মাহেকীয়াত অত‍্যন্ত পেটৰ বিষ? এয়া কোনো ৰোগৰ লক্ষণ নেকি জানক

মাহেকীয়া বা ঋতুস্ৰাৱৰ সময়ত পেটৰ বিষ হোৱা মহিলাসকলৰ মাজত এক সাধাৰণ সমস্যা। বহু মহিলাই মাহেকীয়াৰ প্ৰথম বা দ্বিতীয় দিনা তলপেটত বিষ, কঁকালৰ বিষ, বমি বমি ভাব আৰু দুৰ্বলতা অনুভৱ কৰে। সাধাৰণতে জৰায়ুৰ সংকোচনৰ ফলত এই বিষ হয়। কিন্তু কেতিয়াবা মাহেকীয়াৰ সময়ত অত্যন্ত পেটৰ বিষ কোনো অন্তৰ্নিহিত ৰোগৰ লক্ষণো হ’ব পাৰে। সেয়েহে বিষৰ তীব্ৰতা, সময়কাল আৰু আন লক্ষণসমূহৰ প্ৰতি গুৰুত্ব দিয়া উচিত।

মাহেকীয়াৰ সময়ত পেটৰ বিষ কিয় হয়?

ঋতুস্ৰাৱৰ সময়ত জৰায়ুৰ ভিতৰৰ আৱৰণ ওলাই আহে। এই প্ৰক্ৰিয়াত জৰায়ু সংকোচিত হয় আৰু প্ৰষ্টাগ্লেণ্ডিন নামৰ কিছুমান ৰাসায়নিক পদাৰ্থৰ প্ৰভাৱত বিষৰ সৃষ্টি হ’ব পাৰে। এই সাধাৰণ ঋতুস্ৰাৱজনিত বিষক চিকিৎসা বিজ্ঞানত Dysmenorrhea বুলি কোৱা হয়।

সাধাৰণতে তলপেটত মৃদু বা মধ্যমীয়া বিষ হয় আৰু কেতিয়াবা কঁকাল বা উৰুৰ ফালেও বিষ বিয়পিব পাৰে। এই বিষ সাধাৰণতে মাহেকীয়া আৰম্ভ হোৱাৰ সময়ত বেছি হয় আৰু কেইদিনমানৰ ভিতৰত কমি যায়।

অত্যন্ত পেটৰ বিষ কি কোনো ৰোগৰ লক্ষণ?

হয়, কেতিয়াবা মাহেকীয়াৰ সময়ত অত্যধিক বিষ কিছুমান স্বাস্থ্যজনিত সমস্যাৰ সৈতে জড়িত হ’ব পাৰে। যেনে—

• এণ্ড’মেট্ৰিঅ’ছিছ

এণ্ড’মেট্ৰিঅ’ছিছ হৈছে এনে এক অৱস্থা, য’ত জৰায়ুৰ ভিতৰৰ আৱৰণৰ দৰে কলা জৰায়ুৰ বাহিৰত বৃদ্ধি পায়। ইয়াৰ ফলত মাহেকীয়াৰ সময়ত তীব্ৰ পেটৰ বিষ, কঁকালৰ বিষ, যৌন সম্পৰ্কৰ সময়ত বিষ আৰু কেতিয়াবা সন্তান ধাৰণত অসুবিধা হ’ব পাৰে।

• জৰায়ুৰ ফাইব্ৰইড

জৰায়ুত সৃষ্টি হোৱা অ-কেন্সাৰজনিত গাঁঠিক ফাইব্ৰইড বুলি কোৱা হয়। ইয়াৰ ফলত মাহেকীয়াত অত্যধিক ৰক্তক্ষৰণ, তলপেটত চাপ অনুভৱ আৰু বিষ হ’ব পাৰে।

• এডেন’মায়’ছিছ

এই অৱস্থাত জৰায়ুৰ ভিতৰৰ আৱৰণৰ দৰে কলা জৰায়ুৰ পেশীৰ স্তৰত সোমাই বৃদ্ধি পায়। ইয়াৰ ফলত মাহেকীয়াৰ সময়ত তীব্ৰ বিষ, অধিক ৰক্তক্ষৰণ আৰু তলপেট গধুৰ অনুভৱ হ’ব পাৰে।

• পেলভিক ইনফ্লেমেটৰী ডিজিজ (PID)

জৰায়ু, ফেল’পিয়ান টিউব বা আন প্ৰজনন অংগত সংক্ৰমণ হ’লে পেলভিক ইনফ্লেমেটৰী ডিজিজ হ’ব পাৰে। তলপেটৰ বিষৰ লগতে জ্বৰ, অস্বাভাৱিক যোনিস্ৰাৱ, যৌন সম্পৰ্কৰ সময়ত বিষ আদি লক্ষণ দেখা দিব পাৰে।

• ডিম্বাশয়ৰ চিষ্ট

ডিম্বাশয়ত পানী বা তৰল পদাৰ্থৰে ভৰা থলী সৃষ্টি হ’লে কেতিয়াবা পেটৰ বিষ হ’ব পাৰে। কিছুমান চিষ্টৰ বাবে মাহেকীয়াৰ সময়ত অস্বস্তি বৃদ্ধি পাব পাৰে। চিষ্ট ফাটি যোৱা বা ডিম্বাশয় পেচ খোৱা অৱস্থাত হঠাৎ তীব্ৰ বিষ হ’ব পাৰে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ