আমেৰিকাৰ উপ-ৰাষ্ট্ৰপতি জে ডি ভেন্সৰ পত্নী ঊষা ভেন্সে শেহতীয়াকৈ দিয়া এক সাক্ষাৎকাৰত স্পষ্টকৈ কৈছে যে তেওঁ কেতিয়াও হিন্দু ধৰ্ম এৰি কেথলিক খ্ৰীষ্টান হোৱাৰ প্ৰয়োজন অনুভৱ কৰা নাই। হিন্দু পৰিয়ালত ডাঙৰ-দীঘল হোৱা উষাই কয় যে-তেওঁৰ শৈশৱ আৰু পাৰিবাৰিক জীৱন সুখী, স্থিৰ আৰু মূল্যবোধেৰে সমৃদ্ধ আছিল। সেয়েহে নতুন কোনো ধৰ্মীয় পথ বিচাৰি ফুৰাৰ প্ৰয়োজন তেওঁ কেতিয়াও অনুভৱ কৰা নাই। উল্লেখযোগ্য যে বৰ্তমানৰ মাৰ্কিন উপ ৰাষ্ট্ৰপতি জে ডি ভেন্সে ২০১৯ চনত কেথলিক ধৰ্ম গ্ৰহণ কৰিছিল। ইয়াৰ আগতে তেওঁ নিজকে নাস্তিক বুলি গণ্য কৰিছিল। বিয়াৰ পিছত তেওঁ খ্ৰীষ্টান ধৰ্মৰ প্ৰতি আকৃষ্ট হয় আৰু পৰৱৰ্তী সময়ত কেথলিক বিশ্বাস গ্ৰহণ কৰে। কিছুদিন পূৰ্বে ভেন্সে এটা অনুষ্ঠানত নিজৰ মনৰ ভাব ব্যক্ত কৰি কৈছিল যে- এদিন তেওঁৰ পত্নীও হয়তো তেওঁৰ আধ্যাত্মিক পথ অনুসৰণ কৰিব। এই মন্তব্যক কেন্দ্ৰ কৰি আমেৰিকাত ব্যাপক আলোচনা হৈছিল। বহু মাৰ্কিন নাগৰিকে ভেন্সৰ এই ব্যক্তব্য়ক ধৰ্ম পৰিৱৰ্তনৰ বাবে হেঁচা প্ৰয়োগ কৰা বুলি অভিযোগ কৰিছিল
ঊষা ভেন্সৰ নিজৰ ধৰ্মক লৈ কি মন্তব্য?
মাৰ্কিন উপ ৰাষ্ট্ৰপতি জে ডি ভেন্সৰ এই ব্যক্তব্যৰ পিছতে পত্নী ঊষাই শেহতীয়াকৈ এটা সাক্ষাৎকাৰত বিষয়টো স্পষ্ট কৰি কয় যে-তেওঁৰ স্বামী কেথলিক বিশ্বাসৰ প্ৰচাৰক হ’ব বিচাৰিলেও তেওঁক ধৰ্মান্তৰিত হ’বলৈ কোনো ধৰণৰ চাপ নিদিয়ে। তেওঁ লগতে কয়-মই এটা সুখী হিন্দু পৰিয়ালত ডাঙৰ-দীঘল হৈছোঁ। মোৰ জীৱনত কেতিয়াও এনে অনুভৱ হোৱা নাই যে আন কিবা বিচাৰিব লাগিব। বৰ্তমান ঊষা ভেন্সে চতুৰ্থ সন্তানৰ মাতৃ হ’বলৈ গৈ আছে। ইয়াৰ মাজতে তেওঁ নিজৰ ধৰ্মীয় আৰু সাংস্কৃতিক পৰিচয় অক্ষুণ্ণ ৰাখিবলৈ বদ্ধপৰিকৰ বুলি পুনৰবাৰ জনাইছে। বহু ৰাজনৈতিক বিশ্লেষক আৰু সমাজবিজ্ঞানীয়ে ঊষাৰ এই মন্তব্যক তেওঁৰ আত্মবিশ্বাস, ব্যক্তিত্ব আৰু নিজৰ শিপাৰ প্ৰতি থকা গৌৰৱবোধৰ প্ৰতিফলন বুলি মন্তব্য কৰিছে।
ঊষাৰ ব্যক্তিগত সিদ্ধান্তক সন্মান জে ডিৰ
ঊষা ভেন্স আমেৰিকাৰ এগৰাকী সফল অধিবক্তা। ভাৰতীয় মূলৰ সন্তান ঊষাৰ লালন-পালন হৈছিল আমেৰিকাৰ দক্ষিণ কেলিফৰ্ণিয়াত। ঊষাই নিজৰ সন্তানকো হিন্দু সংস্কৃতি, উৎসৱ আৰু পৰম্পৰাৰ সৈতে পৰিচয় কৰাই দিছে যদিও তেওঁলোক কেথলিক পৰম্পৰাৰ সৈতেও পৰিচিত। ইফালে জেডি ভেন্সৰ নতুন গ্ৰন্থ Communion: Finding My Way Back to Faith-ত তেওঁ নিজৰ নাস্তিকতাৰ পৰা কেথলিক ধৰ্মলৈ হোৱা যাত্ৰাৰ বিষয়ে বিস্তৃতভাৱে লিখিছে।
তেওঁ স্বীকাৰ কৰিছে যে জীৱনৰ কঠিন অভিজ্ঞতা আৰু পাৰিবাৰিক দায়িত্বই তেওঁক ধৰ্মৰ দিশে আকৃষ্ট কৰিছিল। যদিও তেওঁ নিজৰ বিশ্বাসক গুৰুত্ব দিয়ে, তথাপিও ঊষাৰ ব্যক্তিগত ধৰ্মীয় স্বাধীনতাক সন্মান জনাই আহিছে। সামগ্ৰিকভাৱে ঊষা ভেন্সৰ এই বক্তব্যই এটা স্পষ্ট বাৰ্তা দিছে—বৈবাহিক জীৱনত ভিন্ন ধৰ্মীয় বিশ্বাস থাকিলেও পাৰস্পৰিক সন্মান, বুজাবুজি আৰু ব্যক্তিগত স্বাধীনতাৰ জৰিয়তে সুস্থ সম্পৰ্ক গঢ়ি তোলা সম্ভৱ। নিজৰ হিন্দু পৰিচয়ক লৈ ঊষাৰ আত্মবিশ্বাসে বহু লোকৰ দৃষ্টি আকৰ্ষণ কৰিছে আৰু আন্তঃধৰ্মীয় সম্প্ৰীতিৰ এক উল্লেখযোগ্য উদাহৰণ হিচাপে আলোচনা লাভ কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
