মাৰ্কিন উপ-ৰাষ্ট্ৰপতি জে ডি ভেঞ্চ আৰু পত্নী তথা দেশখনৰ ছেকেণ্ড লেডী উষা ভেঞ্চে শেহতীয়াকৈ এটি পুত্ৰ সন্তানৰ জন্ম দিছে। দেওবাৰে জন্ম হোৱা তেওঁলোকৰ চতুৰ্থ সন্তানটিৰ নাম ৰাখিছে এলেক নীল ভেঞ্চ। ইয়াৰ পূৰ্বে দম্পতীটোৰ তিনিটা সন্তান আছে— ৯ বছৰীয়া ইভান, ৬ বছৰীয়া বিবেক আৰু ৪ বছৰীয়া মিৰাবেল। নীলৰ জন্মৰ লগে লগে আমেৰিকাৰ ইতিহাসত প্ৰায় ১৫৬ বছৰৰ পাছত প্ৰথমবাৰৰ বাবে দায়িত্বত থকা অৱস্থাত এজন আমেৰিকান উপ-ৰাষ্ট্ৰপতিৰ ঘৰত সন্তানৰ জন্ম হৈছে। জে ডি ভেঞ্চ আৰু উষা ভেঞ্চে ছ’চিয়েল মিডিয়াত সদৰী কৰে সন্তান জন্মৰ এই সু-খবৰ। উষা ভেঞ্চে ৱাল্টাৰ ৰিড নেশ্যনেল মিলিটাৰী মেডিকেল চেণ্টাৰত শিশুটোৰ জন্ম দিয়ে। জে ডি ভেঞ্চে ছচিয়েল মিডিয়াযোগে চিকিৎসালয়খনৰ চিকিৎসক আৰু কৰ্মচাৰীসকলৰ লগতে হোৱাইট হাউছৰ চিকিৎসা দলকো তেওঁলোকৰ যত্ন আৰু সহযোগিতাৰ বাবে ধন্যবাদ জ্ঞাপন কৰিছে।
১৫৬ বছৰৰ পাছত এই ঘটনা
আমেৰিকান সংবাদমাধ্যম চিবিএছ নিউজৰ তথ্য অনুসৰি, আধুনিক আমেৰিকাৰ ইতিহাসত প্ৰথমবাৰৰ বাবে দায়িত্বত থকা এজন উপ-ৰাষ্ট্ৰপতিৰ পৰিয়ালত সন্তানৰ জন্ম হৈছে। প্ৰতিবেদন মতে, ইয়াৰ আগতে ১৮৭০ চনত তদানীন্তন উপ-ৰাষ্ট্ৰপতি শুইলাৰ ক’লফেক্স জুনিয়ৰ আৰু তেওঁৰ পত্নী এলেন ক’লফেক্সৰ এটি পুত্ৰ সন্তান জন্ম হৈছিল। তাৰো আগতে ১৮২৯ চনত তদানীন্তন উপ-ৰাষ্ট্ৰপতি জন চি. কেলহুন আৰু তেওঁৰ পত্নীৰ ঘৰত সন্তান জন্ম হৈছিল। উপ-ৰাষ্ট্ৰপতি হিচাপে দায়িত্ব পালন কৰি থকা সময়ছোৱাত চতুৰ্থবাৰৰ বাবে পিতৃ হোৱা জে. ডি. ভেঞ্চলৈ দেশ-বিদেশৰ বহু বিশিষ্ট ব্যক্তি, ৰাজনীতিবিদ আৰু শুভাকাংক্ষীয়ে অভিনন্দন আৰু শুভেচ্ছা জ্ঞাপন কৰিছে।
আমেৰিকান দম্পতীসকলক অধিক সন্তান জন্ম দিয়াৰ আহ্বান
জে ডি ভেঞ্চে ৰাজনৈতিক জীৱনত পৰিয়াল আৰু সন্তান জন্মৰ বিষয়টো সদায় গুৰুত্ব সহকাৰে উত্থাপন কৰি আহিছে। তেওঁ একাধিক ভাষণত আমেৰিকান দম্পতীসকলক অধিক সন্তান জন্ম দিয়াৰ আহ্বান জনাইছে। ২০২৫ চনত অনুষ্ঠিত গ*ৰ্ভপাত-বিৰোধী ‘March for Life’ সমাৱেশত ভাষণ দি তেওঁ কৈছিল, “মই বিচাৰো যে আমেৰিকাত অধিক শিশুৰ জন্ম হওক।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
