অতিকে শোকাৱহ পথ দুৰ্ঘটনা, একেলগে প্ৰাণ হেৰুৱালে ৫ বন্ধুৱে
আজি দেওবাৰে পুৱাই সংঘটিত হোৱা এক ভয়ংকৰ পথ দুৰ্ঘটনাত একেলগে প্ৰাণ হেৰুৱালে ৫ বন্ধুৱে। ৪ বন্ধুৱে ঘটনাস্থলীতে প্ৰাণ হেৰুৱাৰ লগতে এগৰাকীয়ে হাস্পতালত চিকিৎসাধীন অৱস্থাত প্ৰাণ হেৰুৱাই।
এই শোকাৱহ পথ দুৰ্ঘটনাটো সংঘটিত হৈছে চত্তীশগড়ৰ অম্বিকাপুৰত। এখন চাৰিচকীয়া বাহনত গৈ আছিল ৫ বন্ধু। সেই বাহন খনত এখন ট্ৰাকে প্ৰচণ্ড জোৰে খুন্দা মৰাৰ ফলতে এই দুৰ্ঘটনাটো সংঘটিত হয়।
ঘটনা সন্দৰ্ভত জানিব পৰা মতে, চত্তীশগড়ৰ অম্বিকাপুৰ বিলাছপুৰৰ মাজত ১৩০ নং ৰাষ্ট্ৰীয় ঘাইপথত পুৱা প্ৰায় ৫.৩০ মান বজাত এই দুৰ্ঘটনাটো সংঘটিত হয়। সেই পথতে সেই সময়তে অম্বিকাপুৰৰ পৰা বিলাছপুৰ গৈ আছিল ট্ৰাকখন। আনহাতে ৫ বন্ধু ৰায়পুৰৰ পৰা অম্বিকাপুৰ গৈ আছিল।
সেই সময়তে অম্বিকাপুৰ পোৱাৰ ঠিক পূৰ্বে দুয়োখন বাহনৰ প্ৰচণ্ড জোৰে মুখামুখি সংঘৰ্ষ সংঘটিত হয়। সেই দুৰ্ঘটনাত ট্ৰাক একেবাৰে বাহনখন ভাঙি ঠেকেচা কৰি বাহনৰ ওপৰত উঠে। যাৰ ফলতে বাহনখনত থকা ৪ জনৰ ঘটনাস্থলীত মৃত্যু হোৱাৰ লগতে এগৰাকীৰ অৱস্থা সংকটজনক হৈ পৰে।
ততাতৈয়াকৈ সেইজনকো উদ্ধাৰ কৰি হাস্পতাললৈ নিয়া হয় যদিও হাস্পতালত মৃত্যুক সাৱটি লয়। জানিব পৰা মতে, মৃত্যু হোৱা বন্ধু কেইজনৰ বয়স ২৫ৰ পৰা ৩৫ ৰ ভিতৰত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
