টেষ্ট ক্ৰিকেটত সাময়িক ব্যৰ্থতাৰ অন্তত অৱশেষত জয়ৰ মুখ দেখিলে টীম ইণ্ডিয়াই। শ্ৰীলংকাৰ গালেত অনুষ্ঠিত শৃংখলাৰ প্ৰথমখন টেষ্টত আয়োজক শ্ৰীলংকাৰ বিৰুদ্ধে টীম ইণ্ডিয়াই ১৬৫ ৰানৰ বিশাল ব্যৱধানত জয়লাভ কৰিবলৈ সক্ষম হয়। এই জয়ৰ মূলতে আছিল ৩নং স্থানত বেটিং কৰিবলৈ অহা দেৱদত্ত পাডিক্কেলৰ বিস্ফোৰক শতকীয় ইনিংছ আৰু মানৱ সুথৰৰ দুৰ্দান্ত বলিং। ইয়াৰ উপৰিও বেটেৰে কে এল ৰাহুল ঋষভ পণ্ট, ধ্ৰুৱ জুৰেলেও দলক গুৰুত্বপূৰ্ণ বৰঙণি আগবঢ়ায়।
মেচখনত শুভমন গিলবাহিনীয়ে প্ৰথমে বেটিং কৰি পাডিক্কেলৰ ১৬৭ ৰানৰ লগতে অপেনাৰ কে এল ৰাহুলৰ ৮২ আৰু ধ্ৰুৱ জুৰেলৰ ৫১ ৰানৰ সহায়ত ৪৬২ ৰান সংগ্ৰহ কৰে। শ্ৰীলংকাৰ হৈ প্ৰভাথ জয়সূৰ্যই ৪টা উইকেট দখল কৰাৰ বিপৰীতে কেশ্বাৰা নুৱান্থাই ৩টা আছিথা ফাৰ্নাণ্ডোৱে দুটা উইকেট দখল কৰে। ৪৬২ ৰানৰ প্ৰাথমিক লক্ষ্য আগত লৈ ক্ৰিজলৈ অহা শ্ৰীলংকাই ২৮৪ ৰানতে আটাইকেইটা উইকেট হেৰুৱায়। শ্ৰীলংকাৰ হৈ ছনাল ডিনুছাই ১০০ ৰানৰ উপৰিও নিৰছান ডিকৱালাই ৮০ ৰানৰ বৰঙণি আগবঢ়ায়। ভাৰতৰ হৈ শ্ল লেফ্টআৰ্ম অৰ্থডক্স স্পীনাৰ মানৱ সুথৰে ৪টা উইকেট দখল কৰাৰ উপৰিও ৰবীন্দ্ৰ জাদেজাই ৩টা আৰু মহম্মদ ছিৰাজ, প্ৰষিদ্ধ কৃষ্ণ আৰু কুলদ্বীপ যাদৱে এটাকৈ উইকেট দখল কৰে। উল্লেখ্য যে জাদেজাই ৩টা উইকেট দখল কৰাৰ লগে লগে এক অনবদ্য ৰেকৰ্ডৰো গৰাকী হয়। টেষ্ট ক্ৰিকেটত ৩৫০ বা ততোধিক উইকেট আৰু ৪০০০ ৰান সম্পূৰ্ণ কৰা বিশ্বৰ চতুৰ্থজন খেলুৱৈত পৰিণত হয়। ইয়াৰ পূৰ্বে এই মাইলষ্টন স্পৰ্শ কৰিছিল ভাৰতৰ কিংবদন্তি অলৰাউণ্ডাৰ কপিল দেৱ, ইংলেণ্ডৰ য়ান বথাম আৰু নিউজীলেণ্ডৰ ডেনিয়েল ভিট্টৰীয়ে। ইয়াৰ উপৰিও এই ডাবল মাইলষ্টন স্পৰ্শ কৰা দ্ৰুততম খেলুৱৈতো পৰিণত হয় ৰবীন্দ্ৰ জাদেজা।
১৭৮ ৰানৰ অগ্ৰগতিৰে দ্বিতীয় ইনিংছত ক্ৰিজলৈ অহা ভাৰতে ১৯৩ ৰানতে আটাইকেইটা উইকেট হেৰুৱালেও ৩৭১ ৰানৰ অগ্ৰগতি লাভ কৰে। দ্বিতীয় ইনিংছত পণ্টে নিজৰ স্বভাৱসুলভ মাৰমুখী বেটিঙেৰে দ্ৰুতগতিত ৬৬ ৰান সংগ্ৰহ কৰে। প্ৰথম ইনিংছৰ তাৰকা খেলুৱৈ পাডিক্কেলেও ৪৪ ৰানৰ গুৰুত্বপূৰ্ণ বৰঙণি আগবঢ়ায়। দ্বিতীয় ইনিংছত শ্ৰীলংকাৰ হৈ ফাৰ্নাণ্ডোৱে ৪টা, জয়সূৰ্যই ৩টা, লাহিৰু কুমাৰাই দুটা আৰু নুৱান্থাই এটা উইকেট দখল কৰে। ৩৭২ ৰানৰ বিজয়লক্ষ্য আগত লৈ খেলপথাৰত নমা শ্ৰীলংকাৰ ২০৬ ৰানতে পৰিসমাপ্তি ঘটে নিজৰ ইনিংছৰ। চতুৰ্থ ইনিংছত মানৱ সুথাৰে শ্ৰীলংকাৰ ৬জনকৈ বেটছমেনক দেখুৱায় পেভেলিয়নৰ বাট।
নৱতাৰকাৰ উদয়, নতুন আশাৰ ৰেঙণি
উল্লেখ্য যে ৩নং স্থানত বেটিং কৰিবলৈ অহা দেৱদত্ত পাডিক্কেলৰ ১৬৭ ৰানৰ ইনিংছটোৱে ভাৰতীয় ক্ৰিকেট অনুৰাগীক দিশে আশাৰ ৰেঙনি। কিয়নো ক্ৰিকেটৰ তিনিওটা সংস্কৰণতেই ৩নম্বৰ স্থানটো বেটিং লাইন আপৰ মেৰুদণ্ড হিচাপে গণ্য কৰা হয়। এদিনীয়া আৰু t20ত ৩নং স্থানক লৈ ভাৰতৰ কোনো সমস্যা নাই যদিও কোহলিৰ বিদায়ৰ পিছৰে পৰা টেষ্টত ৩নং স্থানক লৈ ব্যাপক জল্পনা-কল্পনা চলি আহিছিল। ২০২৪ৰ পৰা টেষ্টত ৩নং স্থানৰ পৰা অহা নাছিল কোনো শতকীয় ইনিংছ। ২০২৪ত শুভমন গিলে বাংলাদেশৰ হৈ শেষবাৰৰ বাবে ৩নং স্থানত বেটিং কৰি সংগ্ৰহ কৰিছিল শতকীয় ইনিংছ। ইয়াৰ উপৰিও পূৰ্বৰ অধিনায়ক সৌৰভ গাংগুলীৰ পিছত কোনো ভাৰতীয় বাঁওহতীয়া বেটাৰৰ ৩নং স্থানৰ পৰা এয়া প্ৰথমটো শতকীয় ইনিংছ। বেটিঙত দেৱদত্ত পাডিক্কেলে যেনেকৈ আশাৰ সঞ্চাৰ কৰিছে ঠিক তেনেকৈ বেলিঙেৰেও মানৱ সুথৰে দেখুৱাইছে ভৱিষ্যত পৰিকল্পনাৰ সঠিক বাট। ৰবিচন্দ্ৰন অশ্বিনৰ প্ৰস্থানৰ পিছতে অশ্বিনৰ যোগ্য উত্তৰসূৰীৰ সন্ধানত আছিল টীম ইণ্ডিয়াৰ নিৰ্বাচক মণ্ডলীয়ে। মানৱ সুথাৰে এই পৰ্যন্ত দুখনকৈ টেষ্টত দেশক প্ৰতিনিধিত্ব কৰি সংগ্ৰহ কৰিছে ১৭টা উইকেট। ইয়াৰ ভিতৰত দুটাকৈ ৫টাকৈ উইকেট দখল কৰা স্পেলৰ লগতে এখন মেচত ১০টাকৈ উইকেট সংগ্ৰহ কৰা মাইলষ্টোনকো স্পৰ্শ কৰে মানৱে। আন্তঃৰাষ্ট্ৰীয় কেৰিয়াৰৰ আৰম্ভণিতে সেয়ে মানৱ সুথাৰে নিজৰ প্ৰতিভাৰ প্ৰমাণ দিছে নিৰ্বাচক মণ্ডলীক। লগতে মানৱ সুথাৰৰ কেৰিয়াৰ যে দীঘলীয়া হব তাকো যেন ইংগিত দিছে শ্ল লেফ্টআৰ্ম অৰ্থডক্স স্পীনাৰজনে। প্ৰথম ইনিংছত ১৬৭ আৰু দ্বিতীয় ইনিংছত কৰা ৪৪ ৰানৰ বাবে পাডিক্কেলক দিয়া হয় প্লেয়াৰ অব দ্য মেচৰ সন্মান।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
