অপেক্ষা মাত্ৰ ৩-৪ বছৰৰ, ভাৰতৰ আকাশত আক্ৰমণ কৰিলেই মুহূৰ্তত ধ্বংস হ’ব শত্ৰুৰ মিছাইল

আয়ৰণ ডোমে কেনেকৈ কাম কৰে?

আয়ৰণ ডোম হৈছে বিশ্বৰ অন্যতম শক্তিধৰ আকাশী প্ৰতিৰোধ ব্যৱস্থা। আক্ৰমণ প্ৰতিৰোধৰ এই অস্ত্ৰৰ জন্ম ইজৰাইলতেই। সেই একেই অস্ত্ৰ ভাৰতেই অচিৰেই নিৰ্মাণ কৰি উলিয়াব। বিভিন্ন প্ৰতিবেদন অনুসৰি ভাৰতৰ নিজস্ব এই আকাশী প্ৰতিৰক্ষা ব্যৱস্থা প্ৰকল্পৰ নাম দিয়া হৈছে ‘প্ৰজেক্ট কুশ’। প্ৰজেক্ট কুশৰ দায়িত্বত আছে ভাৰতীয় প্ৰতিৰক্ষা গৱেষণা আৰু উন্নয়ন সংস্থা ‘ডিফেন্স ৰিচাৰ্ছ এণ্ড ডেভেলপমেণ্ট অৰ্গেনাইজেশ্ব্যনক। এই আয়ৰণ ডোমে শত্ৰুপক্ষৰ পৰা অহা ক্ৰুজ ক্ষেপনাস্ত্ৰ, ষ্টিলথ যুদ্ধবিমানৰ পৰা আৰম্ভ কৰি ড্ৰোণ আক্ৰমণৰ পৰা দেশক ৰক্ষা কৰিব। বিশেষজ্ঞৰ দাবী যে, প্ৰজেক্ট কুশ সম্পূৰ্ণ হ’লে কেৱল ইজৰাইলৰ আয়ৰণ ডোমেই নহয়, ৰাছিয়াৰ আকাশী প্ৰতিৰক্ষা ব্যৱস্থা এছ-৪০০ চিষ্টেম আৰু আমেৰিকাৰ পেট্ৰিয়টকৈয়ো বেছি কাৰ্যক্ষম হ’ব এই প্ৰজেক্ট কুশ।

কেনেকৈ কাম কৰিব ভাৰতীয় আকাশী প্ৰতিৰোধ ব্যৱস্থাই?

কুশ প্ৰকল্পৰ অধীনত তৈয়াৰ হোৱা এই দেশীয় প্ৰযুক্তিৰ প্ৰতিৰক্ষা ব্যৱস্থাত লং ৰেঞ্জ ছাৰফেছ টু এয়াৰ ডিফেন্স চিষ্টেমৰ মাজত আছে আকাশৰ বহু দূৰ দীগন্ত পৰ্যন্ত নজৰ ৰাখিব পৰা ক্ষমতা। বিভিন্ন প্ৰতিবেদন অনুসৰি, ১৫০ৰ পৰা ৩৫০ কিঃমিঃ দূৰত থকা ক্ষেপণাস্ত্ৰক চিহ্নিত কৰিব আৰু ধ্বংস কৰিবলৈ সক্ষম হ’ব এলআৰএছএএম। এল আৰ এছ এ এমত আছে ফায়াৰ কণ্ট্ৰল ৰাডাৰো। কৌশলগতভাৱে কাম কৰিবলৈ সক্ষম হ’ব ভাৰতীয় এয়াৰ ডিফেন্স চিষ্টেমে। বিভিন্ন সংবাদমাধ্যমৰ প্ৰতিবেদন অনুসৰি দুটা ক্ষেপনাস্ত্ৰ ওপৰাওপৰিকৈ আহিলেও এই এয়াৰ ডিফেন্স চিষ্টেমে প্ৰতিৰোধ কৰিব পাৰিব। এই প্ৰতিৰক্ষা ব্যৱস্থাৰ ক্ষেপণাস্ত্ৰ ধ্বংস কৰিব পৰা ক্ষমতা প্ৰায় ৯০ শতাংশ। আকাশী পৰিসীমাত কাঢ়া নজৰ প্ৰতিসময়তে থাকিব এই আয়ৰণ ডোমৰ। ৰকেট আক্ৰমণেই হওক বা ক্ষেপণাস্ত্ৰ বা ড্ৰোণ আক্ৰমণ সকলোবোৰৰ ওপৰতেই এই চিষ্টেমে নজৰ ৰাখিব।

দেশৰ মাটিত আক্ৰমণ চলাৰ পূৰ্বে আকাশতেই সেই লক্ষ্যবস্তুক নিশ্চিহ্ন কৰিব এল আৰ এছ এ এমে। মাটিৰ পৰা আকাশী আক্ৰমণক প্ৰতিৰোধ কৰিব পৰা এই প্ৰতিৰক্ষা ব্যৱস্থাই মূলত তিনিটা কাম কৰিব। ৰাডাৰৰ মাধ্যমেৰে লক্ষ্যবস্তুক চিহ্নিত কৰা, দ্ৰুতভাৱে সেই লক্ষ্যবস্তুক আঘাত কৰি ক্ষেপণাস্ত্ৰ আক্ৰমণ ৰোধ কৰা। এই ব্যৱস্থাই ভাৰতীয় বায়ুসেনাক আকাশীপথেৰে শত্ৰুৱে আক্ৰমণ কৰিলে শত্ৰুৰ আক্ৰমণৰ পৰা বায়ুসেনাকো ৰক্ষা কৰিব। শত্ৰুৰ আক্ৰমণৰ সময়ত এল আৰ এছ এ এম ভাৰতীয় বায়ুসেনাৰ সৈতে যৌথভাৱে কাম কৰিবলৈ সক্ষম বুলিও জনাইছে নিৰ্মাতাই। সামগ্ৰিকভাৱে আয়ৰণ ডোমৰ এই দেশীয় সংস্কৰণ আকাশীপথেৰে ভাৰতৰ প্ৰতিৰক্ষা ব্যৱস্থা বহুগুণ শক্তিশালী হ’ব। শত্ৰুবাহিনীৰ ক্ষেপণাস্ত্ৰক দূৰতেই ধ্বংস কৰিব ভাৰতীয় আকাশী নিৰাপত্তা ব্যৱস্থাই।

উল্লেখ্য যে, ভাৰতৰ হাতত ইতিমধ্যেই ৰাছিয়াৰ পৰা ক্ৰয় কৰা তিনিটা এছ-৪০০ বিমান প্ৰতিৰক্ষা ব্যৱস্থা আছে। বৰ্তমানলৈকে অৱশ্যে এই দুই প্ৰতিৰক্ষা ব্যৱস্তা এতিয়াও ৰাছিয়াৰ পৰা ভাৰতলৈ আহি পোৱা নাই। ৰাছিয়া-ইউক্ৰেইনৰ সংঘাতৰ বাবে তৈয়াৰ হোৱা জটিলতাৰ কাৰণে বৰ্তমানলৈকে ভাৰতলৈ আনিব পৰা হোৱা নাই এই দুই আকাশী প্ৰতিৰক্ষকক।

প্ৰজেক্ট কুশৰ বাবে ২১,৭০০ কোটি টকাৰ অনুমোদন পাইছে ডিআৰডিওয়ে। চৰকাৰী আৰু বেচৰকাৰী অংশীদাৰীসকলৰ সহায়ত তৈয়াৰ হ’ব এই প্ৰকল্প। প্ৰতিৰক্ষা মন্ত্ৰণালয়ৰ সূত্ৰৰ খবৰ অনুসৰি পাকিস্তান আৰু চীনৰ দৰে প্ৰতিবেশী দেশসমূহৰ পৰা আহি থকা ধমকিৰ কাৰণে ভাৰতৰ হাতত এয়াৰ ডিফেন্স চিষ্টেম থকাটো খুবেই জৰুৰীও। পাকিস্তানৰ হাতত এই ধৰণৰ প্ৰতিৰক্ষা ব্যৱস্থা বৰ্তমানলৈকে নাই যদিও চীনৰ হাতত এয়াৰ ডিফেন্স চিষ্টেম আছে। চীনৰ হাতত থকা এয়াৰ ডিফেন্স চিষ্টেমৰ ক্ষমতা ৰাছিয়াৰ হাতত থকা এছ-৪০০ চিষ্টেমতকৈ কম পৰিমানে শক্তিশালী। ভাৰতৰ এয়াৰ ডিফেন্স চিষ্টেম তৈয়াৰ হ’লে এয়া চীনতকৈয়ো শক্তিশালী হ’ব বুলি জনাইছে নিৰ্মাতাই।