উত্তৰ প্ৰদেশৰ বলৰামপুৰ জিলাত সংঘটিত হৈছে এক অতি মৰ্মান্তিক ঘটনা। কোতৱালি অঞ্চলৰ চিটি পেলেচত থকা ডিভাইন পাব্লিক স্কুলত শ্ৰেণীকোঠাৰ ভিতৰতে মৃ*ত্যু হয় দ্বিতীয় শ্ৰেণীৰ এগৰাকী ছাত্ৰীৰ। মৃ*ত ছাত্ৰীগৰাকীৰ নাম বৈষ্ণৱী বুলি জানিব পৰা গৈছে। ঘটনাটো সোমবাৰে পুৱা প্ৰায় ১১:২৫ বজাত সংঘটিত হয়। সেই সময়ত বিদ্যালয়ত নিয়মীয়াকৈ পাঠদান চলি আছিল। আনহাতে, বিদ্যালয়খনৰ বাহিৰত গণেশ বিসৰ্জনৰ শোভাযাত্ৰা চলি আছিল। শোভাযাত্ৰাত বজোৱা DJ সংগীতৰ উচ্চ শব্দ আৰু গধুৰ বেছৰ মাজতে শ্ৰেণীকোঠাত বহি থকা বৈষ্ণৱীয়ে হঠাতে অসুস্থ অনুভৱ কৰে।
ঘটনাৰ CCTV ফুটেজ ইতিমধ্যে ছ’চিয়েল মিডিয়াত ভাইৰেল হৈ পৰিছে। ফুটেজত দেখা যায় যে অসুস্থ অনুভৱ কৰাৰ পিছত ছাত্ৰীগৰাকীয়ে বেঞ্চৰ পৰা উঠিবলৈ কেইবাবাৰো চেষ্টা কৰিছিল। কিন্তু উঠিব নোৱাৰি অৱশেষত তাই শ্ৰেণীকোঠাৰ ভিতৰতে অচেতন হৈ পৰে। ছাত্ৰীগৰাকী অচেতন হৈ পৰা দেখি শিক্ষক-শিক্ষয়িত্ৰীসকলৰ মাজত হাহাকাৰ লাগে। দুজন শিক্ষকে ততাতৈয়াকৈ ছাত্ৰীগৰাকীক তুলি লৈ বেঞ্চ এখনত শুৱাই দিয়ে।
পৰিস্থিতি গুৰুতৰ হোৱা দেখি বিদ্যালয়ৰ মেনেজাৰ আশীষ উপাধ্যায়ৰ তত্বাৱধানত ছাত্ৰীগৰাকীক ততাতৈয়াকৈ জিলা চিকিৎসালয়লৈ লৈ যোৱা হয়। কিন্তু চিকিৎসকে পৰীক্ষা কৰাৰ পিছত বৈষ্ণৱীক মৃ*ত বুলি ঘোষণা কৰে। মৃ*ত ছাত্ৰীগৰাকী মহানগৰীৰ মহল্লা খালৱাৰ বাসিন্দা সোণু তিৱাৰীৰ জ্যেষ্ঠ কন্যা। পুৱা হাঁহি-ধেমালিৰে বিদ্যালয়লৈ যোৱা ছোৱালীজনীক দুপৰীয়া স্কুলৰ পৰা ঘৰলৈ লৈ যোৱাৰ কথা আছিল পিতৃৰ।
কিন্তু স্কুললৈ পঠিওৱাৰ কিছু ঘণ্টাৰ পিছতেই ছোৱালীজনীৰ মৃ*ত্যুৰ খবৰ লাভ কৰাত পৰিয়ালটোৰ মাজত শোকৰ ছাঁ পৰে। এই ঘটনাই অঞ্চলটোতো গভীৰ শোকৰ সৃষ্টি কৰিছে। বিদ্যালয়ৰ মেনেজাৰ আশীষ উপাধ্যায়ে জনোৱা মতে, গণেশ বিসৰ্জনৰ শোভাযাত্ৰাৰ বাবে বিদ্যালয়খন দুপৰীয়া ১২ বজাত বন্ধ কৰাৰ কথা আছিল। কিন্তু বিদ্যালয় বন্ধ হোৱাৰ কিছু সময় পূৰ্বেই এই দুখজনক ঘটনা সংঘটিত হয়।
বিদ্যালয় কৰ্তৃপক্ষৰ মতে, CCTV ফুটেজত বাহিৰত উচ্চস্বৰত ডিজে সংগীত বজোৱা দেখা যায় আৰু সেই সময়তে ছাত্ৰীগৰাকীৰ স্বাস্থ্যৰ অৱনতি ঘটে। অৱশ্যে ছাত্ৰীগৰাকীৰ মৃ*ত্যুৰ প্ৰকৃত চিকিৎসাজনিত কাৰণ কি, সেয়া নিশ্চিতভাৱে জানিবলৈ অধিক তদন্ত আৰু চিকিৎসা-সম্পৰ্কীয় তথ্যৰ প্ৰয়োজন। ডিজেৰ উচ্চ শব্দৰ সৈতে ছাত্ৰীগৰাকীৰ মৃ*ত্যুৰ সম্পৰ্ক থকা বুলি বিদ্যালয় কৰ্তৃপক্ষই আৰক্ষীক অৱগত কৰিছে। বৰ্তমানলৈ মৃ*ত ছাত্ৰীগৰাকীৰ পৰিয়ালে কোনো লিখিত অভিযোগ দাখিল কৰা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
