পঞ্জাৱত নিৰংকুশ সংখ্যাগৰিষ্ঠতাৰ দিশে ধাৱমান হৈছে দিল্লীৰ মুখ্যমন্ত্ৰী অৰবিন্দ কেজৰিৱাল নেতৃত্বাধীন ৰাজনৈতিক দল আম আদমি পাৰ্টি-এ৷ কংগ্ৰেছক উৎখাত কৰি পঞ্জাৱৰ ক্ষমতাত অধিষ্ঠিত হোৱাৰ দিশে AAP৷ পঞ্জাৱত ৰাজনৈতিক মিৰাকল সৃষ্টি কৰাৰ AAP-এ পঞ্জাৱত মুখ্যমন্ত্ৰী হিচাপে পক্ষেপ কৰিছে এনে এগৰাকী ৰাজনৈতিক নেতাক, যিগৰাকীৰ পূৰ্বে পঞ্জাৱৰ এগৰাকী অতি জনপ্ৰিয় কৌতুক অভিনেতা আছিল৷ তেওঁ হৈছে ভগৱন্ত সিং মান৷
পঞ্জাৱৰ চাটজৰ এটা পঞ্জাৱী শিখ জাট পৰিয়ালত ১৯৭৩ চনত ভগৱন্ত সিং মানৰ জন্ম হৈছিল৷ সৰুৰে পৰা কৌতুক অভিনয়ৰ প্ৰতি ৰাপ থকা ভগৱন্ত সিং মানে কলেজীয়া জীৱনত পঞ্জাৱ বিশ্ববিদ্যালয়ত অনুষ্ঠিত আন্তঃমহাবিদ্যালয়ৰ কৌতুক মহোৎসৱত দুবাৰকৈ সোণৰ পদকো লাভ কৰিছিল৷ ইয়াৰ পিছতে ভগৱন্ত সিং মানে ৰাজনৈতিক, ব্যৱসায় আৰু ক্ৰীড়াৰ দৰে সাধাৰণ বিষয়বোৰক নিজৰ স্বভাৱজাত দক্ষতাৰ কৌতুক অভিনয়েৰে মানুহৰ মাজত অতি ৰসিকতাৰে উপস্থাপন কৰি জনপ্ৰিয়তা লাভ কৰে৷
মানে সেই সময়তে জগতাৰ জাগ্গীৰ সৈতে কমেডী এলবাম মুকলি কৰাৰ লগতে দূৰদৰ্শনতো জুগনু কেহন্দা হে নামৰ এক কমেডি অনুষ্ঠানো কৰিছিল৷ ১০ বছৰৰ একেলগে কাম কৰাৰ পিছত মান আৰু জাগ্গীয়ে পৃথক হয় আৰু তেওঁ ৰাণা ৰণবীৰৰ সৈতে জুতি বান্ধি কমেডি অনুষ্ঠান কৰি যায়৷
লগতে পঢ়ক কাইলৈ নিৰ্বাচনৰ ফলাফল : জ্যোতিষীৰ ভৱিষ্যদ্বাণী, উত্তৰ প্ৰদেশত আকৌ যোগীৰাজ নিশ্চিত!
ইয়াৰ পিছত আকৌ জাগ্গীৰে পুনৰ মিলন ঘটি তেওঁলোকে লাইফ ইউথ ৱাইফ নামৰ এক শ্ব’ৰেৰে কানাডা আৰু ইংলেণ্ড ভ্ৰমণ কৰি অনুষ্ঠান পৰিৱেশন কৰে৷ ২০০৮ চনত ভগৱন্ত সিং মানে ষ্টাৰ প্লাছৰ দ্য গ্ৰেটাৰ ইণ্ডিয়ান লাফ্টাৰ চেলেঞ্জত অংশগ্ৰহণ কৰে৷ মেইন মা পঞ্জাৱ দীত কৰা অভিনয়ৰ বাবে মানে ৰাষ্ট্ৰীয় বঁটাও লাভ কৰে৷ মানে প্ৰায় ২৫ টা কমেডি এলবাম, ৪ টা মিউজিক এলবাম, ১৩ খন ছবি, পোন্ধৰখন ভিডিঅ’ এলবামত অভিনয় কৰিছিল৷
২০১১ চনত ভগৱন্ত মানে পিপলছ পাৰ্টি অৱ পঞ্জাৱ ত যোগদান কৰি ২০১২ চনত লেহৰা বিধানসভা সমষ্টিত প্ৰতিদ্বন্দ্বিতা কৰি পৰাজয় বৰণ কৰে৷ ইয়াৰ পিছতে ২০১৪ চনত ভগৱন্ত সিং মানে আম আদমি পাৰ্টিত যোগদান কৰি চাংগ্ৰুৰ লোকসভা সমষ্টিৰ পৰা ২,১১,৭২১ টা ভোটত জয়লাভ কৰে৷
ইয়াৰ পিছতে আপ-এ নেতৃত্বই মানক পঞ্জাৱত দলীয় আহ্বায়ক হিচাপে নিযুক্তি দিয়ে৷ কিন্তু ড্ৰাগছ মাফিয়াৰ গোচৰত অৰবিন্দ কেজৰিৱালে বিক্ৰম সিং মাজিথিয়াৰ ওচৰত চৰ্তহীন ক্ষমা বিচৰাৰ দাবীত পদত্যাগ কৰে৷ ২০১৭ চনত তেওঁ ৰাজ্যৰ ৰাজনীতিত প্ৰৱেশৰ বাবে সুখবীৰ সিং বাদল আৰু ৰৱনীত সিং বিট্টুৰ বিৰুদ্ধে জালালাবাদত নিৰ্বাচনত প্ৰতিদ্বন্দিতা কৰি বাদলৰ হাতত ১৮,৫০০ টা ভোটত পৰাজিত হয়৷
লগতে পঢ়ক অমিতাভ বচ্চনৰ ঘৰত ৪ কোটি টকীয়া পেইণ্টিং : এই টকাৰে আপুনি কি কি ক্ৰয় কৰিব পাৰিব?
২০১৪ চনৰ পৰা ২০১৯ চনলৈ লোকসভাৰ সাংসদ হৈ থকা সময়ত ভগৱন্ত সিং মানে দুখন সংসদীয় সমিতিৰ সদস্য হিচাপেও কাৰ্যনিৰ্বাহ কৰিছিল৷ ২০১৯ৰ লোকসভা নিৰ্বাচনত পুনৰ একেটা লোকসভা সমষ্টিৰ পৰা আপৰ হৈ ১,১১,১১১ টা ভোটত জয়লাভ কৰে৷ যোৱা ৯ ফেব্ৰুৱাৰীত মানে লোকসভাত কৃষকসকলৰ বিষয়বোৰ সংসদত উত্থাপন কৰি সমগ্ৰ দেশবাসীৰে দৃষ্টি আকৰ্ষণ কৰিবলৈ সক্ষম হয়৷
২০২২ৰ ফেব্ৰুৱাৰি মাহত পঞ্জাৱ বিধানসভা নিৰ্বাচনৰ দিন ঘোষণা কৰাৰ লগে লগে আম আদমি পাৰ্টি-এ ভগৱন্ত সিং মানক পঞ্জাৱৰ মুখ্যমন্ত্ৰী হিচাপে প্ৰক্ষেপ কৰে৷ তেওঁৰ নেতৃত্বতে আদ আদমি পাৰ্টি-এ পঞ্জাৱত নিৰ্বাচনী যুঁজত অৱতীৰ্ণ হয়৷
ভগৱন্ত সিং মানৰ নেতৃত্বতে পঞ্জাৱত আম আদমি পাৰ্টি-এ বৃহৎ জয়ৰ দিশে ধাৱমান হৈছে৷ এই মূহূৰ্তলৈকে দলটোৱে ৮৭ খন আসনত অগ্ৰগতি লাভ কৰিছে৷ ভগৱন্ত সিং মানৰ নেতৃত্বতে পঞ্জাৱত আদ আদমি পাৰ্টি-এ চৰকাৰ কৰাটো প্ৰায় নিশ্চিত হৈছে৷ সমগ্ৰ দেশতে বিজেপিৰ প্ৰতি থকা ঢৌ আৰু শাসকীয় কংগ্ৰেছক পঞ্জাৱত বিধ্বস্ত কৰি এতিয়া ভগৱন্ত সিং মান সমগ্ৰ দেশৰ ৰাজনীতিতে চৰ্চা লাভ কৰিবলৈ আৰম্ভ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
