অসম লাইভ ২৪ঃ পাকিস্তানৰ নতুন সুৰক্ষা নীতিত কোৱা হৈছে যে ভাৰতৰে কোনো ক্ষেত্ৰতে শত্ৰুতা থকাটো নিবিচাৰে৷ চুবুৰীয়া ৰাষ্ট্ৰৰে শান্তিপূৰ্ণ সহাৱস্থান বিচাৰে পাকিস্তানে৷ ওচৰ-চুবুৰীয়া দেশসমূহৰে শান্তি, আৰ্থিক আৰু কূটনৈতিক সম্বন্ধ বিদেশ নীতিক কেন্দ্ৰ কৰি গঢ়ি উঠাৰ পোষকতা কৰা হয় ৰাষ্ট্ৰীয় সুৰক্ষা নেতৃত্বই৷ দীৰ্ঘ দিন ধৰি ভাৰত আৰু পাকিস্তানৰ মাজত চলি অহা কাশ্মীৰ বিবাদৰ সম্পৰ্কত ইয়াৰ অন্তিম সমাধানলৈ অপেক্ষা কৰাৰ সমান্তৰালকৈ ভাৰতৰ সৈতে ব্যৱসায়িক সম্বন্ধ গঢ়ি তুলিবলৈ ইচ্ছুক পাক চৰকাৰ৷ দেশখনৰ আগশাৰীৰ Express Tribune নামৰ কাকতখনৰ ৰাষ্ট্ৰীয় সুৰক্ষা নীতিৰ এগৰাকী বিষয়াৰ উদ্ধৃতিৰে এই খবৰ প্ৰকাশ কৰাৰ লগতে পাক-ভাৰতৰ পাৰমাণৱিক বিষয়ত হোৱা আলোচনাই যথেষ্ট অগ্ৰগতি লোৱা বুলি উল্লেখ কৰা হয়৷ একেটা খবৰত বিষয়াগৰাকীয়ে স্পষ্টকৈ কয়, ‘অহা এশ বছৰলৈ আমি ভাৰতৰে কোনো ক্ষেত্ৰতে শত্ৰুতা নিবিচাৰো৷ নতুন নীতি অনুসৰি আমি শান্তি বিচাৰো৷ ভাৰতৰে আমাৰ সকলো ক্ষেত্ৰতে সম্পৰ্কৰ উন্নতি হোৱাটো কামনা কৰো৷’ ২০১৯ত জম্মু-কাশ্মীৰৰ পৰা ৩৭০ অনুচ্ছেদ বিলোপ ঘটাই বিশেষ ৰাজ্যৰ মৰ্যাদা কৰ্তন কৰিছিল মোদী চৰকাৰে৷ তেতিয়াৰে পৰা পাকিস্তান-ভাৰতৰ সম্পৰ্কত বিঘ্নিত হৈছিল আৰু দ্বিপাক্ষিক বেপাৰ-বাণিজ্য বন্ধ হৈছিল৷ পৰৱৰ্তী বৰ্ষত দুয়োখন দেশৰ মাজত সম্বন্ধ উন্নত কৰিবলৈ চেষ্টা কৰা হৈছিল আৰু LOCত যুদ্ধবিৰতি আদিৰ দৰে সিদ্ধান্তত সহমতত উপনীত হোৱা দেখা গৈছিল৷ পিছে, বিশেষ কাৰণত এই আলোচনায়ো যেন ক’ৰোবাত গেঁথেলা মাৰিলে৷ পাকিস্তানৰ নতুন ৰাষ্ট্ৰীয় সুৰক্ষা নীতিত ঘৰুৱা উৎপাদন, অৰ্থনৈতিক বিকাশৰ লগতে ভাৰতৰ লগত বিশেষ সম্পৰ্কৰ সদিচ্ছা প্ৰকাশৰ স্পষ্ট ইংগিত দিয়া হৈছে৷ অৱশ্যে মিঠা মিঠা কথা কোৱা পাকিস্তানৰ এই নতুন ৰাষ্ট্ৰীয় সুৰক্ষা নীতি ভাৰতৰ ক্ষেত্ৰত কিমান দূৰ সফলকাম কৰে সেই লৈ আন্তঃৰাষ্ট্ৰ সম্প্ৰদায়ৰ চকু থাকিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
