কিমান তললৈ নামিব…! আৰ জি কৰত কাণ্ডক লৈ কি বিচাৰিছে গুগলক?

এয়াই সত্য৷ ইণ্টাৰনেটত কোনো কথাই লুকাই নাথাকে৷ আপুনি কি বিচাৰিছে, কিমানবাৰ বিচাৰিছে সকলো তথ্য ছেভ হৈ থাকে গুগলত৷ পৰবৰ্তী সময়ত সেই তথ্য কামত আহে তদন্তকাৰীৰ৷ যিয়েই নহওক NCRBৰ ৰেকৰ্ডে দাবী কৰিছে যে ভাৰতত প্ৰতি ১৬ মিনিটত এটা ধৰ্ষণৰ ঘটনা ঘটে৷ আৰু সম্প্ৰতি পৰ্ণচাইটত বহু নিৰ্যাতিতাৰ নাম আৰু ছবি আপলোডো হয়৷ সেয়ে সেই নামেৰে বহুতে গৈ পৰ্ণ চাইটত চাৰ্ছ কৰে৷ আৰ জি কৰৰ নিৰ্যাতিতাৰ নাম কেনেকৈ প্ৰকাশ পালে সেই বিষয়টোক লৈ সেয়ে উদ্বিগ্ন হৈ পৰিছে উচ্চতম ন্যায়ালয়৷ দেশৰ আইন অনুযায়ী কোনো নিৰ্যাতিতাৰ ছবি আৰু নাম প্ৰকাশ কৰিব নোৱাৰি৷ আৰ জি কৰৰ কাণ্ডত আকৌ এবাৰ দেশবাসীক সেই কথা সোঁৱৰাই দিছে উচ্চতম ন্যায়ালয়ে৷ তাৰমাজতেই প্ৰকাশ পাইছে এক লজ্জাজনক তথ্য৷

আৰ জি কৰ হাস্পতালত নিৰ্যাতিতাৰ বিচাৰৰ দাবীত সমগ্ৰ দেশজুৰি চলিছে আন্দোলন৷ আন্দোলনৰ ধাৰাবাহিকতা দেশতেই আছে তেনে নহয়৷ বিদেশতো এই বিষয়টোক লৈ চলিছে প্ৰতিবাদ৷ তাৰমাজতেই আৰ জি কৰৰ নিৰ্যাতিতাৰ ধৰ্ষণৰ ভিডিঅ’ বিচাৰি একাংশই গুগল চাৰ্ছ কৰিছে৷ ইতিমধ্যেই গুগলে উদঙাই দিছে এই লজ্জাজনক তথ্য৷ গুগলত বাৰে বাৰে ট্ৰেণ্ড কৰিছে নিৰ্যাতিতাৰ নাম দি ৰেপ ভিডিঅ’ আৰু ৰেপ ফটো চাৰ্ছ কৰাৰ তথ্য৷

বিগত ৯ আগষ্টত আৰ জি কৰ হাস্পতালৰ ছেমিনাৰ হলৰ পৰা উদ্ধাৰ হৈছিল চিকিৎসকৰ ৰক্তাক্ত দেহ৷ মৰোণোত্তৰ পৰীক্ষাৰ ৰিপৰ্টে স্পষ্টকৈ কৈছিল যে চিকিৎসকগৰাকীক ধৰ্ষণ কৰি হত্যা কৰা হৈছে৷ আৰ জি কৰৰ ঘটনাৰ প্ৰতিবাদ চলি থকাৰ মাজতেই গুগলে দাঙি ধৰিছে লজ্জাজনক তথ্য৷

দ্যা কুইণ্টলৰ প্ৰতিবেদনত কোৱা হৈছে যে গুগল ট্ৰেণ্ডছ বিশ্লেষণ কৰি পোৱা গৈছে যে এই ঘটনাৰ পাছৰ দিনাৰ পৰা বৰ্তমানলৈকে নিৰ্যাতিতাৰ ভিডিঅ’ চাৰ্ছ কৰিছে বহুতেই৷ ২০ আগষ্ট পৰ্যন্ত সেই চাৰ্ছ কৰা নেটিজেনৰ সংখ্যা বৃদ্ধি পাইছে ১৬০ৰ পৰা ১৯০শতাংশ৷

প্ৰতিবেদন অনুসৰি গুগল ট্ৰেণ্ড বিশ্লেষণ কৰি দেখা গৈছে যে ১৬ আগষ্টত সৰ্বাধিক এই ভিডিঅ’ বিচাৰি গুগলত চাৰ্ছ কৰা হৈছে৷ নিশাৰ ভাগতেই বেছিসংখ্যকে এই ভিডিঅ’ বিচাৰিছে৷ নিৰ্যাতিতাৰ নাম দিও বহুতে ভিডিঅ’টো চাৰ্ছ কৰিছে৷ প্ৰায় ৩০০০ বাৰৰ অধিক এই ভিডিঅ’ চাৰ্ছ কৰা হৈছে৷ এক নিৰ্দিষ্ট পৰ্ণ চাইটত সকলোতকৈ বেছি এই বিষয়ে চাৰ্ছ কৰা হৈছে৷ অৱশ্যে বহুতেই এই কথা মানিবলৈ নাৰাজ৷ একাংশৰ দাবী আৰ জি কৰৰ নিৰ্যাতিতাক লৈ বহুতেই জানিবলৈ আগ্ৰহী হৈ পৰিছিল হাস্পতালৰ ভঙাচিঙা সম্পৰ্কে জানিবলৈ৷ কিন্তু ১৬ আগষ্টৰ পৰা আৰ জি কৰৰ নিৰ্যাতিতাক লৈ সৰ্বাধিক গুগল চাৰ্ছ কৰিছে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ