ৰাজ্যত শিহৰণকাৰী ঘটনা, ৫২ যাত্ৰী ভৰ্তি বাছ বাগৰিল পুখুৰীত
ৰাজ্যত সংঘটিত হৈছে এক অতিকে শিহৰণকাৰী ঘটনা। ৫২ যাত্ৰী ভৰ্তি এখন বাছ বাগৰি পৰে পথৰ কাষৰ এটা পুখুৰীত। এই শিহৰণকাৰী দুৰ্ঘটনাটো সংঘটিত হৈছে কলগাছিয়াৰ হালধীয়াত।
নিয়ন্ত্ৰণ হেৰুৱাই পথৰ কাষত থকা পুখুৰীত বাগৰি পৰে যাত্ৰীবাহী বাছ খন । AS01C C8189 নম্বৰৰ যাত্ৰীবাহী বাছখনে যাত্ৰী লৈ বৰপেটা ৰোডৰ পৰা কলগাছিয়া অভিমুখে যাত্ৰা কৰি আছিল।
কিন্তু বাছ খনে হঠাতে নিয়ন্ত্ৰণ হেৰুৱাই বাটৰ কাষৰ পুখুৰীত বাগৰি পৰে। লগে লগে হুৱাদুৱা লাগি যায় সকলো ফালে। প্ৰত্যক্ষদৰ্শী লোকে লগে লগে বাছৰ যাত্ৰীক উদ্ধাৰৰ বাবে পুখুৰীত জপিয়াই পৰাৰ লগতে আৰক্ষীকো খবৰ কৰে।
খবৰ লাভ কৰাৰ কিছু সময়ৰ ভিতৰতেই ঘটনাস্থলীত প্ৰশাসনৰ লোক উপস্থিত হয় আৰু স্থানীয় ৰাইজৰ তৎপৰতাত যাত্ৰী সকলক উদ্ধাৰ কৰি কলগাছিয়া অসামৰিক চিকিৎসালত ভৰ্তি কৰে। কেইবাগৰাকীৰো অৱস্থা কিছু সংকটজনক।
বাছখনত প্ৰায় ৫২ গৰাকীমান যাত্ৰী আছিল । এতিয়ালৈ কোনো যাত্ৰী মৃত্যুমুখত পৰা নাই যদিও এগৰাকী কণমানিক এতিয়াও উদ্ধাৰ কৰিবলৈ সক্ষম হোৱা নাই বুলি সন্দেহ প্ৰকাশ কৰিছে ৰাইজে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
