স্কুললৈ যোৱাত নিষেধাজ্ঞা ১৪ লাখ কন্যা শিশুক, অধিক বেয়াৰ ফালে পৰিস্থিতি
২০২১ চনত আফগানিস্তানত তালিবান পুনৰ ক্ষমতালৈ আহে। তেতিয়াৰ পৰা এতিয়ালৈকে দেশখনত কমেও ১৪ লাখ কন্যা শিশু তথা ছোৱালীক স্কুললৈ যোৱাত নিষেধাজ্ঞা আৰোপ কৰা হৈছে। ৰাষ্ট্ৰসংঘৰ সাংস্কৃতিক সংস্থা ইউনেস্ক’ৰ এক প্ৰতিবেদন অনুসৰি আফগানিস্তানৰ এটা সম্পূৰ্ণ প্ৰজন্মৰ ভৱিষ্যত বৰ্তমানে অন্ধকাৰত পৰিছে।
বিগত মাহত দেশখনত তালিবানৰ শাসনৰ তিনি বছৰ সম্পূৰ্ণ হয়। এই তিনি বছৰৰ ভিতৰত আফগানিস্তানত কেৱল ছোৱালীয়েই নহয় ১১ লাখৰো অধিক ল’ৰা আৰু ছোৱালীয়ে বিদ্যালয় এৰিছে৷
ইউনেস্ক’ই কয় যে বিদ্যালয়লৈ যোৱা ছাত্ৰ-ছাত্ৰীৰ সংখ্যা ইমান হ্ৰাস পোৱাটো চাঞ্চল্যকৰ। ইয়াৰ ফলত শিশু শ্ৰমিক আৰু বাল্যবিবাহৰ সমস্যা বৃদ্ধি পাব পাৰে। সংস্থাটোৱে জনোৱা মতে, প্ৰায় ২০ বছৰ ধৰি ভাল গতিৰে বৃদ্ধি পোৱা আফগানিস্তানৰ শিক্ষাৰ ক্ষেত্ৰত তালিবানে মাত্ৰ তিনি বছৰৰ ভিতৰতে উন্নয়নৰ অন্ত পেলাইছে।
উল্লেখ্য যে, আফগানিস্তান পৃথিৱীৰ একমাত্ৰ দেশ য’ত ছোৱালীক মাধ্যমিক বিদ্যালয় আৰু বিশ্ববিদ্যালয়ত পঢ়িবলৈ দিয়া নহয়। বিশ্বৰ কোনো দেশৰ পৰা স্বীকৃতি লাভ কৰা নাই তালিবান প্ৰশাসনে। ইয়াৰ দ্বাৰা মহিলাৰ ওপৰত আৰোপ কৰা নিষেধাজ্ঞাক ৰাষ্ট্ৰসংঘই লিংগ বৈষম্য বুলি অভিহিত কৰিছে। ২০২১ চনৰ পৰা আফগানিস্তানৰ প্ৰায় ১৪ লাখ ছোৱালী স্কুললৈ যোৱাৰ অধিকাৰৰ পৰা বঞ্চিত হৈছে। উল্লেখযোগ্য যে যোৱা বছৰ কৰা গণনাৰ তুলনাত এইবাৰ এই সংখ্যা ৩ লাখ বৃদ্ধি পাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
