বিদায় আছু, অৱশেষত আছুৰ পৰা অব্যাহতি ল’লে শংকৰজ্যোতি বৰুৱাই
অৱশেষত ছাত্ৰ নেতা শংকৰ জ্যোতি বৰুৱাই সদৌ অসম ছাত্ৰ সন্থাৰ সাধাৰণ সম্পাদক পদৰ পৰা পদত্যাগ কৰাৰ সিদ্ধান্ত গ্ৰহণ কৰে। আজি ১২ ছেপ্টেম্বৰ তাৰিখ বৃহস্পতিবাৰে সামাজিক মাধ্যম ফেচবুক যোগে পদত্যাগৰ কথা সদৰি কৰে।
বৰুৱাই এই সিদ্ধান্ত সম্পূৰ্ণ নিজৰ বুলি কয় আৰু কোনো বাহ্যিক হেঁচা নোহোৱাকৈ সাধাৰণ সম্পাদক পদৰ পৰা পদত্যাগ কৰে বুলি উল্লেখ কৰে।
আজি ছ’চিয়েল মিডিয়াত এক বিবৃতিত আছুৰ সাধাৰণ সম্পাদক পদৰ পৰা পদত্যাগ কৰাৰ কথা ঘোষণা কৰি তেওঁৰ চৌপাশৰ বিষয়টোৰ সত্যতা আদালতত প্ৰকাশ পাব বুলি উল্লেখ কৰে।
শ্বেয়াৰ কৰা পোষ্টটোত শংকৰ জ্যোতিয়ে লিখে- ‘নমস্কাৰ। আপোনালোকক জনাব বিচাৰিছোঁ যে শেহতীয়াকৈ সদৌ অসম ছাত্ৰ সন্থাৰ পবিত্ৰ মজিয়াত আমাৰ সন্দৰ্ভত এক বিতৰ্কৰ সৃষ্টি হৈছে । এই বিতৰ্কৰ সত্য সত্যতা যদিও ন্যায়ালয়ত প্ৰমাণ হ’ব তথাপিও ব্যক্তিগতভাৱে জনাব বিচাৰো যে মই সদৌ অসম ছাত্ৰ সন্থাৰ পবিত্ৰ মজিয়াৰ পৰা সাধাৰণ সম্পাদক হিচাপে স্ব-ইচ্ছাই অব্যাহতি গ্ৰহণ কৰিছোঁ। ক্ষন্তেক পিছতে কেন্দ্ৰীয় সমিতিলৈ মোৰ অব্যাহতি পত্ৰ প্ৰেৰণ কৰিম ৷ আজিৰ এই মূহূৰ্তলৈকে আপোনালোকে আগবঢ়োৱা সহায়-সহযোগিতাৰ বাবে সকলোৰে ওচৰত কৃতজ্ঞ হৈ ৰ’ম ৷ ধন্যবাদ।’
উল্লেখ্য যে, শংকৰ জ্যোতি বৰুৱাৰ বিৰুদ্ধে এগৰাকী ছাত্ৰীয়ে আৱেগিক আৰু শাৰীৰিকভাৱে নিৰ্যাতন চলোৱা, বিবাহৰ মিছা প্ৰতিশ্ৰুতিৰে প্ৰতাৰণা কৰা আৰু হত্যাৰ ভাবুকি দিয়া বুলি দাবী কৰাৰ পিছতে এই কেলেংকাৰীৰ সৃষ্টি হয়।
এই অভিযোগৰ পাছতে ব্যাপক বিতৰ্কৰ অন্তত আছুৱে শংকৰ জ্যোতি বৰুৱাক স্বেচ্ছামূলক অব্যাহতি ল’বলৈ আহ্বান জনাইছিল। সেই আহ্বানৰ পাছতে আজি বৰুৱাই নিজৰ পদৰ পৰা অব্যাহতি লয়।
আনহাতে, শংকৰ জ্যোতি বৰুৱাই ছাত্ৰীগৰাকীৰ সৈতে অতীতৰ সম্পৰ্ক থকাৰ কথা স্বীকাৰ কৰিছে যদিও ছমাহ পূৰ্বে সেই সম্পর্ক সমাপ্ত হোৱা বুলি দাবী কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
