ক’ৰোনাকালত পৰিস্থিতি নিয়ন্ত্ৰণৰ বাবে ৰাজ্য চৰকাৰে যি সিদ্ধান্ত গ্ৰহণ কৰিছে অথবা নতুন কাৰ্যসূচী ৰূপায়ণৰ ক্ষেত্ৰত যি কাৰ্যপন্থা হাতত লৈছে তাক লৈ গভীৰ উদ্বিগ্নতা প্ৰকাশ কৰিছে ইণ্ডিয়ান মেডিকেল এছ’চিয়েচন চমুকৈ IMA-ৰ অসম শাখাই। স্বাস্থ্য তথা সমাজ কল্যাণ মন্ত্ৰী ড০ হিমন্ত বিশ্ব শৰ্মালৈ এই সন্দৰ্ভত এখন পত্ৰ প্ৰেৰণ কৰিছে সংস্থাটোৱে। পত্ৰখনত লিখা হৈছে যে যি সময়ত ক’ভিড-১৯ত আক্ৰান্তৰ সংখ্যা হোৰাহোৰে বৃদ্ধি পাইছে এনে সময়ত যদি যথোচিত ব্যৱস্থা গ্ৰহণ কৰা নহয় তেন্তে চৰকাৰৰ পক্ষে পৰিস্থিতি নিয়ন্ত্ৰণ অসম্ভৱ হৈ উঠিব।
মানৱ সম্পদৰ পৰিকল্পনা নকৰাকৈ মাথোঁ চিকিৎসালয়ৰ বিছনাৰ সংখ্যা বৃদ্ধি এক বৃথা প্ৰচেষ্টা হ’ব। কাৰণ প্ৰয়োজন অনুপাতে চিকিৎসক তথা চিকিৎসাকৰ্মীৰ অভাৱ।
ক’ভিড ৱাৰ্ডত চিকিৎসক তথা চিকিৎসাকৰ্মীসকলক অবিৰতভাৱে ১১ দিনৰ বাবে কামত নিয়োজিত কৰা, তাৰ পাছত মাথোঁ ৩টা দিনৰ বাবে কোৱাৰেণ্টীনৰ ব্যৱস্থা কৰা আৰু পৰীক্ষাত ক’ভিড নিগেটিভ ওলালে পুনৰ কামত নিয়োজিত কৰা ব্যৱস্থাৰ তীব্ৰ বিৰোধিতা কৰিছে IMA-এ।
ক’ভিড ডিউটীত নিয়োজিতসকলৰ স্বাস্থ্য পৰীক্ষাৰ বাবে ‘এণ্টিজেন টেষ্ট’ৰ বিভাগীয় সিদ্ধান্তৰ বিৰোধিতা কৰিছে IMA-এ। কাৰণ ‘ইণ্ডিয়ান কাউন্সিল অব্ মেডিকেল ৰিচাৰ্ছ’ চমুকৈ ICMR-এ উল্লেখ কৰিছে যে এই পৰীক্ষা পদ্ধতিটো কম ফলদায়ক। এই পৰীক্ষাই ক’ভিত আক্ৰান্তৰ সম্ভাৱনা নস্যাৎ কৰিব নোৱাৰে।
ইতিমধ্যে বুজনসংখ্যক চিকিৎসক-স্বাস্থ্যকৰ্মী এই মহামাৰীত আক্ৰান্ত হৈছে। আৰু চৰকাৰৰ অপৰিকল্পিত তথা যথাৰ্থতাহীন পদক্ষেপে চিকিৎসক-স্বাস্থ্যকৰ্মীসকলক অধিক বিপদাপন্ন কৰিব। এনে পৰিস্থিতি হ’লে আৰু বেছিদিন নাই, যিদিনা হয়তো নিজৰ শৰীৰত মহাব্যাধি ক’ৰোনা লৈয়ে ৰোগীক শুশ্ৰূষা কৰিব লাগিব চিকিৎসক আৰু চিকিৎসাকৰ্মীয়ে।
ক’ৰোনাৰ চিকিৎসাত ব্ৰতী কিয় ইমানসংখ্যক চিকিৎসক আৰু চিকিৎসাকৰ্মী ক’ৰোনাত আক্ৰান্ত হৈছে এই সন্দৰ্ভত বিতং পৰ্যালোচনাৰ বাবে চৰকাৰক দাবী জনাইছে IMA-এ।
ক’ভিড আক্ৰান্তৰ ক্ষেত্ৰত ICMR-ৰ পৰামৰ্শৰাজিক আখৰে আখৰে পালন কৰিবলৈ চৰকাৰক পৰামৰ্শ আগবঢ়াইছে IMA-এ। অৰ্থাৎ ICMR-ৰ মতে স্ব-গৃহত চিকিৎসা আৰু যতন লাভ কৰিবলৈ যিসকলে বৈধতা লাভ কৰিছে তেওঁলোকক সেইধৰণেই চিকিৎসা লাভৰ সুযোগ দিয়া উচিত। কাৰণ অসংখ্য লোকক সেৱা আগবঢ়াবলৈ চৰকাৰৰ আন্তঃগাঁথনিৰ অভাৱ।
সংগোপনে তথা জধে-মধে সিদ্ধান্ত লোৱাৰ পৰিৱৰ্তে স্বাস্থ্যসেৱাৰ অভিজ্ঞ লোক তথা সংস্থাক বিশ্বাসত লৈ কৰ্মপন্থা হাতত ল’বলৈ চৰকাৰক আহ্বান জনাইছে IMA-এ। অন্যথা যিকোনো মুহূৰ্তত মুখথেকেচা খাব পাৰে চৰকাৰৰ দ্বাৰা বহুলভাৱে প্ৰচাৰিত SUCCESSFUL ASSAM MODEL-এ। ৰাজ্যিক সভাপতি ডাঃ সত্যজিৎ বৰা আৰু ৰাজ্যিক সম্পাদক ডাঃ হেমাংগ বৈশ্য স্বাক্ষৰিত IMA-ৰ পত্ৰই দৰাচলতে প্ৰশ্নৰ উদ্ৰেক ঘটাইছে- চৰকাৰে দাবী কৰা ধৰণে ক’ৰোনা সম্পৰ্কীয় কাম-কাজ প্ৰকৃতাৰ্থত সুচাৰুৰূপত চলিছেনে? যথোচিত কাৰ্যপন্থা গ্ৰহণ কৰিছেনে ৰাজ্য চৰকাৰে? নে ভয়ংকৰ ভুলৰ মাজেৰেই চলিছে সকলো কাম-কাজ?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
