এগৰাকী হিন্দু যুৱতীক পলুৱাই নিয়াৰ অভিযোগত এগৰাকী মুছলমান যুৱকৰ ঘৰত হিন্দু লোকে গণ আক্ৰমণ সংঘটিত কৰিছে৷
আৰক্ষীয়ে প্ৰকাশ কৰা অনুসৰি যোৱা শুকুৰবাৰে উত্তৰ প্ৰদেশৰ আগ্ৰাৰ ৰুণাকটা এটা মুছলমান পৰিয়ালৰ ঘৰত হিন্দু লোকে গণ আক্ৰমণ সংঘটিত কৰি অগ্নিসংযোগ কৰে৷
হিন্দুলোকসকলৰ অভিযোগ যে চাজিদ নামৰ এখন জিমৰ স্বত্বাধিকাৰী মুছলমান যুৱকজনে ২২ বছৰীয়া এগৰাকী হিন্দু যুৱতীক অপহৰণ কৰি নিয়ে৷ চাজিদে যুৱতীগৰাকীক অপহৰণ কৰি নি পলাতক হৈ থকাৰ অভিযোগ তুলি ‘ধৰ্ম জাগৰণ সমন্বয় সংঘ’ নামৰ এটা সংঠনৰ নেতৃত্বত হিন্দুলোকে চাজিদ ঘৰত গণ আক্ৰমণ সংঘটিত কৰি ঘৰটো সম্পূৰ্ণৰূপে লণ্ডভণ্ড কৰাৰ লগতে অগ্নিসংযোগ কৰে৷
লগতে পঢ়ক হৰভজন সিঙৰ মহানুভৱতা! কৃষকৰ কন্যাৰ শিক্ষাত ব্যয় কৰিব দৰমহাৰ ধন
আৰক্ষীৰ মতে উক্ত উন্মত্ত দলটোৱে কেৱল চাজিদৰ ঘৰতে আক্ৰমণ সংঘটিত কৰা নাছিল অঞ্চলটোত থকা ব্যৱসায়িক প্ৰতিষ্ঠানসমূহকো বলপূৰ্বকভাৱে বন্ধ কৰি দিয়ে৷
এই সমগ্ৰ ঘটনাৰ বিৰুদ্ধে প্ৰথমে স্থানীয় আৰক্ষীয়ে কোনো ব্যৱস্থা নোলোৱাৰো অভিযোগ উঠিছে৷ ইতিমধ্যে আৰক্ষীৰ উদ্ধৰ্তন কৰ্তৃপক্ষই স্থানীয় ছিকেন্দ্ৰ আৰক্ষী থানাৰ বিষয়াক কৰ্তব্যত গাফিলতি কৰাৰ অভিযোগ নিলম্বনো কৰিছে৷
ইফালে আৰক্ষীয়ে প্ৰকাশ কৰা মতে পৰিয়াল লোকে যুৱতীগৰাকীক অপহৰণ কৰি নিয়া বুলি চাজিদৰ বিৰুদ্ধে আৰক্ষীৰ থানাত অভিযোগ দাখিল কৰিছিল৷
লগতে পঢ়ক খাদ্যত নিমখ বেছি! স্বামীয়ে পত্নীক, শহুৰেকে বোৱাৰীয়েক হত্যা
যোৱা সোমবাৰে পলায়ন কৰা যুৱতীগৰাকীক আৰক্ষীয়ে অভিযান চলাই দুদিনৰ পিছতে উদ্ধাৰ কৰিলেও তেওঁ প্ৰেমিক চাজিদৰ সৈতে স্বেচ্ছাৰে যোৱা বুলিহে প্ৰকাশ কৰিছে৷ অৱশ্যে চাজিদে এতিয়াও আত্মগোপন কৰি থকা বুলি আৰক্ষীয়ে সদৰী কৰিছে৷
ইফালে যুৱতীগৰাকীয়ে এটা ভিডিঅ’ত কয় যে তেওঁ এতিয়া প্ৰাপ্তবয়স্ক আৰু তেওঁলোকে দুয়োৱে ঘৰৰ গুচি যোৱাৰ সিদ্ধান্ত লৈছিল৷
লগতে পঢ়ক কংগ্ৰেছত যোগ দিব প্ৰশান্ত কিশোৰে! জল্পনা কল্পনাই কি কয়?
উৎসৱ উপলক্ষ্যে আদালত বন্ধ থকাৰ বাবে আৰক্ষীয়ে যুৱতীগৰাকীক আদালতত হাজিৰ কৰোৱাবলৈ সক্ষম হোৱা নাই যদিও আদালাতৰ কামকাজ পুনৰ আৰম্ভ হ’লেই যুৱতীগৰাকীক আদালতত হাজিৰ কৰোৱা হ’ব বুলি জনাইছে৷
আনহাতে, আৰক্ষীয়ে চাজিদৰ ঘৰত গণ আক্ৰমণ সংঘটিত কৰা লোকসকলৰ বিৰুদ্ধেও গোচৰ ৰুজু কৰা বুলি প্ৰকাশ কৰিছে৷ আক্ৰমণৰ ঘটনাত জড়িত সকলোকে গ্ৰেপ্তাৰ কৰা হ’ব বুলিও আৰক্ষীয়ে দৃঢ়তাৰে ঘোষণা কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
