অসম লাইভ২৪ঃআগন্তুক ২০ অক্টোবৰৰ পৰা আৰম্ভ হ’ব দুৰ্গাপুজা। ২০ অক্টোবৰত মহাষষ্ঠী। ইয়াৰপাছতে ক্ৰমে ২১ অক্টোবৰত সপ্তমী, ২২ অক্টোবৰত অষ্টমী, ২৩ অক্টোবৰত নৱমী আৰু ২৪ অক্টোবৰত বিজয়া দশমী। সেইদিনাই মৰ্ত্যলোক এৰি পুত্ৰ-কন্যাসহ কৈলাশলৈ উভতি যাব দেৱী দুৰ্গা। ইতিমধ্যে বিভিন্নস্থানত বহু পুজা কমিটিয়ে আৰম্ভ কৰিছে মন্দিৰ সজাৰ যো-জা। কুমাৰসকলেও মূৰ্তী নিৰ্মাণৰ কাম ইতিমধ্যে হাতত ল’বলৈ আৰম্ভ কৰিছে।
১৪ অক্টোবৰত মহালয়া। মহালয়াৰ পৰাই দেৱীপক্ষ আৰম্ভ হয়। দুৰ্গাৰ আগমন আৰু প্ৰস্থানক লৈ বহু প্ৰবাদ আমাৰ সমাজত প্ৰচলিত হৈ আছে। দেৱী দুৰ্গা আৰু তেওঁৰ পুত্ৰ-কন্যাৰ নিজস্ব বাহন থাকিলেও মৰ্তলৈ আগমন আৰু প্ৰস্থানত সেই বাহন ব্যৱহাৰ নকৰে দেৱীয়ে। হিন্দুশাস্ত্ৰ অনুযায়ী, দুৰ্গাৰ আগমন আৰু প্ৰস্থানৰ বাহনেই নিৰ্ণয় কৰে মৰ্তবাসীৰ বছৰটো কেনেদৰে যাব। প্ৰতিবছৰে দুৰ্গাৰ আগমন আৰু প্ৰস্থান সাধাৰণতে একেই বাহন নহয়। যদি কোনো দেৱীৰ আগমন আৰু প্ৰস্থানৰ বাহন একেই হয় তেন্তে সেই কথাই অশুভ ইংগিত বহন কৰে। এই বৰ্ষত দেৱীৰ অহা-যোৱা বাহন একেখনেই। দেৱীৰ আগমনো ঘোঁৰাত আৰু প্ৰস্থানো ঘোঁৰাতেই হ’ব। ফলত আগন্তুত এবছৰ মৰ্তবাসীৰ মাজত অশুভ প্ৰভাৱ থাকিব।
পঞ্জিকা অনুসৰি পুজাৰ সপ্তমীত দেৱীৰ আগমন হয়। আৰু গমন হয় দশমীত। এই দুুই দিন সপ্তাহৰ কি কি বাৰ পৰে সেই বিষয়টোৰ ওপৰতেই নিৰ্ভৰ কৰে দেৱীৰ বাহন কি হ’ব। শাস্ত্ৰ অনুসৰি সপ্তমী, ৰবি আৰু সোমবাৰ হ’লে দেৱীৰ বাহন হয় গজ বা হাতী। সপ্তমী শনি বা মঙলবাৰ দৰে দেৱীৰ বাহন হয় ঘোঁৰা। সপ্তমী বৃহস্পতিবাৰ বা শুকুৰবাৰ হ’লে দেৱীৰ বাহন হয় দোলা বা পাল্কি। সপ্তমী বুধবাৰ হ’লে দেৱীৰ বাহন হয় নৌকা। একেদৰে দশমী দেওবাৰ বা সোমবাৰ হ’লে দেৱীৰ বাহন হয় গজ বা হাতী। দশমী শনিবাৰ বা মঙলবাৰ হ’লে দেৱীয়ে ঘোঁৰাত বিদায় লয়। দশমী বৃহস্পতিবাৰ বা শুকুৰবাৰ হ’লে দেৱীৰ গমন হয় দোলাত। আৰু দশমী বুধবাৰ হ’লে দেৱীয়ে নৌকাত গমন কৰে।
এই বৰ্ষত ২১ অক্টোবৰত সপ্তমী। সপ্তমী পৰিছে শনিবাৰে। অৰ্থাৎ এইবাৰ দুৰ্গাৰ আগমন হ’ব ঘোঁৰাত। আগন্তুক ২৪ অক্টোবৰ মঙলবাৰে বিজয়া দশমী। মা দুৰ্গাই পুত্ৰ-কন্যাসহ কৈলাশলৈ উভতি যাব ঘোঁৰাৰ পিঠিতেই। শাস্ত্ৰমতে দুৰ্গা যদি ঘোঁৰাত যায় তেন্তে “ছত্র ভঙ্গ স্তুৰঙ্গমে” অৰ্থাৎ সামাজিক, ৰাজনৈতিক আৰু সামৰিক অস্থিৰতা বৃদ্ধি পাব। ইয়াৰ ফলত ৰাষ্ট্ৰ আৰু ৰাষ্ট্ৰৰ মাজত যুদ্ধ চলিব। সামাজিক আৰু ৰাজনৈতিক ক্ষেত্ৰত ধ্বংস বা অস্থিৰতাই বিৰাজ কৰিব। এক কথাত ‘ছত্রভঙ্গম’।
উল্লেখ্য যে গজ অৰ্থাৎ হাতী দেৱীৰ উৎকৃষ্ট বাহন। দেৱীৰ আগমন বা গমন হাতীত হ’লে মৰ্ত্যলোক সুখ-শান্তি-সমৃদ্ধিৰে ভৰি পৰে। ভক্তসকলৰ মনোবাঞ্ছা পূৰণ হয়। পৰিশ্ৰমৰ সুফল পায় মৰ্তলোকৰ অধিবাসীগণে। অতিবৃষ্টি আৰু অনাবৃষ্টি নহয়, যিমান পৰিমানৰ বৰ্ষণৰ প্ৰয়োজন সিমানেই হয়। সপ্তমী বা দশমী যদি বৃহস্পতিবাৰ বা শুকুৰবাৰে হয় তেন্তে দেৱীৰ দোলাত আগমন হয়। ফলত “দোলায়াং মকৰং ভবৎ” অৰ্থাৎ মহামাৰী, ভূমিকম্প, খৰাং, যুদ্ধ আৰু অতিমৃত্যুৰ লক্ষণ। দোলা বা পালকিত সূচিত হয় ভয়ংকৰ মহামাৰী। বিপুল প্ৰাণহানী অনিবাৰ্য। সপ্তমী বা দশমী বুধবাৰ হ’লে দেৱীয়ে নৌকাত অহা-যোৱা কৰে। ফলত “শস্য বুদ্ধিস্তথাজলম”। অৰ্থাৎ প্ৰৱল বান বা খৰাং হ’ব পাৰে। নৌকাত আগমনে মৰ্তবাসীৰ মনোকামনা পূৰণ কৰে। ধৰিত্ৰী শস্য-শ্যামলা হৈ উঠে। কিন্তু ইয়াৰ সৈতে অতি বৃষ্টিৰ ফলত বানৰ আশংকা বৃদ্ধি কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
