এলন মাস্কৰ Starlink-এ এতিয়া বাংলাদেশৰ জৰিয়তে নেপাল আৰু ভূটানলৈ ছেটেলাইট ইণ্টাৰনেট সেৱা আগবঢ়াব পাৰিব। ইতিমধ্যে বাংলাদেশ চৰকাৰে Starlinkক ইয়াৰ অনুমতি দিছে। অৱশ্যে Starlinkৰ এই ইণ্টাৰনেট সেৱা বাংলাদেশৰ সাধাৰণ নাগৰিকৰ বাবে উপলব্ধ নহ’ব, Starlink-এ কেৱল চুবুৰীয়া দেশসমূহলৈ সেৱা আগবঢ়োৱাৰ বাবেহে বাংলাদেশক ব্যৱহাৰ কৰিব।
কি আছে Starlink-ৰে হোৱা এই চুক্তিত?
বাংলাদেশ টেলিকম নিয়ন্ত্ৰক সংস্থা BTRC-এ Starlinkক International Private Leased Circuit (IPLC)-ৰ জৰিয়তে চুবুৰীয়া দেশলৈ ইণ্টাৰনেট ডাটা প্ৰেৰণ কৰাৰ অনুমতি দিছে। এই ব্যৱস্থাত বাংলাদেশৰ চৰকাৰী সংস্থা Bangladesh Submarine Cable Company Limited (BSCCL)-এ তিনি বছৰৰ বাবে Starlinkক মূল বেণ্ডউইড্থ যোগান ধৰিব। যদি কোনো কাৰণত BSCCL-ৰ সেৱাত বিঘিনি ঘটে, তেন্তে Starlink-এ বাংলাদেশৰ ব্যক্তিগত ইণ্টাৰনেট কোম্পানীসমূহৰ পৰাও বেণ্ডউইড্থ ল’ব পাৰিব। বাংলাদেশৰ বাবে এই সিদ্ধান্তৰ মূল উদ্দেশ্য হৈছে বাংলাদেশৰ টেলিকম খণ্ডক বিদেশী মুদ্ৰা উপাৰ্জনৰ সুযোগ দিয়া।
এই ব্যৱস্থাৰ বিশেষত্ব কি?
বাংলাদেশৰ জৰিয়তে নেপাল আৰু ভূটানলৈ Starlink-এ ইণ্টাৰনেট Unfiltered Bandwidth পঠিয়াব অৰ্থাৎ এই ডাটাৰ ওপৰত কোনো ধৰণৰ চৰকাৰী ফায়াৰৱাল, ব্লকিং বা নিয়ন্ত্ৰণ নাথাকিব। কিন্তু এই সুবিধা বাংলাদেশৰ ভিতৰত থকা গ্ৰাহক বা বিদেশী পৰ্যটকে ব্যৱহাৰ কৰিব নোৱাৰিব। এই সংযোগ কেৱল আন দেশলৈ ইণ্টাৰনেট সেৱা প্ৰেৰণৰ বাবেহে ব্যৱহাৰ কৰা হ’ব।
ভাৰতত Starlink আৰম্ভ হোৱাত বিলম্বৰ কাৰণ কি?
ভাৰতত Starlinkক ইতিমধ্যে In-Principle Licence দিয়া হৈছে আৰু কোম্পানীটোৱে কেন্দ্ৰীয় চৰকাৰৰ সৈতে আলোচনা অব্যাহত ৰাখিছে। কিন্তু বাণিজ্যিকভাৱে সেৱা আৰম্ভ হ’বলৈ এতিয়াও কিছু সময় লাগিব। ইয়াৰ মূল কাৰণসমূহ হ’ল—সুৰক্ষা সংস্থাৰ অনুমোদন এতিয়াও সম্পূৰ্ণ হোৱা নাই। ছেটেলাইট স্পেকট্ৰাম আবণ্টনৰ প্ৰক্ৰিয়া সম্পূৰ্ণ হোৱা নাই। ইযাৰ উপৰিও বিদেশী ছেটেলাইট টাৰ্মিনেলৰ সুৰক্ষা, ডাটা ট্ৰেফিকৰ নিৰীক্ষণ আৰু ৰাষ্ট্ৰীয় সুৰক্ষাৰ বিষয়ত চৰকাৰে সম্পূৰ্ণ নিশ্চিত হ’ব বিচাৰে।
বাংলাদেশত Starlinkৰ কাম আৰম্ভ
Starlink-এ ২০২৫ চনৰ ২৯ এপ্ৰিলত বাংলাদেশত Non-Geostationary Satellite Orbit Services-ৰ পঞ্জীয়ন লাভ কৰিছিল। তাৰ পিছতে আগষ্টৰ পৰা দেশখনত এলন মাস্কৰ Starlink-এ সেৱা আৰম্ভ কৰে। চুবুৰীয়া দেশলৈ ইণ্টাৰনেট যোগান ধৰাৰ অনুমতি দিয়াৰ সময়ত বাংলাদেশে কঠোৰ সুৰক্ষা নিয়মো আৰোপ কৰিছে। Starlinkক এনে ব্যৱস্থা গঢ়ি তুলিবলৈ কোৱা হৈছে যাতে বাংলাদেশৰ ঘৰুৱা ডাটা আৰু বিদেশলৈ যোৱা ডাটা সম্পূৰ্ণ পৃথক থাকে। ইয়াৰ লগতে কোম্পানীটোৱে বাংলাদেশৰ চৰকাৰী সংস্থাসমূহক API (Application Programming Interface)-ও প্ৰদান কৰিছে, যাতে প্ৰয়োজন অনুসৰি ঘৰুৱা গ্ৰাহকৰ তথ্যৰ ওপৰত নিৰীক্ষণ চলাব পৰা যায়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
