ভাৰতৰ আকাশত যান-বাহনৰ পৰা নিৰ্গত হোৱা ধোঁৱাই হাজাৰ হাজাৰ লোকৰ প্ৰাণ কাঢ়ি লৈছে। international council on clean transportationৰ এক প্ৰতিবেদনত প্ৰকাশ পাইছে যে ভাৰতত প্ৰতি বছৰে বাহন প্ৰদূষণৰ ফলত প্ৰায় ৯০ হাজাৰ লোকৰ অকাল মৃ*ত্যু হয়। ইয়াৰ উপৰিও ১৫,৩০০ নতুনকৈ হাঁপানী ৰোগত আক্ৰান্ত হয়। অৰ্থাৎ প্ৰতি ছয় মিনিটৰ মূৰে মূৰে এজন ব্যক্তিৰ মৃ*ত্যু হয় আৰু প্ৰতি ৩৪ মিনিটৰ মূৰে মূৰে এটি শিশুৰ হাঁপানী ৰোগ হয়। কিন্তু এই ভয়াৱহ ছবিখনৰ মাজতে প্ৰতিবেদনখনে আশাৰ সঞ্চাৰো কৰিছে। যদিহে ভাৰতে দ্ৰুতগতিত শূন্য নিৰ্গমন বাহনলৈ পৰিৱৰ্তিত হয়, তেন্তে ২০৫০ চনৰ ভিতৰত প্ৰায় ১৭ লাখ লোক অকাল মৃ*ত্যুৰ পৰা হাত সাৰিব পৰা যাব। এই ক্ষেত্ৰত ইলেক্ট্ৰনিক বাহনেই উত্তম উপায়।
বিশ্বৰ ভিতৰতে সৰ্বাধিক বোজা দিছে ভাৰতে
“২০৫০ চনৰ ভিতৰত শূন্য নিৰ্গমন পৰিবহণৰ স্বাস্থ্য সুবিধা” শীৰ্ষক প্ৰতিবেদনখনত উল্লেখ কৰা হৈছে যে ভাৰতে যদি ২০৪৫ চনলৈ সকলো নতুন বাহন শূন্য নিৰ্গমন বাধ্যতামূল কৰে তেতিয়া এই দুপ্ৰভাৱ বহুলাংশে কমিব। মডেলটোৱে বায়ুৰ গুণাগুণ, অকাল মৃ*ত্যু আৰু শৈশৱৰ হাঁপানীৰ ওপৰত প্ৰভাৱৰ মূল্যায়ন কৰিছিল। ফলাফল আচৰিত ধৰণৰ। সমগ্ৰ বিশ্বতে যান-বাহনৰ নিৰ্গমনৰ সৈতে জড়িত অকাল মৃ*ত্যুৰ ১৩ শতাংশই অকল ভাৰতত সংঘটিত হয়। এই তথ্যই ইংগিত দিয়ে যে ভাৰতৰ যান-বাহন প্ৰদূষণৰ সমস্যা কেৱল ভয়াৱহেই নহয়, বিশ্বৰ বাকী দেশৰ তুলনাত অসমতাপূৰ্ণভাৱেও অধিক। বৃদ্ধি পোৱা জনসংখ্যা, নগৰীকৰণ আৰু দ্ৰুতগতিত বৃদ্ধি পোৱা বাহনৰ সংখ্যাই সমস্যাটোক আৰু অধিক জটিল কৰি তুলিছে, বিশেষকৈ যিবোৰ চহৰত ইতিমধ্যে যান-জঁটৰ ঘনত্ব শীৰ্ষত আছে।
শিশুৰ ওপৰত আটাইতকৈ বেছি প্ৰভাৱ
প্ৰতিবেদনত দিল্লী-NCRক এই সংকটৰ কেন্দ্ৰবিন্দু হিচাপে চিনাক্ত কৰা হৈছে। ২০২৪ চনত কেৱল NCRতে যান-বাহন প্ৰদূষণৰ সৈতে জড়িত ৮,১০০ জন লোকৰ অকাল মৃ*ত্যুৰ তথ্য লাভ কৰিছে, যিয়ে দেশৰ মুঠ প্ৰদূষণৰ ৯ শতাংশ। কেৱল দিল্লীতে ২০২৪ চনত যান-বাহন প্ৰদূষণৰ ফলত ২,৮০০ লোকৰ অকাল মৃ*ত্যু আৰু ১,৫০০ লোকৰ হাঁপানী ৰোগত আক্ৰান্ত হোৱাৰ আশংকা আছিল।
প্ৰতিবেদন অনুসৰি অতি প্ৰদূষিত চহৰ অঞ্চলত বাস কৰা শিশুসকলে দৈনিক স্কুললৈ অহা-যোৱা আৰু অন্যান্য স্বাভাৱিক কাম-কাজৰ সময়ত বাৰে বাৰে যান-বাহন সম্পৰ্কীয় প্ৰদূষণৰ সন্মুখীন হয়, যাৰ ফলত তেওঁলোকৰ হাওঁফাওঁত প্ৰভাৱ পৰে। NCRৰ কিছুমান অতি প্ৰদূষিত অঞ্চলত কেৱল বাহনৰ পৰা নাইট্ৰজেন ডাই অক্সাইডৰ নিৰ্গমনে বিশ্ব স্বাস্থ্য সংস্থাৰ বাৰ্ষিক মান প্ৰতি ঘনমিটাৰত ১০ মাইক্ৰ’গ্ৰাম অতিক্ৰম কৰিছিল, যিটো সকলো উৎসৰ পৰা হোৱা মুঠ প্ৰদূষণৰ বাবে নিৰ্ধাৰণ কৰা হৈছে। দিল্লীত ২০২৪ চনত বাহনৰ PM ২.৫ৰ সংস্পৰ্শৰ গড় মাত্ৰা প্ৰতি ঘনমিটাৰত ১৩ মাইক্ৰ’গ্ৰাম হৈছিল, যিটো বিশ্ব স্বাস্থ্য সংস্থাৰ মুঠ PM ২.৫ মানৰ দুগুণতকৈও অধিক।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
