এটা সময় আছিল যেতিয়া দুই দেশৰ মাজত বাণিজ্যিক সম্পৰ্ক আছিল উল্লেখনীয়৷ কঠিন পৰিস্থিতি সত্ত্বেও এবিধ সামগ্ৰীক লৈ ভাৰতে সদায়ে নতশিৰ হৈ আহিছিল পাকিস্তানৰ ওচৰত৷ সেয়া হৈছে ৰক ছল্ট৷ ভাৰতত ৰক ছল্ট উৎপাদন নহয়৷ ফলস্বৰূপে ইয়াৰ চাহিদা পূৰণৰ বাবে প্ৰায় সম্পূৰ্ণৰূপে পাকিস্তানৰ ওপৰত নিৰ্ভৰ কৰিব লাগে৷ এই ৰক ছল্ট মূলত পঞ্জাৱ প্ৰদেশৰ ঝিলম জিলাত অৱস্থিত বিখ্যাত খেওড়া নিমখৰ খনিৰ পৰা উৎপাদন কৰা হয়৷ বিশ্বৰ দ্বিতীয় বৃহত্তম এই খনিৰ পৰা বছৰি প্ৰায় ৪,৫০,০০০ টন ৰক ছল্ট উৎপাদিত হয়৷
ৰক ছল্ট বা হিমালয়ান নিমখ এবিধ প্ৰাকৃতিক অপ্ৰক্ৰিয়াজাত নিমখ যি অতি স্বাস্থ্যকৰ বুলি বিবেচিত হয়৷ আয়ুৰ্বেদ অনুসৰি এই নিমখ অতি উন্নতমানৰ৷ ইয়াত শৰীৰৰ বাবে প্ৰয়োজনীয় ৯২বিধ বিশেষ উপাদান থাকে৷ তাৰমাজত থাকে হজম, ৰোগ প্ৰতিৰোধ ক্ষমতা বৃদ্ধি, চাপ উপশম আৰু শ্বাসকষ্টজনিত সমস্যাৰ সমাধান৷ পাকিস্তানত এই ৰক ছল্টৰ দাম প্ৰতি কিঃগ্ৰাঃত আনুমানিক ২-৩ টকা হলেও ভাৰতত এই নিমখ প্ৰতি কিঃগ্ৰাঃত ৫০-৬০ টকাকৈ বিক্ৰি হয়৷
২০১৮-২০১৯ চনত ভাৰতলৈ পাকিস্তানৰ পৰা ৯৯.৭শতাংশ ৰক ছল্ট আমদানি কৰা হৈছিল৷ ভাৰত-পাকিস্তানৰ কূটনৈতিক সম্পৰ্কৰ খেলিমেলিৰ বাবে ভাৰতে বিকল্প উৎস বিচাৰিবলৈ আৰম্ভ কৰে৷ তাৰপিছতেই সংযুক্ত আৰৱ আমিৰ, ইৰাণ, মালয়েছিয়া, জাৰ্মানি, আফগানিস্তান, তুৰস্ক আৰু অষ্ট্ৰেলিয়াৰ পৰা এই ৰক ছল্ট ভাৰতে আমদানি কৰে৷
তথ্য অনুসৰি ভাৰতে পূৰ্বে আট্টাৰি স্থলবন্দৰেৰে পাকিস্তানৰ পৰা ছয়াবিন, হাঁহা-মুৰ্গিৰ দানা, শাকপাচলি, ৰঙা জলকীয়া, প্লাষ্টিকৰ দানা আৰু প্লাষ্টিকৰ সুঁতাৰ দৰে সামগ্ৰী ৰপ্তানী কৰিছিল৷ শুকান ফল, খেজুৰ, জিপছাম, চিমেণ্ট, কাঁচ, ৰক ছল্ট আৰু ভেষজসহ বহু পণ্য আমদানি কৰিছিল ভাৰতে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
