মূৰত ওকনি হোৱাটো শিশু আৰু প্ৰাপ্তবয়স্ক উভয়ৰে মাজত এক সাধাৰণ সমস্যা। ই মূৰৰ ছালত খজুৱতি, অস্বস্তি আৰু কেতিয়াবা সংক্রমণৰো সৃষ্টি কৰিব পাৰে। স্বাস্থ্য বিশেষজ্ঞসকলৰ মতে, সঠিক পৰিষ্কাৰ-পৰিচ্ছন্নতা আৰু উপযুক্ত চিকিৎসাৰ জৰিয়তে এই সমস্যাৰ পৰা সহজে মুক্তি পাব পাৰি। ওকনিৰ বাবে মূৰত খজুৱতি, অস্বস্তি আৰু কেতিয়াবা ছালত জ্বলা-পোৰাও হ'ব পাৰে। বিশেষজ্ঞসকলে কয় যে, ঘৰুৱা যত্নৰ লগতে প্ৰয়োজন হ'লে চিকিৎসকৰ পৰামৰ্শ লোৱাটো আটাইতকৈ নিৰাপদ উপায়।বিশেষজ্ঞসকলৰ মতে, ওকনি দূৰ কৰিবলৈ ঔষধযুক্ত এণ্টি-লাইচ শ্বেম্পু বা লোচন ব্যৱহাৰ কৰিব লাগে। ঔষধ ব্যৱহাৰৰ পিছত ফনীৰে চুলি ভালদৰে আঁচুৰি মৃত ওকনি আৰু কণী আঁতৰোৱাটো অত্যন্ত জৰুৰী। ইয়াৰ উপৰিও, ব্যৱহাৰ কৰা গামোচা, গাৰু আৰু বিচনাৰ চাদৰ গৰম পানীত ধুই শুকুৱাব লাগে। সৰিয়হৰ তেলত কর্পূৰ মিহলাই বা নিমপাত পিহি মূৰত লগালে ওকনি সহজে মৰে। তদুপৰি, চিকিৎসালয় বা ফার্মাচীৰ পৰা ওকনি মৰা তেল বা শ্বেম্পু আনি ব্যৱহাৰ কৰিব পাৰি।চিকিৎসকসকলে পৰামৰ্শ দিয়ে যে, যদি সাধাৰণ চিকিৎসাৰ পিছতো সমস্যা থাকে বা মূৰৰ ছালত ঘাঁ, অধিক খজুৱতি বা সংক্রমণ দেখা দিয়ে, তেন্তে পলম নকৰি চিকিৎসকৰ পৰামৰ্শ ল’ব লাগে।
টিপচসমূহ
সূক্ষ্ম দাঁতৰ ফনী ব্যৱহাৰ কৰক।
নাৰিকল তেল ব্যৱহাৰ কৰিব পাৰে।
নিয়মীয়াকৈ চুলি ধুই পৰিষ্কাৰ ৰাখিলে ওকণিৰ বংশ কমাবলৈ সহায় কৰে।
ব্যক্তিগত সামগ্ৰী ভাগ-বতৰা নকৰিব, যেনে কাপোৰ, গামোচা, টুপী, গাৰু আদি।
ভুল নকৰিব
বহুলোকে কয় কেৰাচিন, পেট্ৰ’ল, ডিজেল, কীটনাশক বা আন ক্ষতিকাৰক ৰাসায়নিক পদাৰ্থ মূৰত ব্যৱহাৰ কৰিলে ওকনি কমে কিন্তু সেয়া নকৰিব। এইবোৰে ছাল আৰু স্বাস্থ্যৰ গুৰুতৰ ক্ষতি কৰিব পাৰে। যদি ঘৰুৱা উপায়ে ফল নিদিয়ে, বা মূৰত ঘাঁ, অধিক খজুৱতি বা সংক্রমণ দেখা দিয়ে, তেন্তে চিকিৎসকৰ পৰামৰ্শ অনুসৰি ঔষধযুক্ত এণ্টি-লাইচ শ্বেম্পু বা লোচন ব্যৱহাৰ কৰক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
