অসম লাইভ২৪ঃ
নিশাৰে পৰা ৰাজ্যত আৰম্ভ হৈছে বাল্যবিবাহ বিৰোধী অভিযান।
কাৰোবাৰ যদি কোলাত দুমহীয়া সন্তান, আন কোনোবা আকৌ ৭ মহীয়া অন্তঃসত্বা
স্বামীগৰাকীয়েই তেওঁলোকৰ ভৱিষ্যত, ভৰষা, দুবেলা দুমুঠি যোগান ধৰিছিল স্বামীগৰাকীয়ে।
বাল্য বিবাহ কৰাইয়ো একোখন সুখৰ সংসাৰ আছিল।
পাৰিবাৰিক জীৱনত যে অশান্তি আছিল তেনে নহয়, বহুতেই সুখী আছিল তেওঁলোকৰ বৈবাহিক জীৱনক লৈ।
কিন্তু এটা নিশাতেই সলনি হৈছে কথাবোৰ, মুখ্যমন্ত্ৰীৰ মাত্ৰ এটা সিদ্ধান্তই এতিয়া শংকিত কৰিছে বহু বোৱাৰীক।
বাল্য বিবাহ ৰোধৰ বাবে মুখ্যমন্ত্ৰীয়ে অবৈধ স্বামীৰ বিৰুদ্ধে ঘোষণা কৰিছিল অভিযান।
বৃহস্পতিবাৰে নিশাৰে পৰা ৰাজ্যৰ ৪ হাজাৰৰো অধিক বাল্য বিবাহ কৰা স্বামীৰ বিৰুদ্ধে অভিযান চলায় আৰক্ষীয়ে।
কাৰোবাক যদি ঘৰৰ পৰা, কাৰোবাক আকৌ বাটৰ পৰাই আটক কৰি থানালৈ লৈ গৈছে আৰক্ষীয়ে।
স্বামীক গ্ৰেপ্তাৰ কৰাৰ পাছতেই বহু পত্নীয়েই এতিয়া কান্দোনত ভাঙি পৰিছে।
বহুতেই আৰক্ষী থানাৰ সন্মুখত স্বামীক গ্ৰেপ্তাৰৰ বিৰুদ্ধে ক্ষোভ উজাৰিছে।
বহু মাতৃয়ে পুত্ৰৰ হৈ প্ৰতিবাদ সাব্যস্ত কৰি ৰাজপথলৈ ওলাই আহিছে।
তাৰ মাজৰেই এগৰাকী মহিলাই থানাৰ সন্মুখত কান্দি কান্দি কৈছে-‘মই ৭ মাহৰ অন্তঃসত্বা’।
মহিলাগৰাকীয়ে কোৱা অনুসৰি, আমাৰ হাইকাজিয়া নাই। কম বয়সতে হ’লেও প্ৰেমত পৰিয়েই ইজনে আনজনক নিজৰ কৰি লৈছিলো।’
যাৰ ভৰষাত তেওঁ জীৱনটো কটাব বিচাৰিছিল, তেওঁকেই নি কাৰাগাৰত বন্দী কৰি ৰখাত এতিয়া ভাগি পৰিছে।
মহিলাগৰাকীয়ে আৰক্ষীক হুংকাৰ দি কৈছে- ‘মানুহজনৰ সৈতে মোকো জে’লত ভৰাই থওক, নহ’লে আৰক্ষীৰ গাড়ীৰ আগত পৰি প্ৰাণ দিম।’
গহপুৰৰ এগৰাকী বোৱাৰীয়েও কান্দি কান্দি পথলৈ ওলাই আহিছে, স্বামীক আৰক্ষীয়ে ধৰি নিয়াৰ বাবে।
এটি কণমানি সন্তানৰ মাতৃ এই বোৱাৰীগৰাকীও স্বামীৰ সৈতে সুখী আছিল।
বোৱাৰীগৰাকীয়ে দাবী কৰা অনুযায়ী, বুজাপৰাৰ মাজেৰে সুখেৰেই চলিছিল তেওঁলোকৰ বৈবাহিক জীৱন।
মাতৃগৃহলৈ উভতিও যাব নোৱাৰে। এবাৰ বিয়া হৈ গুচি অহাৰ পিছত মাতৃগৃহলৈ বা আঁকোৱালি ল’ব কিয়?
বোৱাৰীগৰাকীয়ে কোৱা অনুসৰি, ‘চৰকাৰে নতুন আইন আনিছে ভাল কথা। সেয়া ২০২৩ চনৰ পৰা জাৰি কৰক। কিন্তু পূৰ্বৰে পৰা কিয়? যেতিয়া এনে বাল্য বিবাহ হৈছিল, তেতিয়া চৰকাৰে কি কৰি আছিল?’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
