আধাৰ কাৰ্ড ব্যৱহাৰকাৰীৰ বাবে এক ডাঙৰ খবৰ। UIDAI এ নতুন আধাৰ এপৰ জৰিয়তে ৩১ ডিচেম্বৰলৈকে বিনামূলীয়াকৈ ইমেইল আইডি আপডেটৰ সুযোগ প্ৰদান কৰিছে। আধাৰ কেন্দ্ৰলৈ নোযোৱাকৈ ঘৰৰ পৰা কেইমিনিটমানৰ ভিতৰতে আপডেট প্ৰক্ৰিয়া সম্পূৰ্ণ হ’ব।
UIDAI ৰ অধিসূচনা অনুসৰি অহা ৩১ ডিচেম্বৰলৈকে নতুন আধাৰ এপৰ জৰিয়তে ব্যৱহাৰকাৰীয়ে বিনামূলীয়াকৈ ইমেইল আইডি আপডেট কৰিব পাৰিব। লক্ষনীয়ভাৱে ডিজিটেল সেৱা আৰম্ভ হোৱাৰ মাত্ৰ দুদিনৰ ভিতৰতে সমগ্ৰ দেশৰ ২.৫ লাখৰো অধিক লোকে এই এপ ব্যৱহাৰ কৰি নিজৰ ইমেইল আইডি আপডেট কৰিছে।
এই নতুন সেৱাই কেনেকৈ কাম কৰিব?
ইউআইডিএআইৰ মতে, নতুন আধাৰ এপৰ জৰিয়তে ইমেইল আপডেট কৰাৰ প্ৰক্ৰিয়াটো অতি সহজ। ইয়াৰ বাবে বায়’মেট্ৰিক পৰীক্ষণৰ বাবে কোনো নথি-পত্ৰ জমা দিয়াৰ বা আধাৰ কেন্দ্ৰলৈ যোৱাৰ প্ৰয়োজন নাই। মাত্ৰ কেইমিনিটমানৰ ভিতৰতে সম্পূৰ্ণ প্ৰক্ৰিয়াটো সম্পূৰ্ণ হ’ব পাৰে। যিসকলে এতিয়াও নতুন আধাৰ এপটো ডাউনলোড কৰা নাই, তেওঁলোকে প্ৰথমে এপটো ইনষ্টল কৰি ছেট আপ কৰিব লাগিব। এই এপটো Android আৰু Apple iOS দুয়োটা প্লেটফৰ্মতে উপলব্ধ।
আধাৰৰ সৈতে আপোনাৰ ইমেইল আইডি লিংক
যদি আপোনাৰ ইমেইল আইডি আধাৰৰ সৈতে সংযুক্ত, যেতিয়াই আপোনাৰ আধাৰ ব্যৱহাৰ কৰি প্ৰমাণীকৰণৰ অনুৰোধ কৰা হয়, আপোনাৰ ইমেইললৈ এটা সতৰ্কবাণী প্ৰেৰণ কৰা হ’ব। ফলত আপোনাৰ আধাৰ ক’ত আৰু কি উদ্দেশ্যত ব্যৱহাৰ কৰা হৈছে সেয়া লগে লগে গম পাব। কোনেও গোপনে আপোনাৰ আধাৰৰ অপব্যৱহাৰ কৰিব নোৱাৰিব। প্ৰৱঞ্চনা আৰু জালিয়াতিৰ আশংকা বহু পৰিমাণে হ্ৰাস পাব।
নতুন আধাৰ এপৰ বিশেষ বৈশিষ্ট্য: ই-আধাৰ সদায় আপোনাৰ ফোনত থাকিব, কাগজৰ কপি কঢ়িয়াই নিয়াৰ প্ৰয়োজন নাই।
ফেচ স্কেনৰ জৰিয়তে শ্বেয়াৰিং: আধাৰ শ্বেয়াৰ কৰাৰ সময়ত ফেচ স্কেনৰ জৰিয়তে সুৰক্ষিত পৰীক্ষণ কৰা হ’ব, যিটো পিন বা অ’টিপিৰ দৰেই সুৰক্ষিত।
নিৰাপদ লগইন: বায়’মেট্ৰিক প্ৰমাণীকৰণৰ জৰিয়তে এপটো খোল খাব।
বহুভাষাৰ সুবিধা: বাংলা, হিন্দী, ইংৰাজীকে ধৰি একাধিক ভাষাত ব্যৱহাৰ কৰিব পাৰি।
অফলাইন ব্যৱহাৰ: ইণ্টাৰনেট নাথাকিলেও আধাৰৰ তথ্য এপত চাব পাৰিব।
২০০৯ চনত ভাৰতত আৰম্ভ হৈছিল আধাৰ প্ৰকল্প। বৰ্তমান ১.৩ বিলিয়নতকৈ অধিক লোকৰ আধাৰ আছে। প্ৰথমে আছিল কাগজৰ আধাৰ কাৰ্ড, তাৰ পিছত mAadhaar App, আৰু এতিয়া ডিজিটেল ইণ্ডিয়াৰ পদক্ষেপৰ অংশ হিচাপে সম্পূৰ্ণ ডিজিটেল নতুন আধাৰ এপ মুকলি কৰা হৈছে।
চৰকাৰৰ লক্ষ্য হৈছে ক্ৰমান্বয়ে আধাৰ সম্পৰ্কীয় সকলো সেৱা সম্পূৰ্ণৰূপে অনলাইনলৈ অনা, যাতে সাধাৰণ মানুহে ঘৰৰ পৰাই সহজে সেৱা লাভ কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
