ৰতন টাটাৰ পাছত এতিয়া কোনে দায়িত্ব ল’ব টাটা গ্ৰুপৰ
আজি ৰতন টাটাৰ দেহাৱসানৰ পাছত শোকস্তব্ধ হৈ পৰিছে সমগ্ৰ দেশৰ লগতে বিশ্বৰো ভিন্ন প্ৰান্তৰ লোক। ভাৰতে সঁচাকৈয়ে হেৰুৱালে এগৰাকী অমূল্য ৰত্ন। পাছে এতিয়া এটা প্ৰশ্ন উত্থাপন হৈছে- ৰতন টাটাৰ পাছত এতিয়া কোনে দায়িত্ব লব টাট গ্ৰুপৰ।
দেশৰ লগতে বিশ্বৰ অন্যতম বৃহৎ উদ্যোগপতি ৰতন টাটাৰ মুম্বাইৰ এখন চিকিৎসালয়ত মৃত্যু হয়। যোৱা কেইদিনমানৰ পৰা তেওঁ চিকিৎসালয়ত ভৰ্তি হৈ আছিল। ৰতন টাটাই এৰি থৈ গৈছে এক বৃহৎ পৰিমাণৰ সম্পত্তি, বৰ্তমানে টাটা গ্ৰুপৰ মুঠ সম্পত্তিৰ পৰিমাণ প্ৰায় ১৬৫ বিলিয়ন মাৰ্কিন ডলাৰ। ৰতন টাটাৰ মৃত্যুৰ পিছত এতিয়া আলোচনা হৈছে তেওঁৰ উত্তৰাধিকাৰ হিচাপে কোনে কাৰ্যভাৰ চম্ভালিব।
ৰতন টাটাই তেওঁৰ উত্তৰাধিকাৰী নিযুক্তি দিয়া নাছিল এনে পৰিস্থিতিত তেওঁৰ ট্ৰাষ্ট ট্ৰাষ্টীৰ মাজৰ পৰা এজন অধ্যক্ষ নিৰ্বাচিত হ’ব। টাটা গ্ৰুপৰ মূল দুটা ট্ৰাষ্ট আছে – ছাৰ দোৰাবজী টাটা ট্ৰাষ্ট আৰু ছাৰ ৰতন টাটা ট্ৰাষ্ট। এই দুয়োটা ট্ৰাষ্টে যৌথভাৱে টাটা গ্ৰুপৰ মূল কোম্পানী টাটা ছন্সত প্ৰায় ৫২ শতাংশ অংশীদাৰিত্ব লাভ কৰিছে। এই গোটটোৱে বিমান পৰিবহণৰ পৰা আৰম্ভ কৰি এফএমচিচিলৈকে পৰ্টফলিঅ’ চম্ভালে।
দুয়োটা ট্ৰাষ্টতে মুঠ ১৩ জন ট্ৰাষ্টী আছে। এইসকল লোক দুয়োটা ট্ৰাষ্টতে ট্ৰাষ্টী। ইয়াৰ ভিতৰত আছে প্ৰাক্তন প্ৰতিৰক্ষা সচিব বিজয় সিং, অটোমোবাইল খণ্ডৰ প্ৰবীণ ভেনু শ্ৰীনিবাসন, ৰতন টাটাৰ সম্পৰ্কীয় ভাতৃ আৰু ট্ৰেণ্টৰ অধ্যক্ষ নোৱেল টাটা, ব্যৱসায়ী মেহলী মিষ্ট্ৰী আৰু অধিবক্তা ডাৰিয়াছ খাম্বাটাৰ নাম।
এই ট্ৰাষ্টসমূহত অন্তৰ্ভুক্ত আন কেইজন হৈছে ছাৰ দোৰাবজী টাটা ট্ৰাষ্টৰ ট্ৰাষ্টী চিটি ইণ্ডিয়াৰ প্ৰাক্তন চিইঅ’ পৰমিত ঝাবেৰী আৰু ৰতন টাটাৰ কনিষ্ঠ ভাতৃ জিমি টাটা আৰু জাহাংগীৰ হাস্পতালৰ চিইঅ’ জাহাংগীৰ এইচ চি জাহাংগীৰ ছাৰ ৰতন টাটা ট্ৰাষ্টৰ ট্ৰাষ্টী।
টাটা ট্ৰাষ্টৰ মুৰব্বী নিৰ্বাচিত হয় ট্ৰাষ্টীৰ মাজৰ সংখ্যাগৰিষ্ঠ ভোটৰ ভিত্তিত। এই দুয়োটা ট্ৰাষ্টৰ ভাইচ চেয়াৰমেন বিজয় সিং আৰু ভেনু শ্ৰীনিবাস। কিন্তু তেওঁলোকৰ যিকোনো এজনক মুখ্য নিৰ্বাচিত হোৱাৰ সম্ভাৱনা তুলনামূলকভাৱে কম। টাটা ট্ৰাষ্টৰ মুৰব্বী হিচাপে নিযুক্তি পোৱাৰ সম্ভাৱনা বেছি ৬৭ বছৰীয়া নোৱেল টাটা। নোৱেলৰ নিযুক্তিত পাৰ্চী সমাজো সুখী হ’ব। ৰতন টাটা পাৰ্চী আছিল। ইয়াৰ দ্বাৰা এজন পাৰ্চী এই সংগঠনৰ নেতৃত্বও নিশ্চিত হ’ব। এই ট্ৰাষ্টে ২০২৩ বিত্তীয় বৰ্ষত ৪৭০ কোটিতকৈ অধিক ধন আগবঢ়াইছিল।
টাটা ট্ৰাষ্টৰ দায়িত্ব কেৱল পাৰ্চীসকলেহে লোৱাটোও এক ঐতিহাসিক সত্য। কিন্তু কিছুমানৰ নামত টাটা নাছিল আৰু ট্ৰাষ্টৰ প্ৰতিষ্ঠাপক পৰিয়ালৰ সৈতে তেওঁলোকৰ কোনো প্ৰত্যক্ষ সম্পৰ্ক নাছিল। এই ট্ৰাষ্টসমূহৰ মুৰব্বী হিচাপে নোৱেল টাটা নিৰ্বাচিত হ’লে তেওঁ ছাৰ ড’ৰাবজী টাটা ট্ৰাষ্টৰ ১১ সংখ্যক অধ্যক্ষ আৰু ছাৰ ৰতন টাটা ট্ৰাষ্টৰ ষষ্ঠ অধ্যক্ষ হ’ব। চাৰি দশকৰো অধিক সময় ধৰি টাটা গ্ৰুপৰ সৈতে জড়িত নোৱেল। তেওঁ ট্ৰেণ্ট, টাইটান আৰু টাটা ষ্টীলকে ধৰি ছটা ডাঙৰ কোম্পানীৰ ব’ৰ্ডত আছে। ২০১৯ চনত ছাৰ ৰতন টাটা ট্ৰাষ্টৰ ট্ৰাষ্টী হিচাপে নিযুক্তি লাভ কৰে। ২০২২ চনত ছাৰ দোৰাবজী টাটা ট্ৰাষ্টৰ ব’ৰ্ডত অন্তৰ্ভুক্ত হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
