অসম লাইভ ২৪ঃ শেহতীয়া বৰাক কাণ্ড সন্দৰ্ভত প্ৰতিক্ৰিয়া প্ৰকাশ যুক্তৰাজ্য অসম সাহিত্য সভা শাখাৰ৷ অসমৰ চাৰিসীমাৰ ভিতৰত অসমৰ চৰকাৰী ভাষাক অপমান কৰা কাৰ্যৰ বিৰুদ্ধে দৃষ্টান্তমূলক শাস্তিৰ দাবী যুক্তৰাজ্য সাহিত্য শাখাৰ৷ শিলচৰত অসমীয়া ভাষাৰ হৰ্ডিঙত ক’লা ৰং সনা দুষ্কৃতিকাৰীৰ বিৰুদ্ধে উচিত ব্যৱস্থা গ্ৰহণ কৰিবলৈ দাবী জনাই মুখ্যমন্ত্ৰীলৈ এক প্ৰস্তাৱ আগবঢ়াইছে সাহিত্য সভাৰ যুক্তৰাজ্য শাখাই৷ ‘অসমীয়া সমগ্ৰ অসমৰ বাবে গ্ৰহণযোগ্য চৰকাৰী ভাষা৷ ঠাইবিশেষে দ্বিতীয় চৰকাৰী অনুমোদিত ভাষা হ’লেও অসমীয়া ভাষাক ক’লা ৰং সানি অপমান কৰা কাৰ্য কেতিয়াও গ্ৰহণযোগ্য নহয়’৷ এক বিবৃতিযোগে এই কথা প্ৰকাশ কৰিছে যুক্তৰাজ্য অসম সাহিত্য সভাই৷ অসমীয়া ভাষা অসমৰ চৰকাৰী ভাষা৷ ইয়াত কাৰো দ্বিমত হোৱাৰ কাৰণ নাই৷ গতিকে ভাষাকেন্দ্ৰিক এই বিতৰ্কৰ ওৰ পেলাবলৈ চৰকাৰ তথা ৰাইজলৈ আহ্বান জনাইছে সাহিত্য সভাৰ যুক্তৰাজ্য শাখাই৷ উল্লেখ্য, বৰাক আৰু ব্ৰহ্মপুত্ৰ উপত্যাকাত অংকুৰ শ্ৰেণীৰ পৰা উচ্চতৰ মাধ্যমিকলৈ অসমীয়া ভাষা বাধ্যতামূলক কৰিবলৈও পূৰ্বে মুখ্যমন্ত্ৰীলৈ অনুৰোধ জনাইছিল সাহিত্য সভাৰ যুক্তৰাজ্য শাখাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
