এটকা দুটকা নহয় কেইবাকোটি টকীয়া প্ৰতাৰণাৰ কেলেংকাৰীত নাম সাঙোৰ খাইছে এইবাৰ বিবেক অৱেৰয়ৰ। আৰ্থিক প্ৰতাৰণাৰ কেলেংকাৰীৰ তদন্তত নামি ১৯.৬১ কোটিৰ সম্পত্তি বাজেয়াপ্ত কৰিছে মুম্বাইৰ এনফোৰ্ছমেণ্ট ডাইৰেক্টৰে। যাৰ সৈতে কেইবাটাও পৰিচালক গোষ্টী আৰু ব্যক্তিও জড়িত হৈ আছে। কৰ্ম ডেভলপাৰ্ছ নামৰ এটা সংস্থাই মধ্যবিত্তৰ বাবে কম মূল্যৰ ঘৰ নিৰ্মাণৰ প্ৰকল্পৰ প্ৰতিশ্ৰুতি দি প্ৰতাৰণা কৰিছে বহুজনক। ২০২৩ চনত বোম্বে হাইকৰ্টে এই বিষয়ে মহাৰাষ্ট্ৰ আৰক্ষীৰ ভূমিকাক লৈ ক্ষোভ প্ৰকাশ কৰিছিল।
চাঞ্চল্যকৰ বিষয় এয়াই যে অভিনেতা বিবেক অবেৰয়ো এই প্ৰকল্পৰ অন্যতম অংশীদাৰ। তেওঁ নিজেই কৰ্ম ৰেছিডেন্সি, কৰ্ম পঞ্চতত্ব আৰু কৰ্ম ব্ৰহ্মাণ্ডৰ দৰে প্ৰকল্পৰ প্ৰচাৰো কৰিছে। কিন্তু ১১৫০০ ৰো বেছি ক্ৰেতাই আজিও তেওঁলোকৰ ঘৰ লাভ কৰিবলৈ সক্ষম হোৱা নাই।
খবৰ অনুসৰি কৰ্ম ইনফাষ্ট্ৰাকচাৰ নামৰ এই সংস্থাই মিছন ৩৬০ নামেৰে প্ৰচাৰ চলাই গ্ৰাহকক আকৃষ্ট কৰিছিল। কিন্তু তদন্তত পোহৰলৈ আহে যে তেওঁলোকে নকল নথি বনাই কৃষিমাটিক আবাসনৰ মাটি বুলি বিক্ৰিও কৰিছিল। ফলত হাজাৰ হাজাৰ ক্ৰেতাই তেওঁলোকৰ কষ্টাৰ্জিত টকা হেৰুৱাইছে। এই বিষয়ত ইডিৰ সাম্প্ৰতিক পদক্ষেপৰ পাচত প্ৰতাৰিত গৃহক্ৰেতাই দাবী তুলিছে যে দোষীসকলক কঠোৰ শাস্তি আৰু যিসকলে ধন সম্পত্তি হেৰুৱাইছে তেওঁলোকক ক্ষতিপূৰণ দিয়া হওক।
ইফালে বিতৰ্কত নাম সাঙোৰ খোৱা বিবেক অবেৰয় এতিয়া কেৰিয়াৰক লৈ ব্যস্ত। চিনেমা কেৰিয়াৰত তেওঁ শেহতীয়াকৈ লুছিফাৰৰ ভিলেন বৰিৰ চৰিত্ৰত প্ৰশংসা বুটলিব পৰাকৈ অভিনয় কৰিছে। এতিয়া তেওঁ মোহনলালৰ এল ২ এমপুৰাণ ছবিক লৈ ব্যস্ত। কিন্তু ইয়াৰ মাজতেই প্ৰশ্ন উঠিছে এই কেলেংকাৰীত অবেৰয়ৰ ভূমিকা কি! তেওঁৰ নাম সাঙোৰ খোৱাক লৈ কি হব তেওঁৰ প্ৰতিক্ৰিয়া সেয়া জানিবলৈহে আগ্ৰহী এতিয়া বহুজন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
