অভিনেতা তথা ভাৰতীয় জনতা পাৰ্টীৰ নেতা ৰবি কিষানে শুকুৰবাৰে লোকসভাত জনসংখ্যা নিয়ন্ত্ৰণৰ বাবে এখন বিধেয়ক উত্থাপন কৰিব বুলি ঘোষণা কৰিব বুলি জানিবলৈ দিয়ে। শুকুৰবাৰে উত্তৰ প্ৰদেশৰ গোৰখপুৰ সংসদীয় সমষ্টিৰ সাংসদগৰাকী এই কথা সদৰী কৰে৷
বিজেপিৰ সাংসদ তথা অভিনেতাগৰাকীয়ে এই কথা সদৰী কৰাৰ পিছতে ৰবি কিষাণ ট্ৰলৰ সন্মুখীন হৈছে৷
উল্লেখ্য যে ভোজপুৰী চিনেমাৰ হিৰ’ তথা বৰ্তমান লোকসভাৰ সাংসদ ৰবি কিষাণ নিজেই চাৰি সন্তানৰ পিতৃ৷ কিষাণ আৰু তেওঁৰ পত্নী প্ৰীতিৰ তিনিগৰাকী কন্যা আৰু এজন পুত্ৰসহ চাৰি সন্তান আছে। চাৰি সন্তানৰ পিতৃৰ মুখত এয়া যেন ভূতৰ মুখত ৰাম লোৱাৰ দৰে কথা!
লগতে পঢ়ক মন্দিৰৰ সমীপতে ট্ৰেন্স মহিলাক দলৱদ্ধ ধৰ্ষণ, ৮ অভিযুক্তক গ্ৰেপ্তাৰ আৰক্ষীৰ
ৰবি কিষাণৰ উদ্ধৃতি দি সংবাদ সংস্থা এ এন আইএ কয় যে জনসংখ্যা নিয়ন্ত্ৰণ বিধেয়ক আনিলেহে ভাৰত বিশ্ব গুৰু হ’ব পাৰিব। জনসংখ্যা নিয়ন্ত্ৰণলৈ অনাটো অতি গুৰুত্বপূৰ্ণ।
কিষাণে লগতে কয়, ‘‘যি ধৰণেৰে ই(জনসংখ্যা) বৃদ্ধি পাইছে, আমি জনবিস্ফোৰণৰ দিশে আগবাঢ়িছো। মই বিৰোধীক অনুৰোধ কৰিছো যে মোক বিধেয়কখন উত্থাপন কৰিবলৈ দিয়ক আৰু মই কিয় কৰিব বিচাৰো সেই কথা তেওঁলোকে শুনক।’’
মঙলবাৰে ৰাজ্যসভাত স্বাস্থ্য বিভাগৰ ৰাজ্যিক মন্ত্ৰী প্ৰবীণ পাৱাৰে জনাইছিল যে জনসংখ্যা নিয়ন্ত্ৰণৰ বাবে কেন্দ্ৰই কোনো ধৰণৰ আইনগত ব্যৱস্থা বিবেচনা কৰা নাই।
লগতে পঢ়ক আটাইতকৈ ভয়ংকৰ কাৰাগাৰ! বন্দীৰ আত্মা কঁপি উঠা কাৰাগাৰখন আছে ক’ত?
শ্ৰীমতী পাৱাৰে কয় যে চৰকাৰে ৰাষ্ট্ৰীয় জনসংখ্যা নীতি ২০০০ আৰু ৰাষ্ট্ৰীয় স্বাস্থ্য নীতি ২০১৭ৰ সৈতে সংগতি ৰাখি ২০৪৫ চনৰ ভিতৰত জনসংখ্যাক সুস্থিৰ কৰিবলৈ বিচাৰিছে।
মন্ত্ৰী শ্ৰীমতী পাৱাৰে লগতে কয় যে ৰাষ্ট্ৰীয় পৰিয়াল স্বাস্থ্য সমীক্ষা-৫ অনুসৰি ২০১৯-২১ চনত মুঠ উৰ্বৰতা হাৰ (টিএফআৰ) ২.০ লৈ হ্ৰাস পাইছে যিটো প্ৰতিস্থাপন স্তৰৰ তলত। ইফালে কেন্দ্ৰীয় মন্ত্ৰী গিৰিৰাজ সিংকে ধৰি বহু বিজেপি নেতাই ভাৰতৰ বৰ্ধিত জনসংখ্যা তদাৰক কৰিবলৈ আইন প্ৰৱৰ্তনৰ দাবী জনাই আহিছে।
উল্লেখ্য যে ২০২৩ চনৰ ভিতৰত ভাৰতৰ জনসংখ্যাই চীনৰ জনসংখ্যাক অতিক্ৰম কৰিব বুলি ৰাষ্ট্ৰসংঘই ভৱিষ্যদ্বাণী কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
