‘বিগত ৭মাহে আবেগিকভাৱে ভাঙি পৰিছো, যি হেৰুৱাইছো সেয়া বুজাব নোৱাৰো, এতিয়া শূন্যতাৰ বাহিৰে একো নাই’ পাণ্ডু বিহুতলিৰ পৰা কি বাৰ্তা গৰিমা গাৰ্গৰ?

অসমবাসীয়ে তেওঁলোকৰ প্ৰাণৰ জুবিনক বিগত বৰ্ষত হেৰুৱালে৷ এই ক্ষতি আমাৰ সকলোৰে বাবেই অপূৰণীয় এক ক্ষতি৷ কেনেকৈ ছিংগাপুৰত শেষ হৈ গ’ল সেই সুৰীয়া সত্ত্বা, তাৰ বিচাৰ আজিও কৰ্টৰ আওঁতাধীন৷ কিন্তু এইবাৰৰ ব’হাগ জুবিন অবিহনে অসমবাসীয়ে পালন কৰিবলৈ গৈ বাৰে বাৰে উচুপিবলগীয়া হৈছে৷ ৰঙালীয়ে এইবাৰ যেন ৰঙালী হৈ হঁহুৱাব পৰা নাই অসমীয়াক৷ অসমীয়াই বাৰে বাৰে সকলোবোৰ সামৰি আগুৱাব খুজিও ৰৈ গৈছে ১৯ ছেপ্টেম্বৰৰ সেই দিনটোতেই৷ একেই পৰিস্থিতি জুবিন গাৰ্গৰ কাষত ছায়াৰ দৰে থকা পত্নী গৰিমা গাৰ্গৰো৷ পত্নী গৰিমাই জুবিন নোহোৱা হোৱাৰে পৰাই উচুপি আছে প্ৰতিদিনে৷ মাজে মাজে হাস্পতালত ভৰ্তি হৈছে৷ আকৌ আধৰুৱা কামবোৰ সামৰিবৰ বাবে মাজে মাজে ৰাইজৰ কাষলৈ ওলাই আহিছে৷ তাৰমাজতেই কৰ্টতো হাজিৰ হ’বলগীয়া হৈছে৷ সকলো সামৰি গৰিমাই এইবাৰ বিহুমঞ্চলৈকো ওলাই আহিছে৷ শুকুৰবাৰে নিশা পাণ্ডু বিহুসন্মিলনীত উপস্থিত হৈ গৰিমাই আকৌ এবাৰ দাঙি ধৰিছে তেওঁ ভাঙি পৰিলেও তেওঁৰ শৰীৰতো জুবিনৰ দৰেই এক যুঁজাৰু মনে বাস কৰে৷ গৰিমাই পাণ্ডু বিহুমঞ্চৰ পৰা কৈছে-

‘বিগত সাত মাহত মই আৱেগিকভাৱে ভাঙি পৰিছো৷ এয়া ক’বলগীয়া কথা নহয় যদিও কৈছো, মই যি হেৰুৱাইছো জীৱনত সেয়া কেতিয়াও বুজাব নোৱাৰো৷ বিহুৰ প্ৰথমদিনাখন মই সদায়ে তেওঁৰ লগত কথা পাতিছিলো৷ বিহুৰ সময়ত প্ৰতিবছৰে আমাৰ প্ৰস্তুতি বেলেগ হয়৷ বিয়া হোৱাৰ পাছৰে পৰাই এই ২৩-২৪ বছৰে মই সদায়ে দেখিছো বিহুৰ প্ৰস্তুতি কেনেকুৱা৷ প্ৰথম বিহুৰ পৰাই আৰম্ভ হয় কি পিন্ধিব, কি কৰিব, ক’লৈ যাব, এমাহ দুমাহৰ বাবে আমাৰ প্ৰস্তুতি, গোটেই ঘৰখনত কেনেকুৱা এটা পৰিবেশ থাকে৷ কিন্তু এইবাৰ সকলো নিস্তব্ধ, কিবা একো নাই শূন্যতাৰ বাহিৰে৷ আৰু মই তেওঁৰ লগত যেতিয়া কথা পাতিছিলো তেতিয়া তেওঁক কৈছিলো, তুমিয়েই দেখোন লিখিছিলা, শেষ বুলিলেইতো শেষ নহয়, আকৌ আৰম্ভ হয়৷ কৰোবাততো সেইয়া চলি থাকিব লাগিব৷ কৰোবাততো নতুন আৰম্ভণি হ’ব লাগিব৷ তোমাৰ মোৰ যাত্ৰা ইয়াতেই শেষ নেকি? কৰোবাততো এটা নতুন যাত্ৰাৰ আৰম্ভণি হ’ব লাগিব নহয় গল্ডী৷

এই যাত্ৰা ক’ৰ পৰা কেনেকৈ হ’ব? কি কৰিলে হ’ব? ছাগে তেওঁৱেই সেয়া মোক বাট দেখুৱালে৷ প্ৰথমদিনা লতাশিল বিহুলৈ গলো৷ আৰু মই মই প্ৰাৰ্থনা কৰিলে কথা পাতিলে এনেকুৱা লাগে, তেওঁ সদায়ে মোৰ কথা শুনে৷ সদায়ে কিবা এটা উত্তৰ দিয়ে৷ আজিও চাগে তেওঁৱেই মোক বাট দেখুৱালে আপোনালোকৰ সন্মুখত থিয় হ’বলৈ৷ তেওঁৰেই কেইটামান শব্দ, তেওঁৰেই শাৰীকেইটামান, জুবিলিৰ সৈতে দাঙি ধৰাৰ বাবে থিয় হৈছো৷ মোৰ সৈতে তেওঁ সদায়ে থাকক সেয়াই কামনা কৰো৷ আপোনালোকে আশীৰ্বাদ কৰিব জুবিন আৰু মোৰ যাত্ৰা, জুবিন আৰু আমাৰ যাত্ৰা, জুবিন আৰু অসমৰ যাত্ৰা কেতিয়াও শেষ নহওক৷ চিৰন্তৰ হওক এই যাত্ৰা, জুবিন অমৰ হওক৷ জুবিন আমাৰ মাজত সদায়ে জীয়াই থাকক৷ ইমানখিনি সাহস দি মোক ওলিয়াই অনাৰ বাবে জুবলি তোমাক ধন্যবাদ কৈ শেষ নকৰো৷’

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ