অখিল গগৈলৈ এটা ডাঙৰ উপহাৰ, লুৰীণলৈ মিডিয়াম…
‘মুখ্যমন্ত্ৰী শৰ্মাৰ এজেণ্ট দুই গগৈ অখিল-লুৰীণলৈ ডাঙৰ ডাঙৰ মিঠাইৰ টোপোলা পঠিয়াম।’ অখিল গগৈ আৰু লুৰীণজ্যোতি গগৈলৈ মিঠাইৰ টোপোলা কোনে পঠিয়াব, আজি সাংবাদিকৰ আগত মিঠাইৰ টোপোলাৰ কথা সদৰি কৰে এ আই ইউ ডি এফ মুৰব্বী মৌলানা বদৰুদ্দিন আজমলে।
শিৱসাগৰৰ বিধায়ক অখিল গগৈলৈ এটা ডাঙৰ মিঠাইৰ টোপোলা পঠিয়াব বদৰুদ্দিন আজমলে। অকল অখিল গগৈলৈয়ে নহয়, অসম জাতীয় পৰিষদৰ সভাপতি তথা ডিব্ৰুগড় লোকসভা সমষ্টিৰ কংগ্ৰেছ সমৰ্থিত প্ৰাৰ্থী লুৰীণজ্যোতি গগৈলৈও উপহাৰ টোপোলা পঠিয়াব আজমলে।
অৱশ্যে, অখিল গগৈতকৈ আকাৰত সৰু মিঠাইৰ টোপোলা পঠিয়াব এআইইউডিএফৰ মুৰব্বীগৰাকীয়ে। মিঠাই পঠিওৱা তালিকাত প্ৰদেশ কংগ্ৰেছৰ সভাপতি ভূপেন বৰা আৰু ধুবুৰীৰ আজমলৰ বিৰুদ্ধে কংগ্ৰেছৰ হৈ প্ৰতিদ্বন্দ্বিতা কৰা ৰকিবুলৰ নামো আছে। আজি গুৱাহাটীত সাংবাদিকৰে হোৱা বাৰ্তালাপত বদৰুদ্দিন আজমলে এই কথা ঘোষণা কৰে।
অখিল গগৈ আৰু লুৰীণজ্যোতি গগৈক টাৰ্গেট হিচাপে লৈ আজমলে দুয়ো গগৈক মুখ্যমন্ত্ৰী হিমন্ত বিশ্ব শৰ্মাৰ এজেণ্টৰূপে অভিহিত কৰে। এই দুই গগৈয়ে মুখ্যমন্ত্ৰী হিমন্ত বিশ্ব শৰ্মাৰ পৰা ধন লৈ বিজেপিৰ হৈ কাম কৰি থকাৰ গুৰুতৰ অভিযোগ আনে আজমলে।
ইফালে, ধুবুৰী লোকসভা সমষ্টিৰ নিৰ্বাচনী ফলাফলক লৈ মন্তব্য কৰি নিজৰ জয় নিশ্চিত বুলি আজমলে দাবী কৰে। অৱশ্যে, পূৰ্বতকৈ এইবাৰ ভোটৰ ব্যৱধান হ্ৰাস পাব বুলিও উল্লেখ কৰে। উল্লেখ্য যে একেৰাহে জয়ৰ হেট্ৰিক গঢ়ি চতুৰ্থবাৰৰ বাবে বদৰুদ্দিন আজমল ধুবুৰীত নিৰ্বাচনত অৱতীৰ্ণ হৈছে।
কিন্তু, এইবেলি কংগ্ৰেছৰ প্ৰাৰ্থী ৰকিবুল হুছেইনৰ পৰা তীব্ৰ প্ৰত্যাহ্বানৰ সন্মুখীন হৈছে সংখ্যালঘু নেতাগৰাকী। ধুবুৰীত কেইবাজনো প্ৰাৰ্থী আছে যদিও আজমল, ৰকিবুল আৰু অগপ প্ৰাৰ্থী জাবেদ ইছলাম বিশেষ চৰ্চালৈ আহিছিল। শেষ মুহূৰ্তত সমষ্টিটোত আজমল আৰু ৰকিবুলৰ মাজত প্ৰতিদ্বন্দ্বিতা সীমিত থকাৰ সম্ভাৱনাই অধিক।
ধুবুৰীত আজমলৰ বিৰুদ্ধে প্ৰতিষ্ঠান/অধিষ্ঠানবিৰোধী ঢৌক অস্ত্ৰ হিচাপে লৈ মিত্ৰদলৰ কংগ্ৰেছৰ প্ৰাৰ্থী ৰকিবুল হুছেইনৰ হৈ সমষ্টিটোৰ চূকে-কোণে অখিল গগৈ আৰু লুৰীণজ্যোতি গগৈয়ে প্ৰচাৰ চলাইছিল। সংখ্যালঘু এলেকাত অখিলৰ জনপ্ৰিয়তাক কামত লগাইছিল শিৱসাগৰৰ বিধায়কজনে। সেই সময়তেই অখিল হিমন্ত বিশ্ব শৰ্মাৰ ১ নম্বৰ এজেণ্টৰূপে অভিহিত কৰে আজমলে। সেয়ে ৪ জুনৰ পাছত অখিল আৰু লুৰীণলৈ মিঠাইৰ টোপোলা পঠিয়াব বুলি সাংবাদিকৰ সন্মুখত সদৰী কৰি আজমলে তেওঁৰ জয় নিশ্চিত বুলি দাবী কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
