দেশজুৰি E20 ইন্ধন বাধ্যতামূলক কৰাৰ পিছত পুৰণি পেট্ৰ’লচালিত বাহনসমূহত বিভিন্ন সমস্যাৰ অভিযোগ বৃদ্ধি পাইছে। এই সন্দৰ্ভত LocalCircles-এ কৰা এক নতুন সমীক্ষাত প্ৰকাশ পাইছে যে ২০২৩ চনৰ আগতে ক্ৰয় কৰা বহু পেট্ৰ’ল বাহনৰ মালিকে মাইলেজ, ইঞ্জিনৰ কাৰ্যক্ষমতা আৰু ৰক্ষণাবেক্ষণ ব্যয় সম্পৰ্কীয় সমস্যাৰ সন্মুখীন হৈছে। দেশৰ ৩০২খন জিলাৰ ২২ হাজাৰতকৈও অধিক লোকৰ মাজত চলোৱা এই সমীক্ষাত বহু গুৰুত্বপূৰ্ণ তথ্য পোহৰলৈ আহিছে।
Local Circlesৰ সমীক্ষাই কি কয়?
local Circles-এ চলোৱা ২২ হাজাৰতকৈও অধিক বাহনৰ ওপৰত চলোৱা সমীক্ষাত ৫৬% বাহনৰ মালিকৰ মতামত অনুসৰি E20 ইন্ধন ব্যৱহাৰৰ পিছত তেওঁলোকৰ গাড়ীৰ মাইলেজ বা ইন্ধনৰ দক্ষতা পূৰ্বতকৈ হ্ৰাস পাইছে। ৪৩% লোকে ইঞ্জিনৰ কাৰ্যক্ষমতা সম্পৰ্কীয় সমস্যাৰ কথা উল্লেখ কৰিছে। ইয়াৰ ভিতৰত ইঞ্জিনৰ শক্তি কমি যোৱা, ইঞ্জিন নকিং আৰু ৰাফ আইডলিঙৰ দৰে সমস্যা অন্তৰ্ভুক্ত। ৩৪% বাহনৰ মালিকে মেৰামতি আৰু ৰক্ষণাবেক্ষণৰ খৰচ বৃদ্ধি পোৱাৰো অভিযোগ উত্থাপন কৰিছে। ২০% ব্যৱহাৰকাৰীয়ে ফুৱেল ছিষ্টেমৰ বিভিন্ন ত্ৰুটিৰ সন্মুখীন হোৱা বুলিও নিজৰ মত ব্যক্ত কৰিছে। ১৯% বাহনৰ ইঞ্জিন স্বাভাৱিকতকৈ অধিক গৰম হোৱাৰ দৰেও সমস্যা দেখা গৈছে। আন ১৯% লোকে গাড়ীত বিভিন্ন ধৰণৰ মিশ্ৰিত সমস্যাৰ সন্মুখীন হোৱাৰ কথা প্ৰকাশ কৰিছে।
কোনবোৰ বাহনৰ ক্ষেত্ৰত এই সমস্যাৰ সৃষ্টি হৈছে?
যিবোৰ লোকৰ বাহনৰ ওপৰত এই সমীক্ষা চলোৱা হৈছিল ইয়াৰে ২৬% লোকৰ বাহনত এতিয়ালৈকে কোনো ধৰণৰ সমস্যা অনুভৱ কৰা নাই। আনহাতে, ১৬% লোকৰ গাড়ীত সৰু-সুৰা সমস্যাৰ লক্ষণ দেখা দিবলৈ আৰম্ভ কৰিছে। ইয়াৰ পূৰ্বেও LocalCircles-এ ৪২ হাজাৰতকৈ অধিক পেট্ৰ’ল চালিত বাহনৰ মালিকৰ মাজত এক সমীক্ষা চলাইছিল। সেই সমীক্ষাত ৫২% লোকে ২০২৫ চনৰ আৰম্ভণিৰ পৰা মাইলেজ হ্ৰাস পোৱা আৰু গাড়ী মেৰামতিৰ বাবে ৫ হাজাৰৰ পৰা ২৫ হাজাৰ টকালৈকে অতিৰিক্ত খৰচ বৃদ্ধি হোৱা বুলি জনাইছিল।
E20ৰ পৰা E85লৈ আগবাঢ়িছে চৰকাৰ
ভাৰত চৰকাৰে ১ এপ্ৰিল ২০২৬ৰ পৰা দেশত E20 ইন্ধন বাধ্যতামূলক কৰিছে। ইয়াৰ উপৰিও E22, E25, E27 আৰু E30 ইন্ধনৰ বাবে নতুন মানদণ্ডও জাৰি কৰা হৈছে। সমান্তৰালভাৱে দিল্লীত দেশৰ প্ৰথমটো ফ্লেক্স-ফুৱেল পাম্প মুকলি কৰা হৈছে। চৰকাৰে ভৱিষ্যতে অধিক ইথানল-মিশ্ৰিত ইন্ধনৰ ব্যৱহাৰ বৃদ্ধি কৰাৰ দিশত আগবাঢ়িছে। তথাপিও, পুৰণি গাড়ীসমূহত E20 ইন্ধনৰ প্ৰভাৱক লৈ উত্থাপিত এই সমীক্ষাৰ ফলাফলে গাড়ী মালিক, গাড়ী নিৰ্মাতা প্ৰতিষ্ঠান আৰু নীতি-নিৰ্ধাৰকসকলৰ মাজত নতুন বিতৰ্কৰ সূচনা কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
