অধিকাংশ ব্যক্তিগত প্ৰতিষ্ঠানতেই Paternity leave দুদিন বা তিনিদিনহে দিয়া হয়। কিন্তু এজন কৰ্মচাৰীয়ে দীঘলীয়া paternity leave লোৱাৰ বাবে প্ৰতিষ্ঠানটোৱে বৰ্খাস্ত কৰাৰ পিছত আদালতৰ দ্বাৰস্থ হৈ বুজন পৰিমাণৰ ধন লাভ কৰাৰ ঘটনা পোহৰলৈ আহিছে। এই গোচৰটো বিশ্বৰ অন্যতম বৃহৎ বিনিয়োগ বেংক গোল্ডমেন চেক্সৰ সৈতে জড়িত। লণ্ডনৰ নিয়োগ ন্যায়াধিকৰণে ৰায় দিয়ে যে প্ৰতিষ্ঠানটোৱে প্ৰাক্তন কৰ্মচাৰী জনাথন ৰিভছক অন্যায়ভাৱে চাকৰিৰ পৰা বৰ্খাস্ত কৰাৰ লগতে লিংগৰ ভিত্তিত তেওঁৰ বিৰুদ্ধে বৈষম্যমূলক ব্যৱহাৰ কৰিছে। জনাথনে পিতৃত্বৰ গৌৰৱ অৰ্জন কৰাৰ পিছতে দীঘলীয়া ছুটীৰ আবেদন কৰি বেংকটোত অনুপস্থিত আছিল।
প্ৰতিবেদন অনুসৰি, জনাথন ৰিভছে গোল্ডমেন চেক্সৰ লণ্ডনস্থিত কম্প্লাইয়েন্স বিভাগত জ্যেষ্ঠ ভাইচ প্ৰেছিডেণ্ট আৰু ডেপুটী হেড অব কণ্ট্ৰল ৰূমৰ পদত কাৰ্যনিৰ্বাহ কৰিছিল। তেওঁ প্ৰায় ১৫ বছৰ বেংকত সেৱা আগবঢ়াইছিল। ২০১১ চনৰ পৰা ২০১৯ চনৰ ভিতৰত তেওঁ কোম্পানীটোৰ সৰ্বোচ্চ প্ৰদৰ্শনকাৰী কৰ্মচাৰীৰ ভিতৰত ধাৰাবাহিকভাৱে স্থান লাভ কৰিছিল।
ক’ভিড-১৯ মহামাৰীৰ সময়তে আৰম্ভ হৈছিল এই বিবাদ। ২০১৯ চনত প্ৰথম সন্তানৰ জন্মৰ পিছত ৰিভছে মহামাৰীৰ সময়ত ৱৰ্ক ফ্ৰম হোমৰ সময়ত চাকৰিৰ দ্বায়িত্ব আৰু নৱজাতকৰ যত্ন লোৱাত ক্ৰমান্বয়ে অসুবিধা পাইছে। ৰিভছে আদালতত কয় যে-যেতিয়া তেওঁ নিজৰ অসুবিধাবোৰ বুজাই দিছিল, তেতিয়া তেওঁৰ উচ্চপদস্থ বিষয়াই বাৰে বাৰে দুৰ্ব্যৱহাৰ কৰিছিল।
এই বিষয়টোৰ শুনানিৰ সময়ত আদালতে স্বীকাৰ কৰে যে ৰিভছৰ মেনেজাৰে ক’ভিড-১৯ লকডাউনৰ সময়ত সৰু ল’ৰা-ছোৱালীৰ যত্ন লোৱা পিতৃ-মাতৃয়ে সন্মুখীন হোৱা অসুবিধাৰ কথা গুৰুত্বসহকাৰে বুজি পোৱা নাছিল। আদালতে এইটোও স্বীকাৰ কৰে যে ৰিভছৰ সৈতে অন্যায় ব্যৱহাৰ কৰা হৈছিল আৰু তেওঁক অন্যায়ভাৱে চাকৰিৰ পৰা বৰ্খাস্ত কৰা হৈছিল। লগতে আদালতে এইটোও কয় যে প্ৰতিষ্ঠানটোৰ লিংগ বৈষম্যৰ সন্মুখীন হৈছিল ৰীভছ। ফলস্বৰূপে আদালতে গোল্ডমেন চেক্সক জনাথন ৰীভছক ১৪.৫ মিলিয়ন পাউণ্ড বা প্ৰায় ১৮৫ কোটি টকা ক্ষতিপূৰণ হিচাপে দিবলৈ নিৰ্দেশ দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
