ICC ৰ চেয়াৰমেন হ’ল জয় শ্বাহ৷ ২৭ আগষ্ট, মঙলবাৰ আছিল মনোনয়ন জমা দিয়াৰ শেষ দিন৷ শ্বাহৰ বাদে কোনোৱে ইয়াৰবাবে মনোনয়ন জমা নিদিলে৷ ফলত বিনা প্ৰতিদ্বন্দিতাৰে জয়ী হৈছে তেওঁ৷ শ্বাহৰ নাম ইতিমধ্যে ঘোষণা কৰিছে ICCয়ে৷ বিশ্ব ক্ৰিকেটৰ ইতিহাসত সৰ্বকনিষ্ঠ চেয়াৰমেন হৈছে শ্বাহ৷ মাত্ৰ ৩৫ বছৰ বয়সত এই দায়িত্বভাৰ গ্ৰহণ কৰিছে জয় শ্বাহে৷
ভাৰতৰ পৰা পূৰ্বে ৪জন আই চি চিৰ চেয়াৰমেন হৈছে৷ জগমোহন ডালমিয়া, শৰদ পাৱাৰ, এন শ্ৰীনিৱাসন আৰু শশাংক মনোহৰ BCCIৰ পৰা আই চি চি লৈ গৈছে৷ পঞ্চম চেয়াৰমেন হৈছে শ্বাহ৷ চলিত বছৰ ১ ডিচেম্বৰৰ পৰা নতুন দায়িত্ব ল’ব তেওঁ৷ তৃতীয় বাৰৰ বাবে আই চিচিৰ চেয়াৰমেন হ’ব নুখুজিলে গ্ৰেগ বাৰ্কলে৷ নৱেম্বৰ মাহত তেওঁৰ ম্যাদ শেষ হৈছে৷ পৰবৰ্তী চেয়াৰমেন কোন হ’ব বিষয়টোক লৈ বহু দিন ধৰি জল্পনাও চলি আছিল৷ দৌৰত অৱশ্যে তেতিয়াৰে পৰাই আগুৱাই আছিল জয় শ্বাহ৷ এইবাৰ সেই সম্ভাৱনাত চিলমোহৰ পৰিল৷ আগন্তুক ৬ বছৰ ICCৰ অধ্যক্ষ পদ শুৱনি কৰিব জয় শ্বাহে৷
নতুন দায়িত্ব লাভ কৰি সুখী হৈ কয়, ‘আই চি চিৰ চেয়াৰমেন হৈ মই খুব সুখী৷ বিশ্বজুৰি ক্ৰিকেটৰ উন্নতিৰ বাবে মই কাম কৰি যাম৷ মই এনে এক সময়ত দায়িত্ব লৈছো য’ত ক্ৰিকেটৰ বিভিন্ন ফৰমেটৰ মাজত ভাৰসাম্যৰ প্ৰয়োজনীয়তা আছে৷ একেলগে ক্ৰিকেটৰ নতুন নতুন প্ৰযুক্তিও আহিছে৷ ক্ৰিকেটৰ বজাৰখন বাঢ়িছে৷ এই পৰিস্থিতিত ক্ৰিকেটত আৰু কৰিবলগীয়া বহু কাম আছে৷ আমি সেই কাম আৰম্ভ কৰিম৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
