৱহাৰ কৰিব পাৰে।
মাস্ক আৰু গ্ল’ভছ পিন্ধক – মাংকিপক্সৰ লক্ষণ থকা লোকৰ পৰা আঁতৰি থাকক আৰু যদি আপুনি সংক্ৰমিত ব্যক্তিৰ যত্ন লৈ আছে তেন্তে মাস্ক আৰু গ্ল’ভছ পিন্ধিব আৰু তাৰ পিছত ৰোগীৰ পৰা উভতি অহাৰ পিছত সঠিকভাৱে সেইবোৰ পেলাই দি নিজকে ছেনিটাইজ কৰিব।
জীৱ-জন্তুৰ পৰিহাৰ- বন্যপ্ৰাণী বিশেষকৈ বান্দৰ আৰু নিগনিৰ দৰে জীৱ-জন্তুৰ সংস্পৰ্শৰ পৰা আঁতৰি থাকিব লাগে।
ছালৰ ঘাঁবোৰ ঢাকি ৰাখক – আন কোনো কাৰণত ছালত ফোহা ওলালেও প্ৰতিৰোধমূলক সকলো পদ্ধতি গ্ৰহণ কৰক। স্বাস্থ্যসন্মত আহাৰ গ্ৰহণ কৰক আৰু প্ৰচুৰ পৰিমাণে পানী খাওক।
সামাজিক দূৰত্ব বজাই ৰখাটোও প্ৰয়োজনীয়। জনসমাগম বেছি হোৱা ৰাজহুৱা স্থানলৈ যোৱাৰ পৰা বিৰত থাকক। মানুহৰ লগত হাত মিলাব নালাগে। অপ্ৰয়োজনীয় বস্তু চুব নালাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
