২০০৬ চনত মুক্তি পোৱা ‘গেংষ্টাৰ: এ লাভ ষ্ট’ৰী’ ছবিখনৰ ছুপাৰহিট গান ‘য়া আলী’ গানটো নুশুনা মানুহ হয়তো অসম তথা ভাৰতত খুব কমেই আছে। এই গানটোৰে সমগ্ৰ ভাৰততে চিনাকি হৈ পৰিছিল আমাৰ মৰমৰ জুবিন দা। জুবিন দাই গোৱা চুফী আৰু ৰক সংগীতৰ সংমিশ্ৰণত নিৰ্মিত এই আইকনিক গীতটোৰ সংগীত, কণ্ঠ আৰু সৃষ্টি প্ৰক্ৰিয়াৰ সৈতে জড়িত কেইটামান ৰোমাঞ্চকৰ কথা হয়তো আমাৰ বহুতেই নাজানে।
জুবিন দাৰ লগতে আৰু বহু গায়কে গানটোৰ বাবে দিছিল কণ্ঠ
জুবিন দাক ‘য়া আলী’ গানটোৰ বাবে চূড়ান্তভাৱে নিৰ্বাচন কৰাৰ আগতে এই গীতটো আন আন প্ৰায় পাঁচজন গায়কে ৰেকৰ্ড কৰিছিল, যাৰ ভিতৰত আছিল বনী চক্ৰৱৰ্তীও আছিল। বলীউডত গান এটাৰ কণ্ঠশিল্পী নিৰ্বাচনৰ ক্ষেত্ৰত এয়া এক সাধাৰণ প্ৰক্ৰিয়া। কিন্তু সংগীত পৰিচালক প্ৰীতমে শেষত জুবিনৰ কণ্ঠকেই বাছি লয়, কিয়নো গেংগষ্টাৰ ছবিখনৰ চিত্ৰনাট্যই দাবী কৰা পৰিস্থিতিটোৰ সৈতে জুবিন গাৰ্গৰ কণ্ঠত ‘য়া আলী’ গানটো সুন্দৰকৈ খাপ খাই গৈছিল বুলি মন্তব্য কৰে ছবিখনৰ পৰিচালক অনুৰাগ বসু আৰু প্ৰযোজক মহেশ ভাট আৰু মুকেশ ভাটে।
জুবিন দাৰ কণ্ঠত ‘য়া আলী’ গানটো কিয় হৈছিল ছুপাৰহিট?
জুবিন দাৰ কণ্ঠৰ উপৰিও ‘য়া আলী’ গানটো সুৰ কুৱেইটৰ পপ বেণ্ড ‘গিটাৰা’ৰ জনপ্ৰিয় আৰবী গান ‘য়া ঘালি’ৰ অনুপ্ৰেৰণা লৈ সৃষ্টি কৰিছিল সংগীত পৰিচালক প্ৰীতমে। ইয়াৰ উপৰিও গানটোৰ হৃদয় স্পৰ্শ কৰা গীতৰ কথায়ো গানটোক ছুপাৰহিট কৰিছিল। গীতটোৰ কথা লিখিছিল গীতিকাৰ ছঈদ কাদৰীয়ে। গীতটোৱে এনে এজন প্ৰেমিকৰ অনুভূতি প্ৰকাশ কৰে, যিয়ে নিজৰ প্ৰিয়জনক পাবলৈ নিজকে উৎসৰ্গা কৰিবলৈও সাজু আৰু সেই পথত ঈশ্বৰৰ কৃপা তথা সহায় বিচাৰি “য়া আলি, ৰহম আলি” বুলি প্ৰাৰ্থনা কৰে।
জুবিন আৰু প্ৰীতমৰ অনন্য সমন্বয়
যি সময়ত ‘গেংগষ্টাৰ’ ছবিখনে মুক্তি পাইছিল সেই সময়ৰো বহু আগৰ পৰাই ইতিমধ্যেই জুবিন দা অসমীয়া সংগীতৰ একছত্ৰী সম্ৰাট আছিল। বাঙালী সংগীতক্ষেত্ৰখনৰো এটা চিনাকি নাম আছিল জুবিন গাৰ্গ। ‘য়া আলী’ গীতটোত তেওঁ চুফী আৰু ৰক সংগীতৰ এক অনন্য সংমিশ্ৰণ উপস্থাপন কৰিছিল, যিটো সেই সময়ত ভাৰতীয় সংগীতজগতখনত যথেষ্ট নতুন আছিল। ‘য়া আলী’ৰ অসাধাৰণ সফলতাৰ পিছত জুবিন দাৰ ওচৰলৈ বহু গীতৰ প্ৰস্তাৱ আহিছিল। কিন্তু তেওঁ নিজকে এটা বিশেষ ধৰণৰ গীতৰ মাজতে সীমাবদ্ধ কৰি ৰাখিব বিচৰা নাছিল। এটা সাক্ষাৎকাৰত জুবিন দাই এসময়ত কৈছিল যে-কেৱল একে ধৰণৰ ভাবমূৰ্তিত আবদ্ধ হৈ পৰাৰ আশংকাত তেওঁ এনে বহু গীত প্ৰত্যাখ্যান কৰিছিল। সাম্প্ৰতিক সময়তো ‘য়া আলী’ ভাৰতীয় সংগীতপ্ৰেমীৰ মাজত এক কালজয়ী-চিৰসেউজ গীত হিচাপে সমাদৃত হৈ আছে। জুবিন গাৰ্গৰ শক্তিশালী কণ্ঠ, প্ৰীতমৰ মনোমোহা সুৰ আৰু ছঈদ কাদৰীৰ গভীৰ গীতিৰ কথাই ‘য়া আলী’ গীতটোক সহজে ঢুকি নোপোৱা জনপ্ৰিয়তালৈ নিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
