৩৬ ঘণ্টাৰ ভিতৰত ৩ গৰাকীকৈ পাকিস্তানী ক্ৰিকেটাৰৰ সন্যাস, ত্ৰাসৰ সৃষ্টি কৰিছিল খেলপথাৰত
পাকিস্তান ক্ৰিকেটত অৱসৰৰ ধাৰা বন্ধ হোৱাৰ কোনো লক্ষণ দেখা পোৱা নাই। মাথো ৩৬ ঘণ্টাৰ ভিতৰতে এইবাৰ তিনিনম্বৰ গৰাকী খেলুৱৈয়ে ল’লে খেলৰ পৰা বিদায়। অল ৰাউণ্ডাৰ ইমাদ ৱাছিম আৰু বেগী বলাৰ মহম্মদ আমিৰৰ পিছত এইবাৰ সাত ফুট এক ইঞ্চি উচ্চতাৰ বেগী বলাৰ মহম্মদ ইৰফানে আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰে।
বলৰ বেগ আৰু উচ্চতাৰ বাবে সদায়ে খেলপথাৰত ত্ৰাসৰ সৃষ্টি কৰা মহম্মদ ইৰফালে নিজৰ অৱসৰ সন্দৰ্ভত ছ’চিয়েল মিডিয়াত শ্বেয়াৰ কৰে।
অৱশ্যে ইৰফানৰ অৱসৰৰ বাবে পাকিস্তানে কোনো বিশেষ সমস্যাৰ সন্মুখীন নহ’ব। দীৰ্ঘদিন ধৰি দলৰ পৰা আঁতৰত আছে ইৰফান। শেহতীয়াকৈ তেওঁ খান ৰিচাৰ্চ লেবৰেটৰীক প্ৰতিনিধিত্ব কৰি ৰাষ্ট্ৰপতি কাপত অংশগ্ৰহণ কৰিছিল। এইখন পাকিস্তানী লিষ্ট এ প্ৰতিযোগিতা।
এইগৰাকী ওখ বাওঁহতীয়া বলাৰ আটাইতকৈ ওখ আন্তঃৰাষ্ট্ৰীয় ক্ৰিকেটাৰ হিচাপেও বিবেচিত হৈছে। টেষ্ট, এদিনীয়া আৰু টি-২০ত ৮৬ বাৰ নিজৰ দেশক প্ৰতিনিধিত্ব কৰিছিল ইৰফানে।
ইৰফানে পোষ্ট শ্বেয়াৰ কৰি লিখিছে- “মই আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ সিদ্ধান্ত লৈছো। মই মোৰ সতীৰ্থ, প্ৰশিক্ষকসকলক ধন্যবাদ জনাইছো। মৰম, উৎসাহ আৰু অবিস্মৰণীয় স্মৃতিৰ বাবে ধন্যবাদ। মোক সকলো দিয়া খেলক মই সমৰ্থন আৰু উদযাপন কৰি যাম।”
বিশাল শৰীৰেৰে দ্ৰুত গতিত বলিং কৰিবলৈ সক্ষম ইৰফানে নিজৰ সময়ৰ শ্ৰেষ্ঠ বেটিং লাইন আপৰ বাবেও সমস্যাৰ সৃষ্টি কৰিছিল। অৱশ্যে আঘাতে তেওঁক বহুত অশান্তি দিয়ে। যাৰ বাবে দীৰ্ঘ সময়ৰ পৰা দলৰ পৰা আঁতৰি থাকিবলৈ বাধ্য হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
