অসম লাইভ ২৪ঃ ‘তালিবান’ৰ বাবে এইবাৰ চৰ্চাত ৰাজস্থান৷ আফগানিস্তান দখলৰ পাছত তালিবানে সমগ্ৰ বিশ্বত সংবাদ শিৰোনাম দখল কৰাৰ সময়তে ‘তালিবান’ৰ বাবে শেহতীয়াকৈ চৰ্চালৈ আহিছে ৰাজস্থানৰ নাম৷ ‘তালিবান’ নামৰ এটা ক্ৰিকেট টীমে বিতৰ্কৰ সৃষ্টি কৰিছে ৰাজস্থানত৷ ৰাজস্থানৰ জেয়চলমেৰত অনুষ্ঠিত এখন ক্ৰিকেট টুৰ্ণামেণ্টত ‘তালিবান’ নামৰ এটা ক্ৰিকেট টীমে অংশগ্ৰহণ কৰাৰ সময়তে চাঞ্চল্যৰ সৃষ্টি হয় অঞ্চলটোত৷ কাৰণ পাৰমাণৱিক দিশত গুৰুত্বপূৰ্ণ পোখৰাণৰ পৰা ৩৬ কিঃমিঃ দূৰত্বত অনুষ্ঠিত হৈছিল ক্ৰিকেট মেচ৷ সংখ্যালঘু সম্প্ৰদায়ৰ আধিপত্য আছে অঞ্চলটোত৷ পোখৰাণৰ ফায়াৰিং ৰেঞ্জৰ সমীপত অৱস্থিত এই অঞ্চলটো স্পৰ্শকাতৰ অঞ্চল বুলি জনাজাত আৰু সেই অঞ্চলটোত নিয়মিত বিভিন্ন হিংসাত্মক ঘটনা সংঘটিত হৈ থাকে৷ গতিকে তেনে এক স্পৰ্শকাতৰ অঞ্চলত তালিবান শব্দই স্বভাৱিকতেই উৎকণ্ঠা বৃদ্ধি কৰিব৷ অন্যহাতে, আয়োজক কমিটীয়ে ভুলবশত তালিবান নামৰ ক্ৰিকেট টীমক অন্তৰ্ভুক্ত কৰা হয় বুলি মন্তব্য কৰাৰ লগতে দলটোক টুৰ্ণামেণ্টৰ পৰা বহিষ্কৃত কৰা হয় বুলিও সদৰী কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
