খং মানুহৰ এক স্বাভাৱিক আৱেগ। কোনো কথাই মনত আঘাত কৰিলে, আশা পূৰণ নহ’লে, কোনোবাই অন্যায় কৰিলে বা মানসিক চাপ বৃদ্ধি পালে আমাৰ খং উঠিব পাৰে। কিন্তু খং স্বাভাৱিক হ’লেও ইয়াক নিয়ন্ত্ৰণ কৰিব নোৱাৰিলে ই ব্যক্তিগত সম্পৰ্ক, কৰ্মজীৱন আৰু মানসিক শান্তিৰ ওপৰত নেতিবাচক প্ৰভাৱ পেলাব পাৰে। সেয়ে খং উঠাৰ সময়ত নিজকে নিয়ন্ত্ৰণ কৰিবলৈ কিছুমান সহজ অভ্যাস গঢ়ি তোলা প্ৰয়োজন। খং উঠিলে নিজকে কেনেকৈ শান্ত কৰিব?
খং উঠিলে কিছু সময় নীৰৱ থাকক
খং উঠাৰ মুহূৰ্তত তৎক্ষণাত উত্তৰ দিয়া বা সিদ্ধান্ত লোৱা উচিত নহয়। কিছু সময় নীৰৱ হৈ পৰিস্থিতিৰ পৰা অলপ আঁতৰি থাকিলে মনটো শান্ত হ’বলৈ সময় পায়। প্ৰয়োজন হ’লে সেই ঠাইৰ পৰা কিছু সময়ৰ বাবে আঁতৰি যাব পাৰে।
গভীৰভাৱে উশাহ লওক
খং উঠিলে ধীৰে ধীৰে গভীৰ উশাহ লোৱা এক সহজ উপায়। কেইবাবাৰো দীঘলকৈ উশাহ লৈ লাহে লাহে এৰি দিয়ক। ইয়াৰ ফলত শৰীৰৰ উত্তেজনা কিছু কমিব পাৰে আৰু মনোযোগ শান্ত কৰাৰ সুযোগ পায়।
১০ লৈ গণনা কৰক
খং উঠাৰ লগে লগে কথা কোৱাৰ পৰিৱৰ্তে মনতে ১ৰ পৰা ১০ লৈ গণনা কৰক। অত্যন্ত খং উঠিলে ২০ বা ৫০ লৈও গণনা কৰিব পাৰে। এই সৰু বিৰতিটোৱে তাৎক্ষণিক প্ৰতিক্ৰিয়া কৰাৰ পৰা আঁতৰাই চিন্তা কৰাৰ সুযোগ দিয়ে।
সমস্যাটোৰ মূল কাৰণ বুজিবলৈ চেষ্টা কৰক
কেৱল “মই খং কৰিছোঁ” বুলি ভাবি থকাৰ সলনি নিজকে সোধক—“মোৰ আচলতে কিহৰ বাবে খং উঠিছে?” বহু সময়ত খংৰ আঁৰত হতাশা, ভয়, দুখ, অপমান বা মানসিক চাপ লুকাই থাকে। মূল কাৰণটো বুজিব পাৰিলে সমস্যাটো সমাধান কৰাটো সহজ হয়।
নিয়মিত ব্যায়াম কৰক
খং আৰু মানসিক চাপ কমোৱাত শাৰীৰিক ব্যায়াম সহায়ক হ’ব পাৰে। খোজ কঢ়া, যোগাসন, দৌৰা বা আন কোনো পছন্দৰ শাৰীৰিক কাম নিয়মিতভাৱে কৰিলে মনটো সতেজ হৈ থাকে।
পৰ্যাপ্ত টোপনি লওক
টোপনিৰ অভাৱ আৰু অত্যধিক ভাগৰেও মানুহক অধিক খিংখিঙীয়া কৰি তুলিব পাৰে। সেয়ে নিয়মিত সময়ত শোৱা আৰু পৰ্যাপ্ত বিশ্ৰাম লোৱাৰ অভ্যাস গঢ়ি তোলাটো গুৰুত্বপূৰ্ণ।
নিজৰ অনুভূতি শান্তভাৱে প্ৰকাশ কৰক
খং দমন কৰি ৰখাৰ সলনি উপযুক্ত সময়ত শান্তভাৱে নিজৰ কথা প্ৰকাশ কৰক। “তুমি সদায় এনেকুৱা কৰা” বুলি অভিযোগ কৰাৰ সলনি “এই কথাটোৱে মোক কষ্ট দিছে” বুলি নিজৰ অনুভূতি প্ৰকাশ কৰিলে বিবাদ কম হ’ব পাৰে।
ধ্যান আৰু যোগাসনৰ অভ্যাস কৰক
প্ৰতিদিনে কেইমিনিটমান ধ্যান, প্ৰাণায়াম বা যোগাসন কৰাৰ অভ্যাসে মন শান্ত ৰখাত সহায় কৰিব পাৰে। নিয়মিত অভ্যাসে মানসিক চাপৰ সৈতে ভালদৰে মোকাবিলা কৰাৰ ক্ষমতা বৃদ্ধি কৰিব পাৰে।
ক্ষমা কৰিবলৈ শিকক
সৰু সৰু কথাবোৰ মনত জমা কৰি ৰাখিলে খং বৃদ্ধি পাব পাৰে। সকলো কথা নিজৰ নিয়ন্ত্ৰণত নাথাকে। সেয়ে যিবোৰ কথা এৰি দিব পাৰি, সেইবোৰ এৰি দি আগবাঢ়িবলৈ শিকাটো মানসিক শান্তিৰ বাবে উপকাৰী।
প্ৰয়োজন হ’লে সহায় লওক
যদি খং ইমানেই বেছি হয় যে নিজৰ বা আনৰ ক্ষতি কৰাৰ ভাবনা আহে, সম্পৰ্ক বা দৈনন্দিন জীৱনত বাৰে বাৰে সমস্যা সৃষ্টি হয়, তেন্তে মানসিক স্বাস্থ্য বিশেষজ্ঞ বা কাউন্সেলৰৰ সহায় লোৱাটো ভাল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
