কিছুদিনৰে পৰা বানে সৰ্বহাৰা কৰিছে উজনি অসমৰ লোকক। বৰষুণ আৰু নাগালেণ্ডৰ পৰা নামি অহা ঢলে উজনি অসমৰ শিৱসাগৰ, চৰাইদেউ আৰু যোৰহাটত সৃষ্টি কৰিছে ভয়ংকৰ বান পৰিস্থিতিৰ। বহু নদীৰ মথাউৰি ভাঙি বিভিন্ন অঞ্চল প্লাৱিত হৈছে। বানৰ ফলত ব্যাহত হৈ পৰিছে জনজীৱন।
বহু পৰিয়ালে আপোন ঘৰখন এৰি ওখ ঠাইত আশ্ৰয় ল’বলৈ বাধ্য হৈছে। ইফালে বিশুদ্ধ খোৱাপানী, খাদ্য আৰু চিকিৎসাৰ অভাৱেও বানাক্ৰান্ত লোকসকলৰ সমস্যা বৃদ্ধি কৰিছে। বিশেষকৈ বানৰ সময়ত বেছিকৈ যতন লব লাগে শিশু বৃদ্ধ আৰু মহিলাসকলে।
বানপানীৰ সময়ত স্বাস্থ্য আৰু পৰিচ্ছন্নতা ৰক্ষা কৰাটো যথেষ্ট কঠিন হৈ পৰে। বিশেষকৈ মাহেকীয়া (ঋতুস্ৰাৱ) চলি থকা মহিলাসকলৰ বাবে পৰিষ্কাৰ পানী, সুৰক্ষিত শৌচাগাৰ আৰু স্বাস্থ্যবিধি বজাই ৰখা এক ডাঙৰ প্ৰত্যাহ্বান। এই সময়ত সঠিক যত্ন নল’লে সংক্ৰমণ, ছালৰ সমস্যা আৰু অস্বস্তিৰ সম্ভাৱনা বৃদ্ধি পাব পাৰে। কিন্তু কেইটামান সহজ সাৱধানতা অৱলম্বন কৰিলে এই বিপদ যথেষ্ট হ্ৰাস কৰিব পাৰি।
১. পৰিষ্কাৰ ছেনিটাৰী পেড বা কোমল কাপোৰ ব্যৱহাৰ কৰক
মাহেকীয়াৰ সময়ত সম্ভৱ হ’লে ছেনিটাৰী পেড ব্যৱহাৰ কৰক। যদি পেড উপলব্ধ নহয় আৰু পৰিষ্কাৰ কাপোৰ ব্যৱহাৰ কৰিবলগীয়া হয়, কপাহৰ কাপোৰ হ’লে ভাল, কাপোৰখন সম্পূৰ্ণ পৰিষ্কাৰ অৱস্থাত থাকিলেহে ব্যৱহাৰ কৰ্ব। তিতা বা অপৰিষ্কাৰ কাপোৰ বেছি ব্যৱহাৰ নকৰিব।
২. নিয়মীয়াকৈ পেড সলনি কৰক
ৰক্তস্ৰাৱ কম হ’লেও ৪–৬ ঘণ্টাৰ ভিতৰত পেড সলনি কৰাটো ভাল। বেছি সময় একেটা পেড ব্যৱহাৰ কৰিলে বেক্টেৰিয়া বৃদ্ধি পাই সংক্ৰমণৰ আশংকা বাঢ়িব পাৰে।
৩. হাত ধোৱাৰ অভ্যাস বজাই ৰাখক
পেড সলনি কৰাৰ আগতে আৰু পিছত চাবোন আৰু পৰিষ্কাৰ পানীৰে হাত ধুব লাগে। যদি চাবোন-পানী নাথাকে, তেন্তে হেণ্ড ছেনিটাইজাৰ ব্যৱহাৰ কৰিব পাৰে।
৪. ব্যক্তিগত অংগ পৰিষ্কাৰ ৰাখক
ব্যক্তিগত অংগ পৰিষ্কাৰ পানীৰে ধুই শুকান কৰি ৰাখক। অত্যধিক সুগন্ধিযুক্ত চাবোন, স্প্ৰে বা ৰাসায়নিক পদাৰ্থ ব্যৱহাৰ নকৰিব, কাৰণ ইয়াৰ ফলত স্বাভাৱিক সুৰক্ষা ব্যৱস্থা ব্যাহত হ’ব পাৰে।
৫. বানত অযথা নামি নাযাব, যিমান পাৰি ওখ ঠাইত থাকক
বানৰ পানীত বহু ধৰণৰ জীৱাণু, ৰাসায়নিক পদাৰ্থ আৰু মল-মূত্ৰ মিহলি থাকিব পাৰে। মাহেকীয়াৰ সময়ত এনে পানীৰ সংস্পৰ্শত বেছি সময় থাকিলে সংক্ৰমণৰ আশংকা বৃদ্ধি পায়। একান্তই নামিবলগীয়া হ’লে পিছত পৰিষ্কাৰ পানীৰে গা ধুই লওক আৰু শুকান কাপোৰ পিন্ধক। বানত অযথা নামি নাযাব, যিমান পাৰি ওখ ঠাইত থাকক আৰু সুৰক্ষিত হৈ থাকক।
৬. ব্যৱহৃত পেড সঠিকভাৱে পেলাওক
ব্যৱহৃত পেড কাগজ বা পেকেটত মেৰিয়াই পেলাব লাগে। খোলা ঠাই, নদী বা বানৰ পানীত পেলোৱা উচিত নহয়।
৭. পৰিষ্কাৰ অন্তৰ্বাস পিন্ধক
প্ৰতিদিনে পৰিষ্কাৰ আৰু শুকান কপাহী অন্তৰ্বাস পিন্ধক। তিতি গ’লে সোনকালে সলনি কৰক, যাতে ছালৰ জ্বলা-পোৰা আৰু ফাংগাছজনিত সমস্যা কমে।
৮. অস্বাভাৱিক লক্ষণ দেখা দিলে চিকিৎসকৰ পৰামৰ্শ লওক
যদি তীব্ৰ বিষ, অস্বাভাৱিক দুৰ্গন্ধযুক্ত স্ৰাৱ, জ্বৰ, অতিমাত্ৰাৰ খজুৱতি বা জ্বলা-পোৰা অনুভৱ হয়, তেন্তে যিমান সোনকালে সম্ভৱ স্বাস্থ্যকৰ্মী বা চিকিৎসকৰ পৰামৰ্শ লওক।
মনত ৰাখক
বানৰ দৰে দুৰ্যোগৰ সময়ত মাহেকীয়া পৰিচালনা কঠিন হ’লেও সঠিক স্বাস্থ্যবিধি মানি চলিলে সংক্ৰমণৰ আশংকা বহুখিনি কমাব পাৰি। সাধ্য়ানুসৰি বান হোৱা এলেকাৰ খাদ্য পানীৰ লগতে মহিলাসকলক ছেনিটাৰী পেডো দিয়াৰ ব্যৱস্থা কৰক। মহিলাসকলৰ পৰিষ্কাৰ-পৰিচ্ছন্নতা, সময়মতে পেড সলনি কৰা, হাত ধোৱা আৰু বিশুদ্ধ পানী ব্যৱহাৰ কৰা—এই সৰু সৰু অভ্যাসসমূহেই আপোনাৰ স্বাস্থ্য সুৰক্ষিত ৰাখিবলৈ ডাঙৰ ভূমিকা পালন কৰে। দুৰ্যোগৰ সময়তো মাহেকীয়াক লাজ বা ভয়ৰ বিষয় নহয়, বৰঞ্চ সঠিক যত্ন আৰু সচেতনতাৰ বিষয় হিচাপে ল’ব লাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
