ভাৰতত থকা আমেৰিকাৰ ৰাষ্ট্ৰদূত চাৰ্জিও গোৰে আজি শ্ৰীনগৰত উপস্থিত হয়। তেওঁ জম্মু-কাশ্মীৰৰ মুখ্যমন্ত্ৰী ওমৰ আব্দুল্লাক সৈতে সাক্ষাৎ কৰে। ইয়াৰ পিছতে গোৰে কয়, “মই ইয়াত উপস্থিত হৈ আনন্দিত হৈছো। জম্মু-কাশ্মীৰ ভাৰতৰ এক গুৰুত্বপূৰ্ণ অংশ, তাত কাৰো একো সন্দেহ নাই। মোৰ জম্মু-কাশ্মীৰ এয়া প্ৰথম ভ্ৰমণ। এই ঠাইখন একেবাৰে ধুনীয়া। মই ইয়াত উপস্থিত হৈ ইয়াক ওচৰৰ পৰা দৰ্শন কৰিবলৈ পাই অতিশয় উৎসাহিত হৈছো। আব্দুল্লাৰ সৈতে সাক্ষাতত আনন্দিত হৈছো। আমি এই সম্পৰ্ক অব্যাহত ৰাখিবলৈ আগ্ৰহী।”
দুদিনীয়া জম্মু-কাশ্মীৰ আৰু লাডাখ ভ্ৰমণৰ বাবে বুধবাৰে শ্ৰীনগৰত উপস্থিত হয় গোৰে। মুখ্যমন্ত্ৰীৰ সৈতে বৈঠকত মিলিত হোৱাৰ পিছত সংবাদ মাধ্যমৰ সৈতে বাৰ্তালাপ কৰে মাৰ্কিন ৰাষ্ট্ৰদূতগৰাকীয়ে। গোৰে কয়, “আমেৰিকাই ভ্ৰমণ সতৰ্কবাণী জাৰি কৰে। আমি সময়ে সময়ে সেইবোৰ পৰ্যালোচনা কৰোঁ। আমি বিশ্বাস কৰোঁ যে দিল্লী, জম্মু-কাশ্মীৰৰ মুখ্যমন্ত্ৰী আৰু ইয়াৰ প্ৰশাসনে এই অঞ্চলটোক অধিক সুৰক্ষিত কৰাৰ বাবে কিছু উৎকৃষ্ট পদক্ষেপ গ্ৰহণ কৰিছে।”
পৰৱৰ্তী সময়ত আমি বিবেচনা কৰিম যে আমেৰিকাৰ ভ্ৰমণ সতৰ্কতাৰ স্তৰ হ্ৰাস কৰা উচিত হয় নে নহয়। “এয়া বিশ্বৰ অন্যতম এখন ধুনীয়া ঠাই। মই ভাবো বহু আমেৰিকান লোকে জম্মু-কাশ্মীৰ ভ্ৰমণ কৰি ইয়াৰ সৌন্দৰ্য্য উপভোগ কৰিবলৈ ভাল পাব।” ইফালে, মুখ্যমন্ত্রী ওমৰ আব্দুল্লাই গোৰৰ সৈতে সাক্ষাৎ কৰাৰ অন্তত কয়, “আমি এখন অতি ভাল বৈঠকত মিলিত হৈছো। আমাৰ দুয়োখন দেশৰ মাজৰ সম্পৰ্কৰ বিষয়ে আলোচনা কৰাৰ সুযোগ পাইছো, বিশেষভাৱে জম্মু-কাশ্মীৰৰ বাবে আমেৰিকাই কি কৰিব পাৰে আৰু জম্মু-কাশ্মীৰ আগন্তুক বছৰবোৰত গভীৰ আৰু সম্প্ৰসাৰিত হোৱাৰ দৰে বিষয়বোৰত আমি আলোচনা কৰো।”
আন এটা পোষ্টত ওমৰে কয়, “জম্মু-কাশ্মীৰ আৰু আমেৰিকাৰ মাজত বিশেষকৈ পৰ্যটন, উদ্যান শস্য, আৰু নতুন অৰ্থনীতিৰ দৰে ক্ষেত্ৰত আমি কেনেকৈ যোগাযোগ সম্প্ৰসাৰণ আৰু গভীৰ কৰিব পাৰো সেই বিষয়ে চাৰ্জিঅ’ গ’ৰ আৰু মোৰ মাজত অতি ভাল কথা-বতৰা হৈছিল। মই এই সংযোগ অব্যাহত ৰাখিবলৈ আৰু আমাৰ আলোচনাক আগুৱাই নিবলৈ আগ্ৰহী।”
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
