শৰীৰত বাঁহ বান্ধিছে কৰ্কটে৷ মাৰণৰোগে তেওঁক কিন্তু মৃত্যুমুখী কৰাৰ বিপৰীতে যেন জীৱনমুখীহে কৰি তুলিছে৷ চিকিৎসা চলি থকাৰ মাজতো তেওঁ কৰ্মত বিৰতি লোৱা নাই৷ যন্ত্ৰণাৰ কোনো ছবিয়েই হীনাই জনমানসক দেখুৱাব খোজা নাই৷ মাৰণ ৰোগৰ সৈতে চলি থকা তেওঁৰ যুঁজৰ ছবি মাজে মাজে সামাজিক মাধ্যমত ভগাই লৈছে হীনাই৷ তাৰমাজতেই চলি থকা কামৰ খাতিয়ানো তেওঁ দি গৈছে ছচিয়েল মিডিয়াত৷ আৰু কৰ্কটৰ সৈতে যুদ্ধৰ মাজতেই এইবাৰ জীৱনৰ আন এক ডাঙৰ সিদ্ধান্ত ল’লে হীনাই৷ তেওঁৰ দীৰ্ঘদিনীয়া প্ৰেমিক ৰকি জয়ছোৱালৰ সৈতে বিবাহপাশত আৱদ্ধ হয় হীনা খান৷
কলকাতাৰ ব্যৱসায়ী পৰিয়ালৰ সন্তান ৰকি জয়ছোৱালৰ সৈতে বহুদিনৰ সম্পৰ্ক হীনা খানৰ৷ নিজক একেবাৰে পাৰফেক্ট প্ৰেমিক হিচাপে প্ৰমাণ কৰিছে ৰকিয়ে৷ কৰ্কটত আক্ৰান্ত হৈ থকা হীনাৰ কাষত প্ৰতিমুহূৰ্ততে থিয় দি আছে প্ৰেমিক ৰকিয়ে৷ প্ৰেয়সীৰ মনোবল তেওঁ কোনোদিনে কমিবলৈ দিয়া নাই৷ শেহতীয়াকৈ হীনাৰ সৈতে মক্কা যাত্ৰাতো অংশগ্ৰহণ কৰিছে ৰকিয়ে৷ সেই প্ৰেমিকযুগলেই অৱশেষত বিবাহ বান্ধোনত আৱদ্ধ হৈছে৷
কোনো ধৰ্মীয় আচাৰ নহয়, একেবাৰে সাধাৰণভাৱে কেৱল আইনীমতে বিয়া কৰাইছে তাৰকা যুগলে৷ দুজনেই পৰিধান কৰিছে একে ৰঙৰ পোছাক৷ হাতত হীৰাৰ আঙুঠি৷ ইনষ্টাগ্ৰামত শুভক্ষণৰ বিভিন্ন ছবি শ্বেয়াৰ কৰি হিনাই লিখিছে, ‘দুখন পৃথক জগতৰ পৰা আহি আমি ভালপোৱাৰে এখন বিশ্ব তৈয়াৰ কৰিছো৷ আমাৰ পাৰ্থক্যসমূহ ম্লান হৈ গৈছে৷ আমাৰ হৃদয় একলগ হৈছে৷ আমি আজীৱনৰ বাবে এক হলো৷’
২০০৯ চনত ইয়ে ৰিস্তা ক্যা কেহলাতা হে’ৰ চেটত প্ৰথম দেখা হৈছিল ৰকি-হীনাৰ৷ এই ধাৰাবাহিকৰ প্ৰযোজক আছিল ৰকি৷ ষ্টাৰ প্লাছৰ ধাৰাবাহিকৰ হাতত ধৰিয়েই কলকাতাৰ লৰা ৰকিক নিজৰ মন দি পেলাই কাশ্মীৰৰ কন্যা হীনাই৷ এসময়ত বহুতেই ৰকি আৰু হীনাৰ বিবাহত অন্তৰায় হৈছিল ধৰ্ম বুলি মন্তব্যও কৰিছিল৷ তাৰ মাজতেই হীনাৰ কৰ্কট ৰোগে আকৌ এই সম্পৰ্কলৈ কঢ়িয়াই আনে এজাক দুখৰ ধুমুহা৷ সেই ধুমুহা ক্ষন্তেক ক্ষাম কটাৰ সময়তেই জীৱনৰ আটাইতকৈ ডাঙৰ সিদ্ধান্তটো গ্ৰহণ কৰিছে ৰকি আৰু হীনাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
