প’ষ্ট অফিচে তেওঁলোকৰ গ্ৰাহকক ডাক পৰিসেৱাৰ ওপৰিও বিভিন্ন ধৰণৰ আৰ্থিক পৰিসেৱা প্ৰদান কৰে৷ নিয়মিত সঞ্চয় একাউণ্টৰ ওপৰিও আৰ ডি একাউণ্ট, টি ডি একাউণ্ট, এম আই এছ একাউণ্ট আৰু পিপিএফ একাউণ্টো পোষ্ট অফিচত খুলিব পাৰি৷ পিপিএফ, বা পাব্লিক প্ৰভিডেণ্ট ফাণ্ড, কেন্দ্ৰীয় চৰকাৰৰ দ্বাৰা পৰিচালিত এক চৰকাৰী প্ৰকল্প৷ পিপিএফত প্ৰতিমাহে ২০০০ টকা জমা কৰিলে ১৫ বছৰৰ পাছত আপুনি কিমান টকা পাব?
PPF স্কিমত ৭.১ শতাংশ সুদ দিয়া হৈছে
বৰ্তমান পোষ্ট অফিচৰ পিপিএফ স্কিমত ৭.১ শতাংশ বাৰ্ষিক সুদ দিয়া হৈছে৷ বাৰ্ষিক সৰ্বনিম্ন ১০০০ টকা জমা কৰি এই স্কিম একাউণ্ট আপুনি খুলিব পাৰে৷ মনত ৰাখিব যে পিপিএফ একাউণ্ট সক্ৰিয় ৰাখিবলৈ এটা আৰ্থিক বছৰত সৰ্বনিম্ন ১০০০ টকা জমা ৰাখিব লাগিব৷ পিপিএফ স্কিমত এবছৰৰ ভিতৰত সৰ্বোচ্চ ১.৫ লাখ টকা জমা কৰিব পাৰে৷
আপুনি বাৰ্ষিক পিপিএফত এককালীন পৰিমাণো জমা কৰিব পাৰে৷ ইয়াৰোপৰি আপুনি পিপিএফ একাউণ্টত কিস্তিতো টকা জমা কৰিব পাৰে৷ আপুনি এটা পিপিএফ একাউণ্টত এবছৰৰ ভিতৰত সৰ্বাধিক ১২ টা কিস্তি জমা কৰিব পাৰে৷ অৰ্থাৎ আপুনি এমাহত সৰ্বোচ্চ এটা কিস্তি জমা কৰিব পাৰে৷
আপুনি যদি আপোনাৰ পিপিএফ একাউণ্টত প্ৰতিমাহে ২০০০ টকাকৈ জমা কৰে তেন্তে আপোনাৰ বাৰ্ষিক বিনিয়োগ হ’ব ২৪০০০ টকা৷ পিপিএফ একাউণ্ট ১৫ বছৰত পৰিপক্ক হয়৷ কিন্তু আপুনি পাঁচ বছৰলৈ ইয়াৰ ম্যাদ বঢ়াব পাৰে৷ আপুনি প্ৰতিমাহে ২০০০ টকাকৈ জমা কৰিলে ১৫ বছৰৰ পাছত আপুনি মুঠ ৬, ৫০, ৯১৩ টকা পাব৷ ইয়াৰ মাজত সুদ হিচাপে অৰ্থাৎ ৰিটাৰ্ণ হিচাপেই ২,৯০,৯১৩ টকা পাব৷ পোষ্ট অফিচেই নহয়, বেংকতো আপুনি পিপিএফ একাউণ্ট খুলিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
