দক্ষিণাত্যৰ ‘পেড্ডী’ত আচিয়াম্মা নামৰ চৰিত্ৰটোত অভিনয় কৰিছে শ্ৰীদেৱী তনয়া জাহ্নৱী কাপুৰে। জাহ্নৱী কাপুৰৰ চৰিত্ৰটো সন্দৰ্ভত সম্প্ৰতি সামাজিক মাধ্যমত ব্যাপক সমালোচনাৰ সন্মুখীন হৈছে ‘পেড্ডী’। সমালোচনাৰ মূল কাৰণ হৈছে, ছবিখনত জাহ্নৱী কাপুৰৰ শৰীৰ প্ৰদৰ্শন। সমাজিক মাধ্যমত ছবিখনৰ পৰিচালকক সমালোচনা কৰি বহুতেই মন্তব্য কৰিছে যে জাহ্নৱী কাপুৰৰ অভিনয়তকৈ তেওঁৰ শৰীৰটোকহে ছবিখনত অধিক প্ৰদৰ্শন কৰা হৈছে। চলচ্চিত্ৰ সমালোচক মহৰ্ষিয়ে এই সন্দৰ্ভত কয় যে- ছবিখনৰ ট্ৰেইলাৰত জাহ্নৱীক দেখি আমি আশা কৰিছিলোঁ যে তেওঁ সামান্থাৰ দৰে এক শক্তিশালী চৰিত্ৰত অভিনয় কৰিব। তেওঁ লগতে কয়- ছবিখনৰ প্ৰথমাৰ্ধত জাহ্নৱীয়ে অতি কম সময়ৰ বাবেহে স্ক্ৰীনত দেখা দিয়ে। জাহ্নৱীৰ চৰিত্ৰটোৱে ছবিখনৰ কাহিনীত বিশেষ প্ৰভাৱ পেলোৱা দেখা নগ’ল। জাহ্নৱীৰ চৰিত্ৰটো নহলেও ছবিখনৰ কাহিনীত একো ক্ষতি নহ’ল বুলি চলচ্চিত্ৰ সমালোচকজনে মন্তব্য কৰে। ছবিখনত জাহ্নৱী কাপুৰক কেৱল সৌন্দৰ্য প্ৰদৰ্শন কৰাৰ উদ্দেশ্যেৰেহে লোৱা যেন অনুভৱ হৈছে বুলি মন্তব্য কৰে সমালোচকজনে। ছবিখনৰ শেষৰ ফালে দুই এটা দৃশ্যতহে তেওঁক শাৰী পিন্ধা অৱস্থাত দেখুওৱা হৈছে বুলিও তীব্ৰ সমালোচনা কৰে মহৰ্ষিয়ে। ‘ৱৰানিকি ভেইয়ি’ গীতটোত নায়কজনৰ সৈতে নৃত্য কৰা শ্ৰুতি হাছানক দেখি ঈৰ্ষান্বিত হৈ তেওঁ প্ৰতিযোগিতাৰ মানসেৰে নিজৰ ওৰণিখন মঞ্চত পেলাই দিয়া কাৰ্যও দৃষ্টিকটু হৈছে বুলি মন্তব্য কৰে।
সামাজিক মাধ্যমত ‘পেড্ডী’ৰ পৰিচালকক তীব্ৰ সমালোচনা
ইপিনে সামজিক মাধ্যমত ছবিখনৰ সমালোচনা কৰি একাংশই লিখিছে যে-‘যদি আপুনি কাৰোবাৰ চকু আৰু ওঁঠৰ সৌন্দৰ্যৰ প্ৰশংসা কৰিছে, তেন্তে তেওঁৰ কঁকাল দেখুওৱাৰ প্ৰয়োজন কি?’ এজন ব্যৱহাৰকাৰীয়ে লিখিছে, ‘এটা দৃশ্যত ৰাম চৰণে জাহ্নৱী কাপুৰৰ প্ৰশংসা কৰিছে। দৃশ্যটোত যেতিয়া জাহ্নৱীৰ চকু থৰ হৈ যায়, তেতিয়াও কেমেৰাই বুকুৰ অংশ দেখুৱায়। যেতিয়া তেওঁ ওঁঠৰ বৰ্ণনা কৰে, তেতিয়া কঁকালৰ অংশ দেখুওৱা হয়। দৃশ্যটো সম্পাদনা কৰা সম্পাদকজনে, কেমেৰামেনজনে আৰু পৰিচালকজনে সঁচাকৈয়ে নাজানে নেকি কোনো এগৰাকী মহিলাৰ চকু আৰু ওঁঠ ক’ত থাকে?’ সূত্ৰ অনুসৰি, জাহ্নৱী কাপুৰ নিজেও এই চৰিত্ৰটোক লৈ সন্তুষ্ট নাছিল। এক প্ৰতিবেদন অনুসৰি, জাহ্নৱী কাপুৰে নিজৰ ইনষ্টাগ্ৰামৰ জৰিয়তে ‘পেড্ডী’ক লৈ লিখা ‘ভাৰতীয় চলচ্চিত্ৰৰ ইতিহাসত এগৰাকী নায়িকাৰ ওপৰত সংঘটিত এক নিৰ্মম অপমান’ শীৰ্ষক এটা সমালোচনামূলক লেখাক সমৰ্থন কৰিছিল। সামাজিক মাধ্যমত জাহ্নৱীৰ অভিনয়ৰ সমৰ্থন আৰু বিৰোধিতা দুয়ো দিশতে তৰ্ক-বিতৰ্ক আৰম্ভ হোৱাৰ পিছতে তেওঁ সেই পোষ্টটোৰ পৰা নিজৰ ‘সমৰ্থন’ আঁতৰাই দিয়ে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
