বৃহস্পতিবাৰে আন চাৰিখন ৰাজ্যৰ সৈতে পঞ্জাৱত ভোটগণনা অব্যাহত আছে৷ ভোটগণনা আৰম্ভ হোৱাৰে পৰা পঞ্জাৱত আম আদমি পাৰ্টি-এ বৃহৎসংখ্যক আসনত অগ্ৰগতি লাভ কৰিছে৷ এই মুহূৰ্তলৈকে দলটোৱে প্ৰায় ৯১ খন আসনত অগ্ৰগতি লাভ কৰি আছে৷
আম আদমি পাৰ্টি-এ পঞ্জাৱত চৰকাৰ গঠন কৰাটো প্ৰায় নিশ্চিত হৈছে৷ ইতিমধ্যে দলটোৱে পঞ্জাৱৰ লোকসভাৰ সাংসদ ভগৱন্ত সিং মানক মুখ্যমন্ত্ৰী হিচাপে পক্ষেপ কৰিছে৷ ভগৱন্ত সিং মানৰ নেতৃত্বতে আপ-এ পঞ্জাৱত চৰকাৰ গঠন কৰিব৷
সেয়ে আজি পুৱাৰে পৰা সংবাদ মাধ্যমৰ কেন্দ্ৰবিন্দু হৈ পৰিছে একালৰ কৌতুক অভিনেতা তথা পঞ্জাৱৰ ভাবী মুখ্যমন্ত্ৰী ভগৱন্ত সিং মান৷ পঞ্জাৱত বৃহৎ ব্যৱধানত আপ-এ অগ্ৰগতি লৈ থকাত সংবাদ মাধ্যমে কৰা এক প্ৰশ্ন উত্তৰত ভগৱন্ত সিং মানে কয় যে তেওঁ মুখ্যমন্ত্ৰী নহয়, পঞ্জাৱৰ কমন মেন (সাধাৰণ মানুহ)হে হ’ব৷
লগতে পঢ়ক মঞ্চৰ এজন কমেডিয়ানৰ পৰা পঞ্জাৱৰ মুখ্যমন্ত্ৰীলৈ ভগৱন্ত সিং মানৰ ৰোমাঞ্চকৰ যাত্ৰা…
ভগৱন্ত সিং মানে লগতে কয় যে তেওঁ পঞ্জাৱৰ সাধাৰণ মানুহৰ সৈতে থাকিব আৰু সেয়ে তেওঁ এজন ‘কমন মেন’হে হৈ থাকিব৷ মুখ্যমন্ত্ৰীৰ গাদীত বহিলেও তেওঁ নিজকে সদায় ‘কমন মেন’ অৰ্থাৎ সাধাৰণ মানুহৰূপে নিজকে গণ্য কৰিব৷ মানুহৰ মাজত বৈষম্য তেওঁ হ’বলৈ নিদিয়ে আৰু তেওঁৰ মনলৈও কোনো বৈষম্যৰ মনোভাৱ আহিবলৈ নিদিয়ে বুলিও কয় মানে৷
তেওঁ কয়, ‘‘ৰাজ্যখনৰ মানুহে পুৰণি পঞ্জাৱ ঘূৰাই বিচাৰে। সেয়েহে মোৰ সপোন হৈছে পুৰণি পঞ্জাৱক ঘূৰাই অনা। মই পাঞ্জাৱক পেৰিছ, লণ্ডন বা কেলিফৰ্ণিয়াত পৰিণত কৰাৰ কথা একেবাৰে নাভাবো। মই পুৰণি পঞ্জাৱক ঘূৰাই আনিম যে পঞ্জাৱ এখন সপোনৰ ৰাজ্য।’’
লগতে পঢ়ক ইউক্ৰেইনৰ ৰাষ্ট্ৰপতিৰ পত্নী জেলেনস্কাৰ বিশ্ববাসীলৈ পত্ৰ; কি ক’লে পত্ৰত?
উল্লেখ্য যে একালৰ অতি জনপ্ৰিয় আৰু দক্ষ কৌতুক অভিনেতা ভগৱন্ত সিং মানে বিভিন্ন সময়ত নিজৰ আচৰণ আৰু বক্তব্যৰ বাবে বিতৰ্কৰ সৃষ্টি কৰি আহিছে৷ বিশেষকৈ ৰাজহুৱা স্থানত মদ্যপান কৰা আৰু মদ্যপান কৰি সংসদলৈ যোৱাৰ বাবে বাৰে বাৰে বিতৰ্কৰ সোমাই পৰিছিল ভগৱন্ত সিং মানে৷ আনকি মদ্যপান কৰি সংসদত উপস্থিত হৈ তেওঁ শাস্তিও সন্মুখীন হৈছিল৷
অৱশ্যে ২০১৯ চনত ভগৱন্ত সিং মানে মদ্যপান নকৰো বুলি ৰাজহুৱাকৈ শপত খাইছিল৷ তেতিয়াৰে পৰা নিজকে মদ্যপান কৰাৰ পৰা দূৰত ৰাখিছে ভগৱন্ত মান সিঙে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
