‘মন্নত’ৰ ৰূপ সলাব শ্বাহৰুখে, খৰচ কৰিব ২৫ কোটি
বলীউডৰ বাদশ্বাহ শ্বাহৰুখ খান যিমানেই জনপ্ৰিয়, তেখেতৰ ঘৰ ‘মন্নতো’ সমানেই জনপ্ৰিয়। শ্বাহৰুখৰ কোনো অনুৰাগী যেতিয়াই মুম্বাইলৈ যায় তেতিয়াই তেওঁৰ বাবে মন্নত ভ্ৰমণ কৰাটো ভ্ৰমণৰ তালিকাত আহি পৰে।
সেই মন্নতক লৈয়ে এটা ডাঙৰ খবৰ ওলাইছে। এতিয়া শ্বাহৰুখ খানৰ মান্নাত হয়তো আগৰ তুলনাত আৰু অধিক ডাঙৰ আৰু বিলাসী হ’ব। অভিনেতাগৰাকীয়ে এতিয়া মন্নতত কিছু পৰিৱৰ্তন কৰিবলৈ সাজু হৈছে। কোটি টকা খৰচ কৰি তেওঁ এই বাংলোটোক আৰু অধিক সুন্দৰ কৰি তুলিব বুলি খবৰ ওলাইছে।
সদৰি হোৱা মতে, শ্বাহৰুখ খানে নিজৰ বাংলো মান্নাতত দুটা নতুন মহলা নিৰ্মাণৰ পৰিকল্পনা কৰিছে। এই বাংলোটোত ইতিমধ্যে ২টা বেছমেণ্ট, ১টা গ্ৰাউণ্ড মহলা আৰু ৬টা মহলা আছে। একে সময়তে এতিয়া বাতৰি অনুসৰি অভিনেতাগৰাকীয়ে এই ঘৰটোত আৰু ২টা মহলা নিৰ্মাণ কৰিব বিচাৰিছে আৰু ইয়াৰ বাবে তেওঁৰ পত্নী গৌৰী খানে মহাৰাষ্ট্ৰ উপকূলীয় মণ্ডল ব্যৱস্থাপনা কৰ্তৃপক্ষৰ ওচৰত আবেদনো দাখিল কৰিছে।
গৌৰী খানে দাখিল কৰা আবেদনত আৰু দুটা মহলা তথা ৬১৬.০২ বৰ্গমিটাৰ এলেকা যোগ কৰাৰ কথা উল্লেখ কৰিছে। উল্লেখ্য যে, ২০০১ চনত শ্বাহৰুখ খানে এই ঘৰটো ক্ৰয় কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
