ক্ৰীড়া ক্ষেত্ৰৰ পৰা গৈ সক্ৰিয় ৰাজনীতিত ভৰি দিলে দেশৰ প্ৰাক্তন আন্তঃৰাষ্ট্ৰীয় ক্ৰিকেটাৰ হৰভজন সিঙে৷
পঞ্জাৱত আম আদমি পাৰ্টিয়ে চৰকাৰৰ গঠন কৰাৰ পিছতে হৰভজন সিঙক ৰাজ্যসভালৈ নিৰ্বাচিত কৰা হ’ব বুলি আপৰ পঞ্জাৱৰ শাখাই ঘোষণা কৰিছিল৷ ইয়াৰ পিছতে পঞ্জাৱৰ পৰা প্ৰাক্তন আন্তঃৰাষ্ট্ৰীয় ক্ৰিকেটাৰগৰাকী ৰাজ্যসভালৈ নিৰ্বাচিত হয়৷
ৰাজ্যসভালৈ নিৰ্বাচিত হোৱাৰ পিছতে দেশৰ সৰ্বকালৰ অন্যতম এগৰাকীৰ সফল স্পীনাৰ হৰভজন সিঙে ৰাজ্যসভাৰ সাংসদ হিচাপে লাভ কৰা সমস্ত দৰমহা ধন কৃষকৰ কন্যাৰ শিক্ষাৰ বাবে ব্যয় কৰিব বুলি ঘোষণা কৰিছে৷
লগতে পঢ়ক কংগ্ৰেছত যোগ দিব প্ৰশান্ত কিশোৰে! জল্পনা কল্পনাই কি কয়?
‘‘ৰাজ্যসভাৰ এগৰাকী সাংসদ হিচাপে লাভ কৰা মোৰ দৰমহাৰ ধন কৃষকৰ কন্যাৰ শিক্ষা আৰু কল্যাণৰ বাবে ব্যয় কৰিম৷ মই দেশৰ উন্নতিৰ বাবে আৰু ভাল কাম কৰিম বুলি ৰাজনীতিত যোগ দিছো আৰু মই সাধ্যৰ মতে সকলোবোৰ কৰিম৷’’ নিজৰ টুইটাৰ হেণ্ডলত টুইট কৰি হৰভজন সিঙে এইদৰে কয়৷
উল্লেখ্য যে ৰাজনীতিলৈ অহাৰ পূৰ্বে বিভিন্ন বিতৰ্কত নাম সাঙুৰ খালেও হৰভজন সিঙে খেলি থকাৰ সময়ৰে পৰা বিভিন্ন ৰাজহুৱা অনুষ্ঠান প্ৰতিষ্ঠানৰ সৈতে জড়িত হৈ আহিছে৷
দেশৰ অন্যতম শ্ৰেষ্ঠ স্পীনাৰগৰাকীয়ে যোৱা বৰ্ষৰ ডিচেম্বৰত ক্ৰিকেটৰ সকলো ফৰ্মৰ পৰা অৱসৰ ঘোষণা কৰিছিল৷ আৰু ইয়াৰ পিছতে যোৱা মাৰ্চ মাহত আম আদমি পাৰ্টিৰ হৈ পঞ্জাৱৰ পৰা ৰাজ্যসভালৈ নিৰ্বাচিত হয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
