ধ*ৰ্ষণৰ অভিযোগত দিল্লী কেপিটেলছৰ ক্ৰিকেটাৰ অভিষেক পোৰেলক গ্ৰেপ্তাৰৰ নিৰ্দেশ

সময়ে সময়ে ক্ৰিকেটাৰসকলে বিভিন্ন অপৰাধৰ সৈতে জড়িত হৈ নিজৰ কেৰিয়াৰলৈ বিপদ কঢ়িয়াই আনে। বিশেষকৈ বিগত সময়ত ধ*ৰ্ষণৰ অভিযোগত দুই-এজন ক্ৰিকেটাৰে নিজৰেই কেৰিয়াৰলৈ ভাবুকি কঢ়িয়াই অনা বাতৰিয়ে সংবাদপত্ৰৰ শিৰোনাম দখল কৰিছিল। বিগত সময়ছোৱাত RCBৰ শিবিৰত থকা পেচ বলাৰ য়ছ দয়ালৰ বিৰুদ্ধেও মহিলাক শাৰীৰিক নি*ৰ্যাতনৰ অভিযোগ সন্দৰ্ভত ৰাষ্ট্ৰীয় সংবাদ মাধ্যমত বিভিন্ন বাতৰি প্ৰকাশ পাইছিল।

শেহতীয়াকৈ দিল্লী কেপিটেলছৰ নিৰ্ভৰযোগ্য উইকেটকীপাৰ বেটাৰ অভিষেক পোৰেলৰ বিৰুদ্ধেও ধ*ৰ্ষণৰ অভিযোগ উত্থাপিত হৈছে। ইতিমধ্যে কলকাতা উচ্চ ন্যায়ালয়ে অভিষেক পোৰেলক গ্ৰেপ্তাৰৰ নিৰ্দেশ দিছে। লগতে ভুক্তভোগীৰ অভিযোগৰ ভিত্তিত ব্যক্তিগত ফটো আৰু ভিডিঅ’ যাতে ৰাজহুৱা নহয়, সেই উদ্দেশ্যে পোৰেলৰ ইলেক্ট্ৰনিক ডিভাইচসমূহ জব্দ কৰিবলৈ আৰক্ষীক নিৰ্দেশ দিয়া হৈছে।

২৩ বছৰীয়া উইকেটকীপাৰ-বেটছমেন অভিষেক পোৰেলে বংগৰ হৈ ১১৬খন মেচ আৰু দিল্লী কেপিটেলছৰ হৈ ৩৫খন মেচ খেলিছে, তেওঁৰ বিৰুদ্ধে এগৰাকী মহিলাই বিৱাহৰ প্ৰতিশ্ৰুতি দি শাৰী*ৰিক সম্পৰ্ক স্থাপন কৰা, ব্যক্তিগত মুহূৰ্তসমূহৰ ভিডিঅ’ ৰেকৰ্ড কৰা আৰু পিছত ভাবুকি দিয়াৰ অভিযোগ উত্থাপন কৰিছে। দিল্লী কেপিটেলছে বিগত IPLত পোৰেলক ৪ কোটি টকাত দলত ৰিটেইন কৰিছিল। অভিযোগকাৰী মহিলাগৰাকীৰ এজাহাৰ অনুসৰি, ২০২৩ চনৰ জানুৱাৰীত তেওঁৰ সৈতে পোৰেলৰ চিনাকি হয়। মহিলাগৰাকীৰ অভিযোগ যে, পোৰেলে তেওঁক মংকুণ্ডুৰ ফ্লেটলৈ লৈ গৈ বিৱাহৰ আশ্বাস দি শাৰী*ৰিক সম্পৰ্ক স্থাপন কৰিছিল। পিছত তেওঁ জানিব পাৰে যে পোৰেলৰ আন কেইবাগৰাকীও মহিলাৰ সৈতে সম্পৰ্ক আছিল।

ভুক্তভোগী মহিলাগৰাকীয়ে এই অভিযোগো কৰিছে যে তেওঁক অবৈধভাৱে আৱদ্ধ কৰি ৰখা হৈছিল, খাবলৈ খাদ্য দিয়া হোৱা নাছিল আৰু শাৰীৰিক নিৰ্যাতনো কৰা হৈছিল। মহিলাগৰাকীয়ে লগতে অভিযোগ কৰে যে  ২০২৬ চনৰ ২ এপ্ৰিলত দিল্লীত সংঘটিত এক ঘটনাৰ পিছত তেওঁৰ শাৰীৰিক অৱস্থাৰ যথেষ্ট অৱনতি ঘটে আৰু তৎক্ষণাত চিকিৎসা গ্ৰহণ কৰিবলগীয়া হয়। লগতে অভিষেক পোৰেলে মহিলাগৰাকীক ফোন আৰু ছ’চিয়েল মিডিয়াৰ জৰিয়তেও ভাবুকি প্ৰদান কৰি অহাৰ অভিযোগ উত্থাপন কৰিছে।

উচ্চ ন্যায়ালয়ে গোচৰটো সন্দৰ্ভত মন্তব্য কৰে যে তদন্তকালত ক্ৰিকেটাৰজনৰ পৰা এটা পেন ড্ৰাইভ জব্দ কৰা হৈছে, য’ত গুৰুত্বপূৰ্ণ ডিজিটেল প্ৰমাণ থকাৰ সন্দেহ প্ৰকাশ কৰা হৈছে। ব্যক্তিগত তথ্য বা ভিডিঅ’ অধিক প্ৰচাৰ হোৱাটো ৰোধ কৰিবলৈ পোৰেলক গ্ৰেপ্তাৰ কৰি তেওঁৰ ইলেক্ট্ৰনিক ডিভাইচসমূহ জব্দ কৰাটো প্ৰয়োজনীয় বুলি আদালতে মত প্ৰকাশ কৰে। অভিষেক পোৰেলৰ বিৰুদ্ধে মহিলাগৰাকীয়ে ২৩ জুনত মোগৰা থানাত ৰুজু কৰিছিল গোচৰ। অৱশ্যে ক্ৰিকেটাৰ অভিষেক পোৰেলে তেওঁৰ বিৰুদ্ধে উত্থাপিত সকলো অভিযোগ অস্বীকাৰ কৰিছে।