এডিলেইডত ইতিহাস ৰচনা কৰাৰ সুযোগ বিৰাটৰ হাতত, ভংগ হব ব্রায়ান লাৰা আৰু ভিভিয়ান ৰিচাৰ্ডছৰ ৰেকৰ্ড !
অষ্ট্ৰেলিয়া ভ্ৰমণত এতিয়ালৈকে টিম ইণ্ডিয়াৰ প্ৰদৰ্শন অতি উত্তম। প্ৰথমখন খেলত অষ্ট্ৰেলিয়াক ২৯৫ ৰানত পৰাস্ত কৰি ১/০ত আগবাঢ়ি আছে টিম ইণ্ডিয়া। এতিয়া সকলোৰে চকু এডিলেইডত অনুষ্ঠিত হ’বলগীয়া দিবা-নৈশ খেলত। এই টেষ্ট মেচ কাইলৈ ৬ ডিচেম্বৰৰ পৰা আৰম্ভ হ’ব।
এই খেলপথাৰতে ২০২০ চনত দিবা-নৈশ টেষ্ট মেচত অষ্ট্ৰেলিয়াৰ বিৰুদ্ধে পৰাজয়ৰ সন্মুখীন হ’বলগীয়া হৈছিল ভাৰতে। এনে পৰিস্থিতিত এতিয়া টিম ইণ্ডিয়াই এই মেচত জয়ী হ’বলৈ চেষ্টা কৰিব। একে সময়তে টিম ইণ্ডিয়াৰ তাৰকা বেটছমেন বিৰাট কোহলীয়েও ইতিহাস সৃষ্টিৰ সুযোগ লাভ কৰিব।
দিবা-নৈশ টেষ্ট মেচত শতক অৰ্জন কৰা একমাত্ৰ ভাৰতীয় বেটছমেন বিৰাট কোহলী। ২০১৯ চনত বাংলাদেশৰ বিৰুদ্ধে তেওঁ এই কৃতিত্ব অৰ্জন কৰিছিল। এতিয়া পৰৱৰ্তী টেষ্ট মেচত আন এক উজ্জ্বল শতক অৰ্জন কৰাৰ সোণালী সুযোগ বিৰাটৰ হাতত।
পাৰ্থ টেষ্ট মেচতো বিৰাটে শতক অৰ্জন কৰে। একে সময়তে যদি এডিলেইড টেষ্ট মেচত বিৰাটে শতক অৰ্জন কৰিবলৈ সফল হয়, তেন্তে তেওঁ ভিভিয়ান ৰিচাৰ্ডছ আৰু ব্রায়ান লাৰাৰ দৰে কিংবদন্তিক পিছ পেলাই ৰেকৰ্ড গঢ়িব।
উল্লেখ্য যে, এডিলেইড অভালত সৰ্বাধিক টেষ্ট ৰান সংগ্ৰহৰ অভিলেখ ৱেষ্ট ইণ্ডিজৰ মহান বেটছমেন ব্রায়ান লাৰাৰ হাতত আছে। এই খেলপথাৰত ব্ৰায়ানে ৬১০ ৰান সংগ্ৰহ কৰিছে। এই তালিকাত তেওঁৰ পিছতে আছে ভিভিয়ান ৰিচাৰ্ডছ। এই খেলপথাৰত ভিভিয়ানে টেষ্টত ৫৫২ ৰান সংগ্ৰহ কৰিছে।
তালিকাৰ তৃতীয়ত বিৰাট। এই খেলপথাৰতে বিৰাট কোহলীয়ে ৫০৯টা টেষ্ট ৰাণ সংগ্ৰহ কৰিছে। এনে পৰিস্থিতিত যদি এডিলেইডত বিৰাটে ১০১ ৰান কৰে তেন্তে তেওঁ এই দুয়োগৰাকী খেলুৱৈকে পিছ পেলাই ৰেকৰ্ড গঢ়িব।
ইয়াৰ উপৰিও বিৰাট কোহলী পিংক বল টেষ্টত ৩০০ ৰান সংগ্ৰহ কৰা প্ৰথমজন ভাৰতীয় বেটছমেন হোৱাৰ দিশে। এডিলেইডত যদি বিৰাটে মাথো ২৩ ৰানো কৰে তেন্তে তেওঁ এই কৃতিত্ব অৰ্জন কৰা প্ৰথমজন ভাৰতীয় হিচাপে পৰিগণিত হ’ব। বৰ্তমানে বিৰাটৰ মুঠ ৰান ২৭৭। তালিকাৰ দ্বিতীয়ত ৰোহিত শৰ্মা- ১৭৩ ৰান, তৃতীয়ত শ্ৰেয়াছ আয়াৰ- ১৫৫ ৰান।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
